Read Car_Nicobarese ISIKĪ-ĔL 4 Bible Online

ISIKĪ-ĔL 4 - Car_Nicobarese bible

ISIKĪ-ĔL 4

¹Me-eṅ pöri, Ō kūön tarik, Kē īt hĕng ṙātö e ngaich i kūö meh, ngaich I kui e kūich ap insā elpanam, insā Yērusalem; vīlö chūök i kaha kinlōngö e

²Ngaich vītö insā chūök kumyung in e, vīlö chūök kumyung i kaha kinlōngö e, hakutlö rung inrē in e; vītö elyöngö inrē in e, ultö chūök sanông inrē havinngö e.

³Kē tömitāk, vët, ṙātö e nö vët nö kinlōngö ihôi yīö tö ngam elpanam; havöötökūöre yī-ö in e, hökngen e nö tökayīngö, haröhtöre yip kamyīng nö in e. Angū-ö ön ngih minkahgö ngam patī Israel.

⁴Ṙōlngöre pömchö sīṙö tö lātavē, ngaich chū-ö min ṙātö ngam sācha ngam patī Israel nö lātulöng tö meh; i tūmö nup sakāmö meh ṙōlhaka i kui e, keun öp sācha cha min me-eṅ.

⁵Tön kamngu ṙô chin in meh tö tūmö nup sakāmö, lūöyòng machūötöre anāi sakāmö, ṙongta nö i tūmö samyeūheu sācha cha; ngatī rô-òten me-eṅ min keun sācha ngam patī Israel.

⁶Ngaich yē meh min keuheūten tö u, hulalngöre min me-eṅ im innët heuh, sīṙö tö lāhāmö pöri, öm keun sācha patī Yūtā; fën anāi sakāmö kamngö tī chin tö meh, hĕng sakāmö i töhĕng samyeūheu.

⁷Ngaich havöötökūöre min me eṅ lā im kinyīngö Yērusalem, öm inyutu kël; ngaich me-eṅ min vë-eny yanīhih mu-unôich im elpanam.

⁸Ngaich, yĕh meuk, ṙātö nup tökuvaha chin in meh, lökten meh min ötkô havahare lāhī-a hēk lāhih, hanöng saha meh keuheūten tö nup sakāmö kinyīngö meh.

⁹Ngaich me-eṅ, kē vīt parlī inrē, lōpiā pachī inrē, milöh, tahëng kangen vīt inrē, ngaich chaplö u nö el töhĕng tanīöyö, ngaich vī-i u nö rôti. I tūmö nup sakāmö öm asīhaka ṙōlhak, lūöyòng machūötöre anāi sakāmö, öm nyā-aṅ e min.

¹⁰Ngaich öp nyā-aṅkūö öp nyahā meh min nö tökalaha lumngan, nët anāi siköl I töhĕng sakāmö; hĕngkötikūö min me-eṅ nya-aṅ e i töhĕng sakāmö.

¹¹Kalaha ṙôken òk me-eṅ inrē tö mak, hĕng I tötafūöl töhĕng hin; (2 Kōp) hĕngkötikūö min me-eṅ òk mak i töhĕng sakāmö.

¹²Nyā e min me-eṅ sā kūö re tö pārli pikoh, kahūlö e öm meūkö tö cha nö i isôḵ tarik.

¹³Ngaich ngö ṙô ngam Mā Tēv Ngatī yip min tarik Israel nö nyā töthet rôtī, in yip pumnāmö tarik chūöktī chu ahōngen cha.

¹⁴Ngaich ngö ṙô chū-ö, Aōla Mā Tēv! Yĕh meuk, öt hĕng heuh chin chū-ö hachōichngöre löktökūö nyinī-öṅchu söl ing töngamu öich öthĕng heuh kūö kā tökapah hēk tökāpö tö töṙeūla, öt rēhĕn töng yô-òv alaha nö yihtöre nö elvāng chu.

¹⁵Ngaich ngö ṙô anga-aṅ tö chu, Yĕh meuk, hökngen meh chin öm kē sôḵ nuā nö ṙënngen sôḵtarik nö kinṙul nya-aṅkūö meh.

¹⁶Hēk inrē anga-aṅ nö ngö ṙô tö chu, Kūön tarik yĕh meuk, likölngö ngam kaneun rôtī chin min i Yērusalem; nyā rôtī yip min tökalaha lumngan nö holtö pinhë-eṅkūöre, òk mak yip min inrē tökalaha ṙôken nö holtö nganā-ngöre.

¹⁷Ngatī tī chin min tö e hòṅcha nö hāṅten tö nyā-aṅkūö mak inrē, ngaich kö ngëichken höö nö i nganāngöre, lëvngö inrē nö el katòh ngam sācha cha.