Read Car_Nicobarese ISIKĪ-ĔL 44 Bible Online

ISIKĪ-ĔL 44 - Car_Nicobarese bible

ISIKĪ-ĔL 44

¹Ngaich hēk anga-aṅ nö kēten chu nö ik lā uk inkūp kūö talöökö ök töhet chūök, ök tökū-ötö lā chuhöt; öphakkūö angū-ö.

²Ngaich ngö ṙô anga-aṅ tö chu, Höngngöh ön min ngih inkūp kūö talöökö nöng öphakkūö; hö-ö ön min nö löpnyukūö, ane inrē öt hĕng tak min kumhēt hötrr nö lökhöt in e; pò ngam Mā Tēv, ngam Tēv Israel, nö lökhöt in e nö kuhēthötre; lökten e nöng ngöh min nö öphakkūö.

³Höng öp kūön rācha tökô-òren nö ūichhak nö in e nö nyā rôti nö i kūö ngam Mā Tēv; kuhēthötre min anga-aṅ nö lökhöt ip lökhöt ip inkup kūö talöökö, ngaich löknyö in e min nö kunyī-inyre nö el kahôyö.

⁴Ngaich anga-aṅ nö kēten chu nö ip talöökö ip lā kapā inkūp kūö talöökö lā kūö ngam tempöl; ngëich ngaich chū-ö, ngaich yĕh meuk, ök kanôlò ngam Mā Tēv nö töö-öltī tö ngam tempöl ngam Mā Tēv afukngöre chū-ö ngaich fāthak kūö.

⁵Ngaich ngö ṙô ngam Mā Tēv tö chu, Kūön tarik, mikahngen e takô, ngëichkö e tö minë mat meh holtö minë elnang meh inrē öm hang nup ṙô chu min vë-enynang meh tö inlahen nup inchöngten aṅ im tempöl ngam Mā Tēv nup chöngö e inrē; kô-òtī mikahngen cha kuhēthötre nö el ngam tempöl ṙòkhöre inrē cha-a yip töha-uk-nyu nö ṙā-ang im töhet chūök.

⁶Ngö ṙô inrē tö ngam ma-ahôngen patī, ngam patī Israel, Ngö ṙô an ngam Mā Tēv: ō patī Israel, keuheūten nun yēḵ minë sin-òkkūö in meh,

⁷Ngam inlönghöt aṅ tahëng panam, töttunyīnyi ellōn alaha inrē, nö el ngam töhet chūök chu, nö hachōichngö e, hē meh kētö nyā-aṅkūö chu, tö tösangöö mahām inrē. Ngaich man falalöti tö ngam kinlēḵngô chu nö holre tö nup in meh sin-òkkūö.

⁸Ngaich rö-ö me-eṅ hayōm minë töhet chehen chu; ngaich pöri me-eṅ ṙātö aṅ tahëng panam nö hayōm ngam töhet chūök chu.

⁹Lökten an ngam Mā Tēv nö ngö ṙô: Öt aṅ tahëng panam, töttunyīnyi ellōn alaha inrē, aṅ in yip aṅ tahëng panam yip mī-iyöng nö in yip tarik Isreal, nö kuhēthötre min nö el ngam töhet chūök chu.

¹⁰Höng yip Lēvī pöri yip kumröönngöre nö marôvat tö chu, kiröönngöre nö lō-ongkūö nö ṙāngen chu nö tömrit insātēv re hē Israel nö lō-ongkūö nö kiröönngöre, keun sācha re min cha-a.

¹¹Cha-a yip min makeukṙen nö el ngam töhet chūök chu, memeukkö minë inkūp kūö talöökö ngam tempöl, la-evṙen inrē nö el ngam tempöl; ṙātnyö likeun töföngö tökētu cha-a min tökētu inrē pòkūö yip tarik, nö meukṙen cha.

¹²Pò cha nö meukṙen nö i kūö nup insātēv cha ngaich vītöre nö kinvē-ĕre nö i ötlanöökö nö im patī Israel, lökten chin chūöku ṙô in cha, ṙô ngam Mā Tēv, tö cha min nö keun sācha re.

¹³Hö-ö yip min nö haröhtöre nö in chu, nö sā la-en kūönṙô nö in chu, öt rēhĕn nö haröhtöre nö i nup töng het chehen i nup chehen inrē tölngö töhet; keun sumrōngkūöre pöri min cha-a, kūö nup sin-òkkūö kahëken cha.

¹⁴Sön min chū-ö vīlen cha nö hayōm ngam tempöl, la-evṙen tö nup la-en e, nup taṙòkhöre töhòn kēkaṙen ël e.

