Read Car_Nicobarese ISIKĪ-ĔL 36 Bible Online

ISIKĪ-ĔL 36 - Car_Nicobarese bible

ISIKĪ-ĔL 36

¹Me-eṅ, kūön tarik, vë-eny mu-unôich i minë rôngö Israel, ngö ṙô, Ō yī-ö Rôngö Israel, hang ngam ṙô ngam Mā Tēv.

²Ngö ṙô an ngam Mā Tēv: Pò ngam tökunyaha-elmat tö meh nö ngö ṙô, Ā! Ane inrē, ngaich min minë rung mā misī nö amin hī,

³Lökten ve-eny mu-unôich Mā Tēv: Pò cha, hôṅ, pò cha nö vīten meh öt aṅhaṅvkūö, keuheūtngöre lā-a tī inrē nö tiṙölngen meh, lökten meh ngaich vītöre amin vē pumnāmö tarik, ngaich me-eṅ inrē ëlô töchōich inrē öm tinkākô tarik;

⁴Lökten, Ō yī-ö rôngö Israel, hang ngam ṙô ngam Mā Tēv: Ngö ṙô ngam Mā Tēv tö në rôngö tö në rung inrē, tö në linrākö achāṙö inrē nup töpiyāyi töṙā-ai elpanam inrē, nup tö ngaich nö pôḵ ane inrē pinhë-eṅkūö vē pumnāmö tarik mahavīlen e;

⁵Lökten an ngam Mā Tēv nö ngö ṙô; I ṙanāchö kumnyahlōnre chin ṙô-òv i në pumnāmö tarik i Ētöm inrē nö ṙòkhöre ngam kamë-eṅkūöre tö ngam panamchu nö amin cha nö holtö ṙanāmölōnre miyëṙôre inrē, pòcha nö hòṅ hayōmö e kil nup aṅ e inrē.

⁶Lökten ve-eny inlahen mu-unôich ip panam Israel, ngö ṙô inrē tö minë rôngö rung inrē, tö nup linrākö achāṙö inrē, Ngö ṙô an ngam Mā Tēv: Yĕh meuk, ṙô-òv chin i kumlēḵ lanīnö chu,pò yīö kihngen tö minṙēngöre tö yip pumnāmö tarik;

⁷Lökten an ngam Mā Tēv nö ngö ṙô; Chūökūṙô chin tö yip pumnāmö tarik min yip mahavīlen yīö nö miṙē-ĕyö.

⁸Yī-ö pöri, Ō yī-ö rôngö Israel, meuinylö pak yin min, ngaich ṙôngu min in yip tarik chu Israel: Pò cha min nö öt ṙôktörevö nö yih nö i patī.

⁹Yĕh meuk, pò chu in yīö havöötökūöre chin min in yīö, ngaich yī-ö min ulka teūichö inrē;

¹⁰Ngaich chū-ö min ṙūölö ṙôken tarik i kūö yīö, ṙòkhöre aṅ patī Israel, ṙòkhöre angū-ö; iyöngö ël nup elpanam min mānlöngö min inrē nup töpiyāyi chūö-kö;

¹¹Ṙūölö ṙôken aṅkūö meh chin min tö tarik töṙeūla inrē; ngaich cha-a min nö ṙūölöre ṙôken mikūönlö inrē; ngaich chū-ö min vīten yīö iyöngökūö sāre tö nuk misī, ane inrē pōyen tī min tö tölöök in yīö mötlö tök lā-urĕh. Ngaich yī-ö min akahalōn tö chu öich Mā Tēv.

¹²Hôṅ, hökngö röön tarik chin min nö lök i kui yīö, vē tarik chu Israel; ngaich cha-a min nö amīnū tö yīö ngaich yī-ö min inrē öi amin cha, ngaich öt ngöhören min me-eṅ miṙīvīlōn tö yip kūön cha.

¹³Ngö ṙô an ngam Mā Tēv: Pò tarik nö ngö ṙô tö yīö, Kamāngö tarik yin, miṙivngölōn pumnāmö tarik yin tö kūön cha,

¹⁴Lökten man min öt ngöhöre kūö kā tarik öt ngöhören inrē miṙivngölōn pumnāmö tarik tö yip kūön cha, ṙô ngam Mā Tēv:

¹⁵Hö-ö chin min ahangtö nang meh öich hēk tö minṙēngö aṅ i pumnāmö tarik, hö-ö min me-eṅ inrē keun sumrōngkūö vē tarik ötngöhören inrē pumnāmö tarik nö tī-ivö tö kinvē-ĕre, ṙô ngam Mā Tēv.

¹⁶Yih ngam ṙô ngam Mā Tēv nö in chu:

¹⁷Kūön tarik, hē ngam patī Israel nö iyöng im panam re, hachōichngö e cha-a ngaich tö nup talöökö cha la-en cha inrē; ngaich i kuö chu ngam inlaha cha nö sā öp kikānö töthet nö ip kunnyahenre.

¹⁸Lökten chu hōngtö ngam lanīnö re i kui cha tökūö nuk mahām kitak tö cha nö im panam, kūö nup insātēv nup aṅti cha nö hachōichgö e.

¹⁹Pirātngen cha chū-ö ngaich nö in vē pumnāmö tarik, payāyi cha-a ngaich nö i nup panam; nöng sā nup inlaha cha la-en cha inrē öich akah fālen cha.

