Read Car_Nicobarese ISIKĪ-ĔL 47 Bible Online

ISIKĪ-ĔL 47 - Car_Nicobarese bible

ISIKĪ-ĔL 47

¹Ngaich hēk agna-aṅ nö havanten chu nö ik inkūp ök tempöl; ngaich yĕh meuk, hëmnyi ök mak nö löknyö lātaṙeū tök fanôhòl röön el ök tempöl lā chuhöt (pò ök tempöl nö kū-ötö lā chuhöt), ngaich ök mak nö hëm taṙeū nö löknyö lataṙeū tök lā lòhngö manā-angkūö ök fanôhòl röön ök tempöl, lā lòhngö tök tahāklö.

²Ngaich kēnyen chu anga-aṅ elkahôyö löknyö ik lā kapā inkūp kūö talöökö, ngaich hachō-o chu havīngöre lā uk ip lā uk inkūp kūö talöökö öp tökūötö lā chuhöt; meutnyi inrē öp mak nö ip lā lòhngö kaha.

³Iṙūhö röön kū-ötö lā chuhöt nö aṅ eltī tö tökuhava, ök tarik nö kalah rôta töhĕng köṅny sumkôngö, ngaich hachō-o chu lök el öp mak; i linkölngö ṙū-uti angū-ö.

⁴Hēk anga-aṅ nö kalah töhĕng köṅny, ngaich hachō-o chu lök el ök mak; ngaich angū-ö nö i kinmônö ṙū-uti. Hēk anga-aṅ nö kalah töhĕng köṅny, ngaich hachō-o chu lök el ök mak; ngaich angū-ö nö söllö nö i ṙat.

⁵Hēk anga-aṅ nö kalah töhĕng köṅny, ngaich angū-ö nö tahël lökten chu ötkô havāngngöre, pò ngam mak nö taṙēchlöng; yanööṙen angū-ö töṙū-utire, tahël töt hanvāngngen nö ngaich.

⁶Ngaich ngö ṙô anga-aṅ tö chu, Kūön tarik, meūkö e ömeh? Ngaich anga-aṅ nö hachō-o chu havan lök kui öp tahël.

⁷Hē chu havan, ngaich chū-ö meuk tö-pōyen chōn i kui ngam tahël ik töhĕng lā kaha e ik tahëng lā inrē.

⁸Ngaich ngö ṙô anga-aṅ tö chu, Hëm ön ngih mak nö kū-ötö lā chuhöt ngaich chu i Arapā; ngaich hē e nö hëmti nö el nup mak mai töthëm vītöre min ngam mak nö töt haṙeihu.

⁹Ngaich ip töng kū-ö ngam tahël nö kiröönngöre ṙòkhöre min nup tö-aṅ nup töpōyen nö aṅ, ngaich min nup kāḵ nö pōyen nö umuh; pò ngih mak nö chuh umuh, pòn hōtu nup mak ngam mai nö vīngöre nö öt haṙeihu; ngaich lökten min nup taṙòkhöre nö aṅ ip töng kū-ö ngam tahël nö kiröönngöre.

¹⁰Sökhak min yip kamë kāḵ nö ranghö ngam mai; löktökūö Ēnkēti söl Ēneklem min angū-ö nö chūök innyāknyö inhāṅl; töṙōlkangen nup min kāḵ ël e, sā nup kāḵ el ngam Tökiröng Mai.

¹¹Nup silāng e pöri tö nup mak silāng nö öt vīngöre nö öt haṙeihu; töhökiṙen anū-ö nö sāl.

¹²Ngaich i kui ngam tahël, ānngöre lā-a sīöp min nup chōn nyā-aṅkūö nö keuheūttöre mihëṅṙö. Ötnyangngö min nup ṙōi u öt ṙēhĕn nö teukköre ṙòng u, kaheuk chingëṅt pöri min anū-ö nö ṙôngu, pò ngam mak u nö hëmnyi nö löktö ël ngam töhet chūök. Nyā-aṅkūö nup min ṙòng u, lanë-en inrē nup rōi u.

¹³Ngö ṙô an ngam Mā Tēv: Anū-ö nun në kūöngö talöökö tī meh michööḵ ngam panam nö amin yip tönët sīön miyöngö Israel. Nëtö minchööḵö min Yôsĕf.

¹⁴Ngaich me-eṅ min haṙong ṙôkö tīre michööḵöng e; chūökuṙô chin kētö e in yip muvöhngö yīö, ngaich ngih panam min nö fuk in meh nö amin meh.

¹⁵Ngih ön min kūöngö ngam panam: Lā kapā, löktö kūö ngam Tökiröng Mai lök i Hetlòn söl i lökhöt i Hamat, iṙūöhöng röön söl Sētat,

¹⁶Perōtah, Sīprēm (öp töteuthaka i kuö panam ihôi Tamaskös tö Hamat inrē), i rôvat Hasārhatikön, ap i kūöngö Hauran.

¹⁷Lökten min ngam kūöngö panam nö löktökūö ngam mai söl Hasārenòn, öp lā kapā kūöngö Tamāskös, nö holtö ngam kūöngö Hamat nö lā kapā. Angū-ö ön ngih min lamā kapā.

¹⁸Lā chuhöt, ngam kūöngö panam min tö löktökūö Hasārenòn ihôi Hauran tö Tamaskös; lök Yôtan ihôi Kilīöt tö panam Israel; söl lā chuhöt im mai sölngö inrē nö i Tamār. Angū-ö ön min ngih lamā chuhöt.

¹⁹Lā lòhngö, angū-ö min nö löktökūö Tamār i tölngö nup mak Meripatkatĕs, ngaich löktökūö in e lök ip Kun Mak Aikup söl im Tökiröng Mai. Angū-ö ön min ngih lamā lòhngö.

²⁰Lā sūng, ngam Tökiröng Mai min nö kūöngö nö söl ip kamngö lökhöt i Hamat. Angū-ö ön min ngih lamā sūng.

²¹Ngatī tī min me-eṅ michööḵ ngih panam in yīö sā tum miyöngö Israel.

²²Michöngö e me-eṅ nö amin yīö yip aṅ tahëng inrē mī-iyöng nö in yīö yip kamhyôḵnyö kūön re nö in yīö. Ngaich acha-a min nö sā tökayôḵnyu nö kūön Israel holkūö yīö cha-a min nö michööḵö tö amin in yip miyöngö Israĕl.

²³Ip töng miyöngö aṅ tahëng nö iyöng michööḵtö amin ò min me-eṅ umuh, ṙô ngam Mā Tēv.