¹⁵Yip kūönṙô pöri lamökngörit Lēvi, yip kikōnyö kūön Sētòk, yip mahayōm ngam töhet chūök chu hē yip tarik Israel nö kiröönngöre nö lō-ongkūö nö ṙāngen chu, yihtöre min nö haröhtöre nö in chu nö meukṙen chu; meukṙen chu inrē cha-a nö kētö tökētu nö in chu tö tösangöö mahām inrē, ṙô ngam Mā Tēv;

¹⁶Kuhēthötre cha-a min nö el ngam töhet chūök chu, yihtöre cha-a min inrē nö im mīs chu, nö meukṙen chu ngaich cha-a min inrē nö hayōmö chu.

¹⁷Hē cha nö kuhēthötre nö i nup inkūp kūö talöökö ngam lā tuhēt elmilūkö, hayūtöre cha-a min tö līnen hilā; öt aṅhaṅv alaha cha-a min tö sanôi sīṅp, i saha cha nö meukṙen nö im inkūp kūö talöökö ngam lā tuhēt elmilūkö, la-ël inrē.

¹⁸Līnen hilā min nup vanön kui cha nö kui cha, līnen hīlā inrē nup töngën inyut kalröön nö i ṙat cha; öt hamöp ṙatre cha-a min tö töfötnyi vang kūö.

¹⁹Ngaich yē cha nö kunyī-inyre nö lā uk nö ël öp lā uk elmilūkö nö in yip tarik, ngaich cha-a nö luhngö nup inyut re nup mī-in cha nö meukṙen, ngaich ṙātö u nö el nup tökiröng töhet urôhò; hayutlöre inrē cha-a tö tahëng inyut hòn öt kētö ngam hanëtö nö in yip tarik, aṅmat nup inyut cha.

²⁰Hö-ö yip min nö kuhākngö kui re hēk öt halönglen keūyöre nö sīöp nö marôlòng; höng kamöpngö keūyö kui re cha-a.

²¹Öt hĕng tak kūönṙô min amòk tökalēḵ vāin, hē ò nö kuhēthötre nö el ngam lātuhēt elmilūkö.

²²Ötkô cha-a nö pīhö tö taföisi, hēk inrē mayū kikānö, höng öp rēlö pöri lamökngörit patī Israel, hēk inrē öp tafīösī kūönṙô.

²³Haköptö yip tarik chu min cha-a tö inrīkngöre töhet tö töng ha-eh, hameukhö mat cha inrē nö akah ngam töthet tö ngam töhet.

²⁴I linā-alkūö cha-a min nö akah fālen, ngaich cha-a min nö akah fālen sā ngam inkha fālen aṅ-in chu. Haköp nup chöngö chu min cha-a nup inchöngten inrē aṅ in chu i nuk töhalēnlöng tökiröng nyinā-aṅ, haköp nuk anôilö chu min cha-a nö töhet.

²⁵Öt hachōichngöre min cha-a nö haröhtöre nö i tarik tökapah, höng i kikōnyö yöng pöri hēk inrē kikānyö yöng, i kikōnyö kūön hēk kikānö kūön i mëm kahëm hēk tötpīhövö kanānö cha-a nö kô-òren nö hachōichngöre.

²⁶Unôichrit ò ngaich nö chōich, kaheuk tösat sumkam min anga-aṅ, ngaich möl anga-aṅ min nö het.

²⁷Ip sakāmö hē ò nö chuh el ngam töhet chūök, ël ap lātuhēt elmilūkö, nö meukṙen nö el ngam töhet chūök, kētö tökētu min anga-aṅ kūö tökööl ò, ṙô ngam Mā Tēv.

²⁸Hö-ö cha-a min nö amīnu; chū-ö chin amin cha; uh yī-ö kē-ĕkūö cha tö amin cha i Israel; chū-ö chin amin cha.

²⁹Nyā tökētu yin min sāiny, tökētu kūö tökööl, tökētu inrē kūö fālen; ṙòkhöre nup töhakösi chehen in Israel nö amin cha min.

³⁰Urĕh nup lanôhlòng chōn tökeuheūttöre mihënṙö, tökētu inrē aṅ i nup tökeuheūttöre mihëṅṙö tökētu, lumnööṙö yip kūöṅṙô anū-ö; kē-ĕkūö yip kūönṙô me-eṅ inrē min töp raneh in meh tökaṙôta atra, hòṅ öp inkôlò nö ngöh nö i kui patī meh.

³¹Ötkô yin vē kūön ṙô nö kāḵ yô-òv min Yĕn chehechōn, hēk yĕn töṙeūla öp kamahngenre nö kapah hēk tökāpö.