Read Car_Nicobarese ISIKĪ-ĔL 41 Bible Online

ISIKĪ-ĔL 41 - Car_Nicobarese bible

ISIKĪ-ĔL 41

¹Ngaich anga-aṅ nö kēten chu nö elmilūkö, ngaich kalah nuk yöng kūö inkūp; tafūöl sumkôngö ṙôktāk nuk yöngkūö inkūp nö fën lā.

²Söm sumkôngö ṙôktāk ök lökhöt inrē; taneui sumkôngö nö āṅngöre lā-a nuk kaha nuk kinlōngö ik lökhöt; ane inrē anga-aṅ kalah rôta ök elmilūkö fën anāi sumkôngö, nët anāi sumkôngö inrē ök ṙôktāk e.

³Kuhēthötre ngaich anga-aṅ nö lā ël ök urôhò ngaich kalah nuk yöngkūö inkūp ik lökhöt, nët sumkôngö; tafūöl sumkôngö inrē ṙôktāk ök lökhöt; sat sumkôngö, ök i kaha kinlōngö ök lökhöt.

⁴Kalah rôta ök urôhò anga-aṅ inrē, nët anāi sumkôngö nët anāi sukmôngö inrē ṙôk tāk e, nö vāngngö töp el milūkö. Ngih ön tölngö töhet nö chūökö.

⁵Ngaich anga-aṅ nö kalah kaha ök tempöl, tafūöl sumkôngö kinfëyö; tö ṙôktāk nuk i kaha urôhò, fën sumkôngö, vinngö nö ik tempöl.

⁶Lūöi köl chap nuk i kaha urôhò hēng i kui ngam tahëng lūöi anāi i töhĕng köl chap. Vinngö nuk nö tanāpu kūö i kaha öp tempöl nö tanööngö kūö kaha nuk urôhò, pòn sōtu anū-ö nö tanööngö kūö tökaha ök tempöl.

⁷Ngaich nuk urôhòl i kaha nö ṙūönyöre ṙôktak i saha u nö kū-ötö lātulöng nö ṙeū-eung im töhĕng tumköl chap haṙongtöre ṙôkö nö im tanööngö kūö löktökūö ngam raneh tumköl chap söl im tahëng nö vinngö nö i kaha ök tempöl; i kaha ök tempöl ök hĕng tayôhò tökū-ötö lātulöng, ngatī löklö öi yòhlö löktökūö im lataṙeū tumköl chap söl im lātulöng öi lök ellōn ngam elmilūkö tumköl chap.

⁸Meuk chū-ö inrē tö ök tempöl nö vinngö kaha tö töharöönlöng ranöönö röön; nuk röön tö machöḵlö nuk urôhò i kaha nö kalaha timhören nö hĕng tafūyu tafūöl sumkôngö rôta.

⁹Taneui sumkôngö kinfëyö ök lā el kayôyö kaha nuk tökiröng urôhò i kaha; ane inrē ök alaha ök ranöönö röön ök tötaṅhaṅv nö taneui sumkôngö. Ihôi ranöönö röön tök tempöl tö nup.

¹⁰Tökiröng urôhò ök elmilūkö nö nët anāi sumkôngö ṙôktāk vinngö nö ik tempöl nö keuheūtngöre lā-a.

¹¹Nuk inkūp nup i kaha tökiröng urôhò inrē nö luvë-akkūö nö lā ik ranöönö röön tö öt aṅhaṅvö hĕng ök inkūp tökū-ötö lā kapā, kū-ötö lā lòhngö öp tahëng; taneui sumkôngö nö vinngö inrē ṙôktāk ök alaha ök töt aṅhaṅvkūö.

¹²Ök patī tökū-ötö ik töluvë-aka ik tempöl nö lā sūng nö sat anāi sumkôngö ṙôktāk; taneui sumkôngö kinfëyö nö vinngö ök kaha ök patī, machūötöre anāi sumkôngö öp rôta e inrē.

¹³Ngaich anga-aṅ nö kalah ök tempöl hēngòng sumkôngö rôta; tök töluvë-aka tök patī holtö nuk kaha e hēngòng sumkôngö rôta;

¹⁴Ök ṙôktāk inrē ök lā chuhöt lā kūö ök tempöl tök töluvë-aka, hēngòng sumkôngö.

¹⁵Ngaich anga-aṅ nö kalah rôta ök patī nö kū-ötö ök tö luvë-aka ök lā sūng tö nuk kaha e inrē nö āṅngöre lā-a, hēngòng sumkôngö (50 Mtr). Ngaich ök elmilūkö ök tempöl tök lātuhēt urôhò tök lā uk lökhöt inrē.

¹⁶Nö hatāpö kaha tö savaich nö vinngö nö ṙòkhöre nup tölūöi inkūp lökhöt kuföt töfiṙötö yöngṙen. Lātulöng lā ök ël ök tempöl nö hatāpö ël tö savach vinngö, löktökūö el patī söl i nuk inkūp lökhöt kuföt (rūpiyö nuk inkūp lökhöt kuföt).

¹⁷Söl ik töhôingöre lātulöng tök inkūp, ik la-ël urôhò, lā elkahôyö inrē. Ṙòkhöre nuk kaha inrē nö vinngö ik lā ël urôhò tök elmilūkö inrē nö vī-i insā.

¹⁸Kërupim chōn kachūr inrē, chōn kachūr ihôi ök kërup tök tahëng kërup. Kö nëtö kūö ngòh töhĕng kërup;

¹⁹Hĕng ök kūö tarik tökū-ötö ök kachūr chōn nö hĕng lā kūö kūö lāyön inrē kū-ötö ök kachūr chōn ik tahëng lā. Ka-īpö anū-ö nö vinngö nö ik tempöl nö keuheūtngöre;

²⁰Löktökūö el patī söl kui inkūp nuk kërup kachūr chōn inrē nö ka-īpö nö i kaha.

²¹Mirë nuk machööḵlö nuk inkūp ök elmilūkö; lā kūö ök töhet chūökö inrē ök tö sā

²²Töhĕng tahāklö chōn, lūöi sumkôngö rô-òl kui, nët sumkôngö rôta, nët sumkôngö ṙôktāk inrē; nuk nang e, lā kūö e, kaha e inrē nö chōn. Ngö ṙô anga-aṅ tö chu, Mīs ön ngih mī-ikūö ngam Mā Tēv.

²³Ngam elmilūkö tö ngam töhet chūökö tönëtö inkūp.

²⁴Kö nëtö in nuk inkūp tö rōi chōn, nët nuk tökilölö rōi chōn i töhĕng inkūp.

²⁵I kui nuk inkūp ök el milūkö nuk töka-īpö kërup kachūr chōn inrē, nuk töka-īpö nö i nuk kaha; ranup tö kui ök umuh inrē savaich i kūö ök lökhöt lā-el kahôyö.

²⁶Ngaich nuk umuh töfiṙötö inkūp lökhöt kuföt tö nuk kachūr chōn inrē nö āṅngöre lā-a, i nuk kaha ök lökhöt.