Read Car_Nicobarese ISIKĪ-ĔL 46 Bible Online

ISIKĪ-ĔL 46 - Car_Nicobarese bible

ISIKĪ-ĔL 46

¹Ngö ṙô an ngam Mā Tēv: Öp inkūp kūö talöökö ngam lātuhēt elmilūkö tökū-ötö lā chuhöt min nö öpikūö i nup tö tafūöl sakāmö hē la-en; ip anôilö pöri sakāmö angū-ö min nö löpnyukūö ane inrē ip sakāmö ayöö chingëṅt angū-ö nö löpnyukūö.

²Kuhēthötre min öp kūön rācha nö lökhöt ip lökhöt inkūp kūö talöökö nö löktö lā elkahôyö, ngaich sökhaka anga-aṅ ip machööḵlö inkūp kūö talöökö. Ngaich yip kūönṙô min nö kētö töföngö kahëtöre öp kūö lanāmö inrē kahëtö ò, ngaich anga-aṅ min inrē nö salām nö el chūök pinṙōngö sāiny im inkūp kūö talöökö. Kunyī-inyre ngaich anga-aṅ mn, hö-ö pöri min ngam inkūp nö öpikūö hanöng saha öp harap.

³Yip tarik aṅ ngam panam min nö salām im lökhöt ngam inkūp kūö talöökö nö i kūö ngam Mā Tēv, hē nup anôilö el ayöö chingëṅt inrē.

⁴Nup töföngö tökētu nö im Mā Tēv tö ngam kūön rācha hē el anôilö sakāmö min nö tafūöl nòng kūön sīṅp tö tāli töt vahav alaha hĕng nòng kūön sīṅp inrē töt tāli töt vavah alaha;

⁵Sāiny inrē tökētu hol ngam kūön sīṅp min töt tāli nö hĕng efā, öp sāiny inrē tökētu nö hol minë kūön sīṅp tötāli min nöng sā ṙôken kanô-òṅ ò, nö holre tö töhĕng hin tavī-i töhĕng efā.

⁶Ip sakāmö öp ayöö chingëṅt anga-aṅ min nö kētö tökētu hĕng nòng kōiny nuā tötvahav alaha, tafūöl nòng inrē tötāli kūön sīṅp hĕng nòng töttāli kūön sīṅp inrē, nup tötvahav alaha;

⁷Hĕng efā maheuṅkten anga-aṅ min tö tökētu sāīny hol ngam kōiny nuā hĕng efā inrē hol ngam tö tāli kūön sīṅp ngaich iṙôken kanô-òṅ ò nup hol nup tötāli kūön sīṅp, nö holre tö tavī-I hĕng hin i töhĕng efā,

⁸Hē ngam kūön rācha nö kuhēthötre, lökhöt im lökhöt min anga-aṅ im inkūp talöökö, kunyī-inyre inrē nöng hĕngre talöökö.

⁹Yē yip tarik ngam panam nö yih nö i kūö ngam Mā Tēv i nup töhalēnlöng tökiröng nyinā-aṅ, anga-aṅ öp kumhēthötre nö lökhöt im lā kapā inkūp talöökö nö salām kunyī-inyre anga-aṅ min nö löknyö im lā lòhngö inkūp kūö talöökö; anga-aṅ inrē öp kumhēthötre nö lökhöt im lā lòhngö inkūp kūö talöökö min nö kunyī-inyre nö löknyö im lā kapā inkūp kūö talöökö; öt hĕng tak min mahavan talöökö nö im inkūp kūö talöökö ngam lökhöt ò sin nö kuhēthötre, kö kunyī-inyre pöri min nö hachip kū-öre.

¹⁰Yē cha nö kuhēthötre, hol cha min öp kūön rācha nö kuhēthötre; yē cha inrē nö kunyī-inyre,

¹¹I nup tö kiröng nyinā-aṅ i nup töhālēnlöng hē inrē öp sāiny tökētu nö hol ngam kūön nuā min nö hĕng efā, hĕng efā inrē hol öp kūön sīṅp töt tāli, hol nup tötāli inrē kūön sīṅp ip tölngö kanô-òṅ öp töhĕng tak nö kē-ĕti, holre töp töhĕng hin tavī-i i töhĕng efā.

