Read Car_Nicobarese ISIKĪ-ĔL 42 Bible Online

ISIKĪ-ĔL 42 - Car_Nicobarese bible

ISIKĪ-ĔL 42

¹Ngaich anga-aṅ nö hachōḵnyen chu el ap latuhēt elmilūkö, kū-ötö lā kapā, ngaich kēten chu i nup tökirög urôhò nuk tökamlö nö ik töluvë-aka nö ik tempöl tökamlö inrē nö ik patī lā kapā.

²Hēngòng sumkôngö rôta ök patī ök lā kapā, teneui anāi sumkôngö ṙôktāk inrē.

³Taptöre nö i nup tönët anāi sumkôngö nup aṅ ik lātuhēt elmilūkö, ngaich kū-ötö ök tölāchö ël ök aṅ ök elkahôyö elmilūkö, nö havööhenhökūö nuk tötānyu chūök nö i kaha pati i minë tölūöi köl chap.

⁴Ngaich i kūö nup tökiröng urôhò ök talöökö tökū-ötö lātuhēt, söm sumkôngö ṙôkti hēngòng sumkôngö rôta inrē, lā kapā nuk inkūp u.

⁵Cheūkti nuk lātulöng tökiröng urôhò, kūö nuk tötānyu chūök i kaha patī nö pōyen kahëngö nö ṙā-ang in u töre nö ṙā-ang im lataṙeū i nup lā ṙat tökiröng urôhò inrē el ngam patī.

⁶Pò u nö i minë tölūöi tumköl chap, ngaich rö-ö anū-ö nö machööḵluvö nö sā machööḵlö ök lā-uk elmilūkö; lökten nuk lātulöng tökiröng urôhò nö löktökūö el tumlat röönti nö mötlö tö nuk lātaṙeū lā ṙat inrē.

⁷Ngaich kinlōngö ök umuh lā el kahôyö sā chööḵ-ö nup tökiröng urôhò, kūötö ök lā uk elmilūkö, kamtö nuk tökiröng urôhò, taneui anāi sumkôngö rôta.

⁸Pò nuk tökiröng urôhò lā uk ök elmilūkö nö taneui anāi sumkôngö rôta, ngaich nuk tökamlö nö ik tempöl nö hēngòng sumkôngö rôta.

⁹Lātaṙeū tö në tökiröng urôhò hĕng ök lökhöt lā chuhöt kaha u, sā kunhēthöt hī in u lökhöt ök lā uk elmilūkö,

¹⁰I ranehtökūö ök lā uk kinlōngö. Lā kapā inrē, kamlö nö ik töluvë-aka kamlö inrē nö ik patī, nuk tökiröng urôhò.

¹¹Tö talööku nö lā kūö u; sā nup tökiröng urôhò anū-ö lā kapā, nö hĕngren rôta ṙôktāk inrē, nöng anū-ö löknyi töhalēnö tö nuk inkūp inrē.

¹²Lā taṙeū inrē tö nuk lā lòhngö tökiröng urôhò ök hĕng lökhöt lā chuhöt, yē hī kuhēthötre ik lökhöt, kamtö u inrē ök kinlōngö tökungāṅngöre kūö.

¹³Ngaich ngö ṙô anga-aṅ tö chu, Minë lā kapā tökiröng urôhò tö minë tökamlö lā lòhngö tökiröng urôhò nö im töluvë-aka töhet nun nö im töluvë-aka töhet nun nö tökiröng urôhò, chūök yip kūönṙô töhòṅ yihtöre nö im Mā Tēv nö nyā nup tölngö töhet tökētu min; in e cha-a min nö ṙātö nup tölngö töhet tökētu-sainy tökētu, kūö tökööl tökētu, ane inrē kūö fālen tökētu, pò ngam chūökö nö töhet.

¹⁴Yē yip kūönṙô nö kuhēthötre nö im töhet chūökö, hö-ö cha-a min nö kunyī-inyre nö ṙā-ang in e nö chuh ël öp lā uk elmilūkö Yĕn öt ṙātö nup inyut re nö umuh nup inyut cha nö meukṙen pò u anū-ö nö töhet; hayutlöre cha-a tö nup tahëng inyut urēhĕkūö cha nö haröhtöre nö i nup töchööḵnyö tö yip tarik.

¹⁵Ngaich anga-aṅ nö keuheūten nö kalah lā ël ök tempöl, ngaich hachōḵnyen chu anga-aṅ nö löknyö ik inkūp tökū-ötö lā chuhöt, ngaich kalah ṙôkti ök tempöl nö vinngö.

¹⁶Kalah ök lā chuhöt kaha e anga-aṅ nö kinlah tī tö tafūyu, taneūyòng sumkôngö nö kinlah tö tafūyu.

¹⁷Havöökūöre ngaich anga-aṅ ngaich kalah ök lā kapā kaha, taneūyòng sumkôngö nö kinlah tö tafūyu.

¹⁸Havöökūöre ngaich angā-aṅ ngaich kalah ök lā lòhngö kaha, taneūyòng sumkôngö nö kinlah tö tafūyu.

¹⁹Havöökūöre ngaich anga-aṅ nö kūötö ök lā sūng kaha ngaich kalaha e, taneūyòng sumkôngö nö kinlah tö tafūyu.

²⁰Kalaha e anga-aṅ nö fën lā-a. Havīlöng angū-ö tök kinlōngö, taneūyòng sumkôngö rôta ane inrē taneūyòng sumkôngo ṙôktāk, nö inköhngen e nö hôi ngam töhet tö ngam töng ha-eh.