²⁰Hē cha pöri nö yih nö i yip pumnāmö tarik, ip töng chūök cha nö yih, hachōichngö ngam töhet cha-a minë-eny chu, i ṙô yip tarik tö cha, Tarik ngam Mā Tēv yin vē, ngaich pöri cha-a nö kiröönngöre nö ṙā-ang panam re.

²¹Chöö-önytö ngam minë-enyre pöri chū-ö, ngam töhachōichiyö tö ngam patī Israel nö in yip pumnāmö tarik yip yahīhikūö cha.

²²Lökten ngö ṙô tö ngam patī Israel, Ngö ṙô an ngam Mā Tēv: Rö-ö an nö pòkūö meh, Ō patī Israel, tö chu la-evṙen min pòkūö ngam töhet minë-eny chu pöri, ngam hachōichngö yīö in yip pumnāmö tarik yip lööṙö yīö.

²³Ngaich chū-ö hòṅ haköp ngam hanëtö ngam tökiröng minë-eny chu, ngam tö ngaich nö hachōichiyö nö in yip pumnāmö tarik, ngam hachōichngö yīö in cha; ngaich akahalōn min yip pumnāmö tarik tö chu öich Mā Tēv, ṙô ngam Mā Tēv, yē chu lökten in yīö haköp hanëtöre i kūö cha.

²⁴Pò chu min kē-ĕ yīö ṙā-ang in yip pumnāmö tarik, hamūlö yīö inrē ṙā-ang i nup panam, ngaich kēten yīö im panam kanahngen yīö.

²⁵Kicheny kui yīö chin min tö töhet mak, ngaich yī-ö min het ṙā-ang i nup ö hanëtö yīö, ṙā-ang i nup insātēv yīö chin min inrē ahetlen yīö.

²⁶Ngaich chū-ö min kētö tufömngöre ellōn yīö, tufömgöre inrē ma-alaha ṙahātö chu min lātuhēt in yīö; ngaich chū-ö min ṙā-ang im alaha yīö kēngö ngam ihong ellōn kē-ĕkūö yīö inrē tö alaha ellōn.

²⁷Ngaich chū-ö min ṙātö ngam fanöinylöre ellōn yiö, ngaich vīten yīö lök i minë tökūichö chöngö chu ṙēmen yēḵ inrē öi haköpkö në hachöngten chu.

²⁸Ngaich yī-ö min iyöng im panam ngam kahëtö chu in yik yöng yīö; ngaich yī-ö min tarik chu, Tēv yīö chū-ö min inrē.

²⁹Ṙānyen yīö chū-ö min inrē ṙā-ang i nup öthanëtö yīö nö ṙòkhöre; ngaich chū-ö min inrē havëtö sāiny ngaich vīten e nö pōyen öt ṙātö inyāichö inrē i kui yīö.

³⁰Vīten ṙòng chōn chin min ṙānūölö ṙôken aṅ panô-òṅ inrē, hòṅ yīö öt hētu hēk kihngen öi miṙē-ĕi tö inyāichö in vē pumnāmö tarik.

³¹Ngaich yī-ö min fē-ĕlre tö nup tölöök talöökö yīö, nuk la-en yīö inrē nuk tö ötlöök; ngaich yī-ö min inrē sa-òkkūö töre kūö nup ötlanöökö yīö tösa-òkhu inrē la-en yīö.

³²Rö-ö an nö pòkūö yīö ngam tī chu min, ṙô ngam Mā Tēv; akahalōn yin yēḵ tö e. Sirōngkūö yēḵ kalūöchöre el kui inrē kūö nup talöökö yīö, Ō patī Israel.

³³Ngö ṙô ngam Mā Tēv: Ik sakāmö hē chu ahetlen yīö ṙā-ang i nup ötlanöökö yīö, vīten minë elpanam chū-ö min nö iyöngö kūö, minë chūökö inrē töhatngö min nö mānlöngö.

³⁴Ngaich ngam panam ngam tö-öt aṅhaṅvkūö min nö ūlö, ṙënngen e nö töt aṅhaṅvkūö sin misī nö i mat yip taṙòkhöre chamööngö e.

³⁵Ngaich ngö ṙô min cha-a, Ngih panam töt aṅhaṅvkūö sin ngaich vītöre nö sā ngam panô-òṅ Ēten; ngam töhatngö töt aṅhaṅvkūö tötiṙöli elpanam inrē ngaich töngamuh nö iyöngö vīlöng chūök kumyung inrē.

³⁶Ngaich yip pumnāmö tarik tö-ōtren mahavīlen yīö min nö akahalōn tö chu, öich Mā Tēv, mamānlö minë tötiṙöli chūökö, teūichtö aṅ ngam töt aṅhaṅvkūö sin inrē; chū-ö chin, Mā Tēv, töṙô-òv, ngaich min chū-ö la-evṙen tö e.

³⁷Ngö ṙô an ngam Mā Tēv: Angū-ö ngih inrē öich hökngen ngam patī Israel min nö ve-ekūö chu la-evṙen chööḵnyöten tö cha; öich ṙūölö ṙôngö yip tarik cha nö sā pököre.

³⁸Sā pököre tökētuvö, sā pököre i Yērusalem hē nup töhakamka tökiröng nyinā-aṅ ngatī min nup töpiyāyi elpanam nö tööḵlö tö pököre tarik inrē. Ngaich cha-a min nö akahalōn tö chu öich Mā Tēv.