Read Car_Nicobarese ISIKĪ-ĔL 5 Bible Online

ISIKĪ-ĔL 5 - Car_Nicobarese bible

ISIKĪ-ĔL 5

¹Me-eṅ Ō kūön tarik, hĕng nòng kahë man tö tökeut sanët; kēken ò pömchö nö kunhāk ngaich kuhāktö kūö ò nö i kui meh i sanôi samā meh inrē; ngaich michööḵngö nup keūyö.

²Föngngö nup linūöyö milā-a me-eṅ i kūö tameūyö ellōn ngam elpanam, yĕn keuheūten nup sakāmö kinyīngö; ane inrē öp linūöyö lā-a kēḵ e me-eṅ fāngö e tö ngam sanët havī ngam elpanam; ngam linūöyö milā-a inrē tuingö u me-eṅ el kuföt, ngaich chū-ö min hōknyö ngam sanët unôichrit u.

³Ngaich me-eṅ min rahëchyen kahë in u, ngaich nyëktö u i kinhôi ngam tökiröng inyut meh.

⁴In u me-eṅ inrē hēk rahëchyen kahë, ngaich tuihöt u i kūö tameūyö föngngö u inrē I kūö tameūyö; löktökūö in e min ngaich öp tameūyö nö yih nö i nup patī Israel.

⁵Ngö ṙô An ngam Mā Tēv: Yērusalem ön ngih; ṙāten e chin ngaich nö ellōn pumnāmö tarik, nö havīlö e nup panam.

⁶Ngaich an nö i öt lanöököre nö ahôngen chöngö chu mötlö tö vē pumnāmö tarik, ane inrē lā-al në tökūichiyö chöngö chu mötlö tö në panam mahavīlen e, i sinô-òṅ në chöngö chu ötlinöökö në tökūichiyö chöngö chu inrē.

⁷Lökten an ngam Mā Tēv nöngö ṙô: Pò meh mötlö inlöinyköre tö vē pumnāmö tarik vē mahavīlen meh, ngaich rö-ö inrē lök i në tökūichiyö chöngö chu hēk öt köp tö në hachöngten chu, ngaich pöri öm höng sā inlahen inchöngten vē pumnāmö tarik mahavīlen meh;

⁸Lökten an ngam Mā Tēv nö ngö ṙô: Yĕh meuk, chū-ö takô chin lā-al meh; ellōn meh chin min akah fālen i kūö vē pumnāmö tarik.

⁹Ngaich kūö nup sin-òkkūö aṅ in meh öich tī-ivö min in meh tö tötha-eh nö tī chu misī, öt sā u tī chin min inrē hēk.

¹⁰Lökten yip kikōnyö yöng min nö kā yip kūön re kikōnyö nö el ṙôngö yīö, yip kikōnyö nyīö min inrē nö kā yip yöng re kikōnyö; ngaich chū-ö min inrē akah fālen in yīö, in yip in yīö inrē tö-aṅ pirāti min tö chu nö el në kuföt.

¹¹Lökten, sā chu tö-aṅ, ṙô ngam Mā Tēv, kô-en, pò yīö hachōichngö ngam töhet chūök chu öi aṅtī tö nup tösō-ov aṅ in yīö tö nup aṅ in yīö sin-òkkūö inrē, lökten chin min kūölten yīö; öt aṙē-ĕl ön min ngih mat chu, hö-ö chū-ö min inrē aṙē-ĕlōn.

¹²Kapah yin min i tölëlngökūö invah öp linūöyö milā-a yīö ngaich keuheūtngörevah tökūö inyāichö nö el ṙôngö yiö; fukngö min tökūö sanët öp linūöi milā-a yīö nö havīlen yīö, pirāti min inrē nö el kuföt öp linūöi milā-a yīö ngaich unôichrit u ngam sanët min nö hōknyu.

¹³Ngatī kinheūtngö ngam tanānyö chu min, i kui cha chin min hakeungnyö inngëṅṙöre öich hakô-ònglōnre; ngaich cha-a min nö akahalōn tö chu, Mā Tēv öich ṙô-òv ngaich i lanīnöre, yē ngam inngëṅṙö chu nö fuk i kui cha.

¹⁴Hēk inrē chū-ö min öich vīten meh töṙā-aiṙen tömeūkiyö minṙēngö in vē pumnāmö tarik mahavīlen meh i mat yip taṙòkhöre chamööḵöng muh.

¹⁵Minṙēngö ṙô nāichngen inrē töhatūiyu nö ṙô vanööṙö inrē, in vē pumnāmö tarik mahavīlen meh, hē chu min akah fālen in meh i tānānyö inngëṅṙö inrē, holtö manā-any chinökṙen inrē Chū-ö chin, Mā Tēv, töṙô-òvö.

¹⁶Yē chu öich lirenynyö kūö minë chòk ngam inyāichö tökapahukūö nö in meh, chòk fanëlngö, nup lirenynyö chu min finëlngö meh, ngaich hē chu inrē hēkö kūöre kēten ngam inyāichö nö i kui meh, ngaich likölngö ngam kaneun rôtī meh.

¹⁷Tīntö inyāichö chin min nup tötainy aṅ el inchōn inrē nö in meh, ngaich anū-ö min nö ulāingen yip kūön yiö; tölëlngökūö invah mahām inrē min nö lök in yīö; ngaich chū-ö min kēten ngam sanët nö i kui yīö. Chū-ö chin, Mā Tēv töṙô-òvö.