Read Car_Nicobarese ISIKĪ-ĔL 38 Bible Online

ISIKĪ-ĔL 38 - Car_Nicobarese bible

ISIKĪ-ĔL 38

¹Yih ngam ṙô ngam Mā Tēv nö in chu:

²Kūön tarik, havöötökūöre man kū-ötö Kōk, ap panam Mākōk, yöngkūö kūön rācha aṅ Mēsĕk Tupôl inrē, vë-eny mu-unôich lā-al ò.

³Ngö ṙô, an ngam Mā Tēv: Yĕh meuk, lā-al meh chin, Ō Kōk, yöngkūö kūön rācha aṅ Mēsĕk Tupôl inrē;

⁴Havööngökūö meh chin min, kavòkhötkūö vòk inrē el samā meh, ngaich kēnyen meh min. Ṙòkhöre yip kumyung aṅ in meh inrē kōra tarik aṅ uk kōra inrē, ṙòkhöre cha-a nö keuheūtlöre tī nö hayutlö lanaklö, yöng tömaṙôgö, ṙòkhöre cha-a nö inmööpuṙat lanaklu inrē, kuyāinykūö nup sanët;

⁵Pörsia, Kus, Put inrē holcha ṙòkhöre cha-a nö lanaklu sapīövu inrē;

⁶Kōmar tö yip kumyung in ò; Pettökarmah ṙeū-eung i nup manā-angkūö lā kapā holtö yip kumyung in ò-maṙôngö yip tarik hol ò.

⁷Höngöre lēntöhëchṙen inrē, me-eṅ tö yip kumyung töhamūlö nö in meh, me-eṅ inrē amahten cha.

⁸Unôichrit töṙōl sumkam man min hamūlö; i nup lā-unôich samyeūheu min me-eṅ kiröönngöre lā-al ngam panam ngam töhavantu nö ṙā-ang i kinyūngö, ngam panam chūök yip tarik nö hamūlö ṙā-ang nup töṙōl pumnāmö tarik i kui nup rôngö Israel, nup tö-urāngen nö piyāyi; kēnyu yip tarik e nö ṙā-ang in yip pumnāmö tarik ngaich iyöng töngamuh nö öt pinlānguṙen, ṙòkhöre cha-a.

⁹Iṙūöhö röön man min, sā yanīhih chanôchö panam, sā taṙul man min kahultö kui ngam panam, me-eṅ tö yip kumyung in meh inrē, maṙôngö tarik hol meh inrē.

¹⁰Ngö ṙô an ngam Mā Tēv: Ip sakamö angū-ö yih min nup chanöh ellōn nö elkui lōn meh, ngaich me-eṅ min vīken tötlöök huneū-enre,

¹¹Ngaich ngö ṙô, Kiröönngöre chin min lā-al ngam panam tötkinlōngu tuhēt: Afuktö e chin min in yip tarik töchēvhaka yip mī-iyöng nö öt pinlānguṙen, ṙòkhöre cha-a mī-iyöng lā-uk kinlōngö, öt tö inkālukūö, hēk öt inkūpu;

¹²Öich kē pôkre ane inrē keunngö tökīlö; öich tiṙölngö minë töhatngö chūökö minë tö-iyöngökūö töngamuh, yip tarik inrē töhamūlö nö ṙā-ang i pumnāmö tarik yip töteūngen nö ngaich tö nuā chehen inrē, yip mī-iyöng ellōn ngam tumlat.

¹³Sīpā Tētan inrē tö yip mī-inyihkö chehen aṅ Tarsis aṅ i nup tuhēt e inrē nö ṙòkhöre nö ngö ṙô min tö yīö, Yih öi öi kē taneūngenre? Ngaich öi hamūl yip tömaṙôngö nö keunngö nup tökīlö, nö keunngö rupīö humlum inrē, nö kēngö nuā chehen inrē, nö kē yöng taneūngen?

¹⁴Lökten, kūön tarik, vë-eny mu-unôich, ngö ṙô tö Kōk, Ngö ṙô an ngam Mā Tēv: Ip sakāmö angū-ö hē yip tarik chu Israel nö öt pinlānguṙen nö iyöng, haruhkenre min me-eṅ.

¹⁵Ngaich yih ṙā-ang ip chūök re ip manā-angkūö lā kapā, me-eṅ yip tömaṙôngö tarik inrē in meh, ṙòkhöre cha-a nö i uk kōra, yöng ṙôngö, tökalēḵ nö kumyung;

¹⁶Yih min yī-ö lā-al yip tarik chu Israel, sā taṙul kahultökui ngam panam. I nup lā-unôich sakāmö chū-ö min kēten meh lāḵlö ngam panam chu, hòṅ vē pumnāmö tarik nö akahakūö tö chu, hē chu lökten in meh, Ō Kōk öich haköp ngö hanëtöre i kūö mat cha.

¹⁷Ngö ṙô an ngam Mā Tēv: Anga-aṅ ömme-eṅ öm ṙô chu i nuk lā-urĕh sakāmö lökten i yik tarik chu pròfĕt aṅ Israel, yik i nuk sakāmö anū-ö tö samyeūheuvö ṙô nö vë-eny mu-unôich tö chu kēten meh min lā-al cha?

¹⁸Ip sakamö pöri angū-ö, hē Kōk min nö yih nö lā-al panam Israel, ṙô ngam Mā Tēv, hachohlöngö min ngam lanīnö chu.

¹⁹Pò chu im kumnyahlōnre ane inrē i hanūlö lanīnö chu öich ṙô-òv, ip sakāmö angū-ö öp yöng kinyīna i panam Israel;

²⁰Kāḵ el mai, chehechōn el kuföt, töṙeūla el kahôyö ṙòkhöre inrē nup ṙameūla chehen ṙameulnö el tumlat, ṙòkhöre tarik inrē yip mī-ikūöngih tumlat, nö kichëyöre min nö i kūö chu, tiṙöli min nup rôngö, fukngö min nup kaha panam, ṙòkhöre nup kinlōngö min nö taṙehĕyö nö el tumlat.

²¹Keuheūttöre mihëṅṙö havëti chin min tö pinhë-eṅkūö lā-al Kōk, ṙô ngam Mā Tēv; Kö i holre kūö öp min sanët.

²²Holtö invah tölëlngökūö, kintaknyö mahām inrē chin min kuhēthötre im inkaha fālen in ò; chihūtö kumṙah chin min i kui ò i kui tö kalēḵ kumṙah yip kumyung in ò inrē, in yip tömaṙôngö tarik inrē yip hol ò, tökënngöre kumṙah inrē, tameūyö, ta-ök ihong tameūyö inrē.

²³Ngatī chin min hameuktö ṙôköre ha-ëtöre inrē ngaich mikahtö elmat tömaṙôngö pumnāmö tarik töre. Ngaich akahalōn min cha-a tö chu öich Mā Tēv.