Read Car_Nicobarese ISIKĪ-ĔL 6 Bible Online

ISIKĪ-ĔL 6 - Car_Nicobarese bible

ISIKĪ-ĔL 6

¹Yih ngam ṙô ngam Mā Tēv nö in chu;

²Kūön tarik, havöötökūöre man kū-ötö minë ṙôngö Israel, vë-eny mu-unôich inrē in u,

³Ngö ṙô,Yī-ö rôngö Israel, hang ṙô ngam Mā Tēv! Ngö ṙô An ngam Mā Tēv tö minë rôngö töminë rung inrē, tö minë kun löktö mak achāṙö inrē: Yĕh meuk, chū-ö chin min kamë öp sanët i kui yīö, tiṙōlngö minë tömarô-òlchūök chin min in yīö.

⁴Minë tahāklö yīö vītöre min nö tötaṅhāṅvkūö, nup tahāklö tötahūsa yīö inrē min nö liköliyö; ngaich chū-ö min inrē kavaltö yip töfëli aṅ in yīö nö i kūö nup insā tēv yīö.

⁵Haṙōlngö nup alaha yip tökapah chin min tarik Israel i kūö nup insā tēv chu: pirātngö nup tangëḵ yīö chin min inrē nö havīlö nup tahāklö yīö.

⁶Ip töng chūök yīö iyöng ngaich nup elpanam yīö min nö tötaṅhavkūö ane inrē nup lātulöng chūök yīö nö chahömiyö, lökten nup tahāklö yīö min nö-öt aṅhavkūö chahömiyö inrē, laköl nup min insā tēv yīö nö piyāyiyö inrē, kūöltu nup tahāklö tötahūsa yīö, chūtiyö inrē nup la-en yīö.

⁷Fuk elṙôngö yīö min yip tö fëliyö ngaich yī-ö min akahalōn tö chu öich Mā Tēv.

⁸Sön min chū-ö ṙātö yip rīkre aṅ in yīö nö aṅ. Yē yīö in vē pumnāmö tarik öi rīkre tötkô-òngvah tökūö sanët, yē yīö inrē parātiyö i në panam,

⁹Ngaich yip in yīö min töt kô-òngvah in vē pumnāmö tarik nö fē-ĕlre tö chu ip chūök cha nö kē-ĕyö nö hakövö, yē chu min likölngö nup tötmikūöṙen ellōn cha nup ṙāmāngen chu nö ngaich, ngaich meūichngö mat re nö hutölhangen nö tömrit nup insā tēv cha; ngaich cha-a min nöng sa-òkkūö töre nöng kahngenre tökūö nup tötlöök kahëken cha, kūö nuk sin-òkkūö in cha.

¹⁰Ngaich cha-a min nö akahalōn tö chu öich Mā Tēv; hö-ö chin höng tötöl ṙô-òv töchu min tī tö në tötlöök in cha.

¹¹Ngö ṙô an ngam Mā Tēv: Fatāk eltī re yin, tirung röönre inrē, ngö ṙô, Aōla! Kūö nup taṙòkhöre tötlöök sin-òkkūö aṅ patī Israel; pò cha min nö fukngö tökūö sanët, kūö inyāichö, kūö invah inrē tölëlngökūö.

¹²Anga-aṅ öp tömarôvat min kapah kūö tölëlngökūö invah; anga-aṅ öp töröhta min fukngö tökūö sanët; anga-aṅ öp tö-ōtre öp tölākiṙen kapah min tökūö inyāichö. Ngatī tī chin min keuheūtngö ngam inngëṅṙöre i kui cha.

¹³Ngaich yī-ö min akahalōn tö chu öich Mā Tēv, yē yip töfëli aṅ in cha nö hulalhaka i nup insātēv cha nö havīlö nup tahāklö cha, kö i kui tömarô-òl kui rung, i kui nup rôngö, elkatòh tö-ayālö rōi chōn, elkatòh törōyu ōk inrē, ip töng chūök cha nö kētö tötahūsa nö I nup insā tēv cha.

¹⁴Ngaich chū-ö min hateutnyö ngam këlre lā-al cha, vīten ngam panam inrē nö töt aṅhavkūö töṙā-ai inrē, keuheūtngöre nup elyöngö cha, löktökūö el inchōn söl Riplā. Möl min cha-a nö akahalōn tö chu öich Mā Tēv.