Read Car_Nicobarese ISIKĪ-ĔL 43 Bible Online

ISIKĪ-ĔL 43 - Car_Nicobarese bible

ISIKĪ-ĔL 43

¹Unôich anga-aṅ nö kēten chu ik inkūp, ök inkūp tökū-ötö lā chūhöt.

²Ngaich yĕh meuk, ök lanöökö ngam Tēv Israel nö yih nö löktö lā chuhöt; ngaich ök ṙënṙô yanīhih ò nö sā ṙënṙô töpōyen mak, yang ngaich ngam panam tökūö ngam lanöökö ò.

³Ngaich tömeūkö inrē maheuṅk chū sā ngam tömeūkö maheuṅk chu ngaich hē ò nö yih nö tiṙōlngö ngam elpanam, sā öp tömeūkö inrē ök maheuṅk chu ip tahël Chāpör; ngaich chū-ö afukngöre fāthakkūö.

⁴Hē ngam lanöökö ngam Mā Tēv nö kuhēthötre nö el ök tempöl nö lökhöt ök inkūp tökū-ötö lā chuhöt,

⁵Chātlen chu ngaich ngam töhet Fanöinylö, ngaich kēten chu nö el ök lātuhēt elmilūkö; ngaich yĕh meuk, ngam lanöökö ngam Mā Tēv nö tööḵlö tī tök tempöl.

⁶I saha ök tarik nö sökhaka nö in chu, ngaich chū-ö hangṙô ök töhĕng tak nö vë-ekūö chu nö löknyö el ök tempöl;

⁷Ngö ṙô anga-aṅ tö chu, Kūön tarik, chūök öp kantēta chu ön ngih ane inrē chūök kintān në elröön chu inrē nö chūök chu min iyöng elṙôngö vē tarik Israel öich örheūheu. Öt hēk min ngam patī Israel nö hachōichngö ngam töhet minënyö chu, ötrēhĕn cha-a, ötrēhĕn yip rācha cha, tö nup insātēv cha tö alaha tökapah yip rācha cha inrē,

⁸Nö hanôltö nup chūök pinṙōngö sāiny cha nö i ngam chūök pinṙōngö sāiny chu nup machööḵ-öl inkūp cha inrē nö hamūltu i nup machööḵlö inkūp chu, nöng hĕng öp ranang kūö ihôi chu tö cha ngaich cha-a nö hachōichngö ngam töhet minënyö chu tö nup sin-òkkūö nup kahëken cha, lökten chin ahatngen cha im tanānyö chu.

⁹Hökngen cha yēḵ töngamuh nö kavalngö nup insātēv cha tö nup alaha kupah yip rācha cha nö marôvat tö chu, ngaich chū-ö min örheūheu iyöng elṙôngö cha.

¹⁰Me-eṅ pöri, kūön tarik, hameuktö inlahen ngam patī Israel ngam tempöl öp tösā mineūkö e inrē, hòṅ cha nö sirōngkūö tö nup tökööl fālen cha.

¹¹Ngaich yē cha nö sirōngkūö tö nup taṙòkhöre la-en cha, vītö insā ngam tempöl inlēnö e, löknyö e lökhöt e inrē, keuheūtlöre ti nö insā e inrē mikahtölōn cha inrē tö nuk inchöngten in e tö nup chöngö e inrē; kūichö e nö i kūö cha hòṅ cha nö haköpkö e kēkö kaha nup chöngö e inrē ṙòkhöre inrē nup inchöngten in e.

¹²Angū-ö ön ngih chöngö ngam tempöl: keuheūtlöre öp tumlat tövinngöre nö i kui ngam rôngö nö tölngö töhet min. Yĕh meuk, angū-ö an chöngö ngam tempöl.

