Read Car_Nicobarese ISIKĪ-ĔL 37 Bible Online

ISIKĪ-ĔL 37 - Car_Nicobarese bible

ISIKĪ-ĔL 37

¹I kui ngam kël ngam Mā Tēv, ngaich kēnyen chu anga-aṅ nö lökten ngam töhet Fanöinylö ngam Mā Tēv, ngaich ṙāten chu ellōn ap achāṙö; tööḵlö angū-ö tö tangëḵ.

²Ngaich anga-aṅ nö hachōḵngen chu havīṙö u; ngaich yĕh meuk, pōyen anū-ö nö el ök achāṙö; ngaich yĕh meuk, nyô anū-ö.

³Ngaich ngö ṙô anga-aṅ tö chu, Kūön tarik, kô ön në tangëḵ nö aṅ? Sapṙô chū-ö ngaich, Ō Mā Tēv, me-eṅ man tö-akahalōn.

⁴Hēk anga-aṅ nö ngö ṙô tö chu, Vë-eny mu-unôich i në tangëḵ ngö ṙô tö u, Ō tönyô tangëḵ, hangṙô ngam Mā Tēv.

⁵Ngö ṙô an ngam Mā Tēv tö në tangëḵ; Yĕh meuk vīten unhômö chin min nö meuthöt nö in yīö, ngaich min yī-ö aṅ.

⁶Ṙātö rahēḵ chin min in yīö, vīten alaha inrē min nö sīöpnyi nö in yīö, haṙungngen yīö inrē tö uk alaha, ṙātö unhômö in yīö inrē, ngaich aṅ min yī-ö; ngaich akahalōn min yī-ö tö chu öich Mā Tēv.

⁷Vë-eny mu-unôich chū-ö ngaich sā tinölô chu; ngaich hē chu vë-eny mu-unôich, ṙënṙô ngaich ök umuh, ngaich yĕh meuk, ök pinrālö ṙô; mulhen höö ngaich nuk tangëḵ, taphen höö kūö nuk tangëḵ.

⁸Ngaich hē chu ngëicha, rahēḵ ngaich nuk umuh in u, sīöpnyi alaha inrē nö in u, haṙūngi inrē anū-ö tönuk alaha; hö-ö pöri nö unhômu in u.

⁹Ngö ṙô ngaich anga-aṅ tö chu, Vë-eny mu-unôich im unhômö, Ngö ṙô an ngam Mā Tēv: Ō unhômö yih tā-a löktö i minë töfën kuföt, fööhöt unhômö vē töfëli, hòṅ cha nö aṅ.

¹⁰Lökten chu vë-eny mu-unôich sā tinölô chu tö ò, ngaich yih ngam unhômö nö in cha, aṅ cha-a ngaich sökhak röön ngaich, nö kiröngen ṙôngö.

¹¹Ngö ṙô ngaich anga-aṅ tö chu, Kūön tarik, aṅ patī Israel nun në tangëḵ nö ṙòkhöre. Yĕh meuk, ngö ṙô yip, Nyôngö nun në tangëḵ ih, chatngen ök ṙinātö ellōn ih; tökngö in öi rökiṙen.

¹²Lökten vë-eny mu-unôich, ngö ṙô tö cha inrē, Ngö ṙô an ngam Mā Tēv: Yĕh meuk, löpnyökūö nup anūlö yīö chin min, hachohlen yīö inrē ṙā-ang el nup anūlö yīö, Ō yī-ö tarik chu; ngaich kēten yīö chū-ö min i patī yīö i panam Israel.

¹³Ngaich yī-ö min akahalōn tö chu öich Mā Tēv, yē chu löpnyökūö anūlö yīö, ngaich hachohlen yīö ṙā-ang el anūlö yīö, Ō yī-ö tarik chu,

¹⁴Ngaich chū-ö min ṙāhöt ngam Fanöinylöre in yīö, ngaich min yī-ö aṅ, ṙāten yīö chin min ip panam kanahngen yīö, ngaich akahalōn min yī-ö tö chu, öich Mā Tēv, töṙô-òvö, ngaich tītö e inrē, ṙô ngam Mā Tēv.