¹²Yē öp kūön rācha nö meukten kanahanglōn tökētu, kömayēḵ-ĕ tö töföngö tökētu hēk inrē inlāmtökētu nö sā kanahanglōn tökētu nö I ngam Mā Tēv, ngaich ngam inkūp kūö talöökö tökū-ötö lā chuhöt min nö luvëyukūö nö lökhöt ò; ngaich aṅga-aṅ min nö kētö töföngö tökētu hēk inrē inlām tökētu nö sā ò ṙung el anôilö sakāmö. Kunyī-inyre min ngaich anga-aṅ, ngaich yē ò nö ngaich nö el kahôyö öpikūö ngaich min ngam inkūp kūö talöökö.

¹³Hĕng nòng maheuṅkten min anga-aṅ tö tötāli kūön sīṅp töhĕng höiny samyeūheu ṙēti tötvahav alaha nö töföngö tökētu i ngam Mā Tēv nö kaheuk sakāmö; kaheuk peuheū anga-aṅ min nö meukten ò.

¹⁴Meukten sāiny tö kētu min anga-aṅ inrē nö hol ò nö kaheuk peuhēu, hĕng i tötafūöl tit öp töhĕng efā, hĕng inrē i tölūöi tit töheng hin tavī-i nö innyôp ngam atra, nö sā sāiny tökētu nö im Mā Tēv; angū-ö an chöngö ip tötheumköre töföngö tökētuvö.

¹⁵Ngati mineukten min öp kūön sīṅp tötāli töp nyā-aṅ tökētu töp tavī-i inrē, nö kaheuk peuheū, nö tötheumka nö töföngö tökētu.

¹⁶Ngö ṙô an ngam Mā Tēv: Yē öp kūön rācha nö kētö inlōnti nö ṙā-ang i nup amin ò nö i nup amin ò nö i yip kūön re kikōnyö, ngaich mikahlōn yip kikōnyö kūön ò angū-ö min, inlānen cha angū-ö nö amin cha.

¹⁷Yē ò pöri nö kētö inlōnti tö aṅ ip amin ò ip töhĕng tak aṅ i yip mahalanṙen ò, ngaich mikahlōn ò angū-ö min söl ip samyeūheu ṙinānyö ò, ngaich havan angū-ö min nö ip kūön rācha; höng yip kūön ò kikōnyö tököpen tö inlōntöre tö aṅ i amin ò.

¹⁸Ötkô an ngam kūön rācha min nö hēngö kahëḵ tö amin yip tarik, nö kuringngen cha nö ṙā-ang ip inlīnen cha; kē-ĕkūö yip kikōnyö kūön re min anga-aṅ tö aṅ in öp amin ò, hòn öt hĕng tak vē tarik chu min tökē-ĕyö nö i inlānen ò.

¹⁹Ngaich anga-aṅ nö kēten chu nö lökhöt öp lökhöt, öp i kaha öp inkūp kūö talöökö, ip lā kapā töökö nup töhet tökiröng urôhò yip kūönṙô: ngaich umuh chū-ö meuk öp töhĕng chūök ip manā-angkūö u nö lā sūng.

²⁰Ngö ṙô ngaich agna-aṅ tö chu, Angū-ö ön ngih chūök yip kūönṙô min nö sum tökētu kūö fālen, tökētu inrē kūö tökööl, chūök cha min inrē nö kahul sāiny tökētu, pòn sōtu nö kētu anū-ö nö el öp elkahôyö elmilūkö ngaich ngam hanëtö min nö öt teungtöre nö i tarik.

²¹Ngaich kēnyen chu anga-aṅ el öp lā uk elmilūkö, hachō-o chu ngaich i nup töfën sinkeukngö ngam elmilūkö hĕng ök umuh elmilūkö.

²²I minë töfën sinkeukngö ngam elmilūkö nuk tökūöṅnö elmilūkö, fën anāi sumkôngö ṙôkti, höng hĕngren ṙôkö minë töfën.

²³Lā ël, vinngö nuk töfën elmilūkö ök mitöökö uk tökatöplöng ihong holtö tisum tövī-i nö lā taṙeū töökhaka nö vinngö.

²⁴Ngö ṙô anga-aṅ tö chu, Chūök kamhul nun në chūök yip mameukṙen ngam tempöl min nö sum nup tökētu tö yip tarik.