¹³Në nun ṙôkö ngam tahāklö nö i sumkôngö (ngam sumkôngö hĕng sumkôngö hĕng ṙôktāk eltī iṅrē): öp lā kūö e min hĕng sumkôngö rôlö, hĕng sumkôngö ṙôktāk inrē, holtö öp tanānyö nö vinngö nö i taseū e sā ṙôktāk eltī. Angū-ö ön min rôlö ngam tahāklö:

¹⁴Löktökūö ngam lā kūö el tumlat söl ip lā taṙeū tinṙīöngnyö, nët sumkôngö, nö hĕng sumkôngö ṙôktāk; löktö kūö ip tökūöṅngö tinṙīöngnyi inrē söl im tökiröng tinṙīöngnyi, fën sumkôngö, nö hĕng sumkôngö ṙôktāk;

¹⁵Ngam tisum ngam tahāklö inrē fën sumkôngö; löktö kūö ngam tisum ngam tahāklö inrē nö kööilö nö kū-ötö tulöng, fën nuk sinrōl, hĕng sumkôngö rôlö.

¹⁶Fën mirëṙö min ngam tisum ngam tahāklö, nët sīön sumkôngö rôta nö nët sīön sumkôngö ṙôktāk.

¹⁷Fën mirëṙö min inrē öp tinṙīöngnyi, fën sīön sumkôngö rôta nö fën sīö sumkôngö ṙôktak, vinngö öp taseū e öp töròngti sumkôngö ṙôktāk, vinngö ök lā kūö e nö hĕng sumkôngö. Ngaich nuk vanānglö ök tahāklö nö kū-ötö lā chuhöt.

¹⁸Ngö ṙô ngaich tö chu, Kūön tarik, ngö ṙô an ngam Mā Tēv: Në nun inchöngten im tahāklö: Ip sakāmö hē e nö asöklöngö tökūö töföngö tökētu nö ël e kūö ṙinöstö mahām inrē nö in e,

¹⁹Hòṅ kē-ĕkūö yip kūönṙô lamökngörit Lēvī min yī-ö yip aṅ i mupihö Sētòk, yip maharöhtöre nö in chu nö meukṙen chu, ṙô ngam Mā Tēv, hĕng nòng kōiny nūa tökētu kūö tökööl.

²⁰Ngaich yī-ö min kē öp mahām ò, ngaich lūöptö e i kui nup töfën sinrōl ngam tahāklö i kui nup töfën inrē sinkeukngö ngam tinṙīöngnyi, i taseū e inrē nö vinngö; ngatī tī yī-ö ahetlö ngam tahāklö vī inlām tökööl inrē tökūö e.

²¹Kē kōiny nuā yī-ö inrē min tökētu kūö tökööl, ngaich anga-aṅ min nö föngö ip chūök töhalēniṙen im tempöl, lā elkahôyö töp töhet ṙôkti e.

²²Ngaich im innëtö sakāmö yī-ö min kētö kōiny pököre töt vahav alaha kūö tökööl nö kētu; ngaich het min ngam tahāklö, sā e nö hëtlö tökūö ngam kōiny nuā.

²³Yē yīö ngaich keuheūten ahetlö e, ngaich kētö kōiny nuā yī-ö min tötvahav alaha hĕng nòng kōiny sīṅp inrē tötvahav alaha aṅ i nup tömūl.

²⁴Kētö u min yī-ö i kūö ngam Mā Tēv, ngaich yip kūönṙô min nö piṙōnglö sāl nö in u ngaich kētö u nö töföngö nö tökētu im Mā Tēv.

²⁵Sat sumkam rô-òten min yī-ö kaheuk sakāmö öi meukten tökētu hĕng nòng kōiny pököre tökētu kūö tökööl; hĕng nòng inrē kōiny sīṅp aṅ i nup tömūl, tötvahav alaha, tömeuktuṙen min.

²⁶Sat sumkam cha-a min nö vī inlām tökööl ngam tahāklö ahetlö e inrē ngaich nö ahetlö e.

²⁷Ngaich hē cha nö keuheūten tö në sakāmö, ngaich löktökūö im hinëvhöre sakāmö nö iṙūöhen yip kūönṙô min nö kētö tökētu tö yīö nup töföngö tökētu tö yīö nö el ngam tahāklö nuk kūö lanāmö tī yīö inrē tökētu; ngaich hō-otī chū-ö min, ṙô ngam Mā Tēv.