¹⁵Yih ngam ṙô ngam Mā Tēv nö in chu:

¹⁶Kūön tarik, kē chōn man hĕng kūich alaha ò inrē, Löö Yūtā, in yip kūön Israel inrē tönôlta nö in ò; kē tahëng inrē chōn kūich alaha ò, Löö in Yôsĕf (chōn ifrēm) ṙòkhöre inrē patī Israel tönôlta nö in ò;

¹⁷Tap kūö u ngaich hĕng milôhò nö chōn, hòṅ u nö hĕng nö eltī meh.

¹⁸Ngaich hē yip tarik meh min nö ngö ṙô tö meh, Öt hòṅ hameukhö mat ih öm tö manah u anū-ö në?

¹⁹Ngö ṙô tö cha, Ngö ṙô an ngam Mā Tēv: Yĕh meuk, ngaich chin hòṅ kētö ngam chōn Yôsĕf (ngam eltī Ifrĕm) tö yip miyöngö Israel inrē tönôlta nö in ò; ngaich chū-ö min taptö e im chōn Yūtā, ngaich vīten u nö töhĕng nö chōn, hòṅ u nö hĕng nö eltī chu.

²⁰Yē minë chōn tökūichö alaha tö meh nö eltī meh nö i kūö cha.

²¹Ngö ṙô ngaich tö cha, ngö ṙô an ngam Mā Tēv: Yĕh meuk, kē yip tarik Israel chin min nö ṙā-ang in yip pumnāmö tarik yip chūök cha nö ngaich nö kiröönngöre, hamūlö cha inrē min ṙā-ang tökeuheuttöre lā-a, ngaich kēten cha ip panam kanahngen cha,

²²Ngaich vīten cha chū-ö min nö hĕng nö pumnāmö tarik nö im panam, i kui minë rôngö Israel; hĕng tak min rācha inrē rācha nö i kui cha nö ṙòkhöre; öt ngöhören min cha-a nö nët nö pumnāmö tarik, ötngöhören inrē nö harēvöre nö nët nö pūlngö.

²³Hö-ö yip min nö hachōichngöre nö hēk nö i nup insātēv cha sin-òkkūö chehen cha inrē, hēk in nup tökööl cha inrē; hayööken cha pöri chū-ö min ṙā-ang im hineūlritre tö cha ngam chūök cha nö köölö fālen, ngaich ahetlen cha min; ngaich cha-a min nö tarik chu, ngaich chū-ö min Tēv cha.

²⁴Rācha ap min nö I kui cha ap tarik chu Tāvit; ngaich cha-a min nö ṙòkhöre nöng hĕng tak yōm tö yōm pököre. Tömkörit nup chöngö chu yip min ṙēmen inrē nö haköpkö nup chöngö chu tökūichö.

²⁵Iyöng ip panam yip min chūök yik yöng yīö nö iyöng ap kahëtö chu ip tarik chu Yāköp; cha-a tö yip kūön cha inrē tö yip kūön yip kūön cha inrē örheūheu min nö iyöng nö umuh; ngaich ap tarik chu min Tāvit nö rācha nö in cha nö örheūheu.

²⁶Vītö öp kinlēḵngô lanāmö chū-ö min incha; tötchanūhuvṙen ap min nö kinlēḵngô nö in cha; ngaich chū-ö min hakôlò cha ṙūölö ṙôngö cha inrē, ellōn cha tī chin min asöklö öp töhet chūökre nöng örheūheu.

²⁷In cha öp min elyöngö chu; ngaich chū-ö min Tēv cha, ngaich cha-a min nö tarik chu.

²⁸Ngaich akahalōn min vē pumnāmö tarik tö chu öich Mā Tēv ma-ahetlen Israel, yē öp töhet chūök chu nö örheūheu nö elṙôngö cha.