Read Car_Nicobarese ISIKĪ-ĔL 7 Bible Online

ISIKĪ-ĔL 7 - Car_Nicobarese bible

ISIKĪ-ĔL 7

¹Yih ngam ṙô ngam Mā Tēv nö in chu:

²Me-eṅ, Ō Kūön tarik, ngö ṙô an ngam Mā Tēv ngam panam Israel: Manāngen! Yih an ngam manāngen nö i kui në töfën sinkeukngö ngam panam.

³I kui meh an töngamuh ngam manāngen, ngaich chin min luhlö ngam tanānyö re nö i kui meh, akah fālen meh inrē sā nup talöökö meh; sācha tī chin min inrē tö meh tökūö nup sin-òkkūö in meh.

⁴Hö-ö ön inrē ngih mat chu nö ṙālen meh, ötrēhĕn chū-ö min aṙē-ĕlōn; sācha tī pöri min tö meh tökūö në talöökö meh, irô-òten minë sin-òkkūö in meh nö kamlö nö ellōn meh. Ngaich akahalōn min me-eṅ tö chu öich Mā Tēv.

⁵Ngö ṙô an ngam Mā Tēv: Ötkanôlò tömörit tö ötkanôlò! Yĕh meuk, yin an.

⁶Yih an ngam manāngen, ngaich an nö yih ngam manānge; aṅhen an nö ngaich nö lā-al meh. Yĕh meuk, yih an.

⁷Yih an ngam nganaichngen meh nö in meh, Ō Me-eṅ aṅ ngam panam; yih an ngam ṙētak, röhta an ngam sakāmö, sakāmö tinṙōlen, öt ṙënṙô töṙāmölōn nö i kui nup rôngö.

⁸Ngaich chin töngamuh ka-eūyen hōngtö öp lanīnöre i kui meh, ane inrē keuheūtnyö ngam tanānyö re in meh, akah fālen meh inrē sā nuk talöökö meh; sācha tī chin min tö meh tökūö nup sin-òkkūö in meh.

⁹Hö-ö ön ngih mat chu min nö ṙālen meh, ötrēhĕn chū-ö min aṙē-ĕlōn; sācha tī chin min tö meh sā nup talöökö meh, i saha nup sin-òkkūö in meh nö rònglö nö ellōn meh. Ngaich akahalōn min me-eṅ tö chu öich Mā Tēv, öich famòh.

¹⁰Yĕh meuk, ngam sakāmö! Yĕh meuk, yih an! YIh an ngam nganaichngen meh, pöpnyörekūö an ngam tötṙong inkaha fālen, môlnyi ngam inkeūlen.

¹¹Sīöplö an ngam chanökhuṙen nö tinkung ötlanöökö; öt hĕng tak min tö cha tö-ōtren ötrēhĕn töpōyen in cha ötrēhĕn kanôlò cha; ötrēhĕn min umuh tökiröngö minā-aṅ nö in cha.

¹²Ngaich an ngam ṙētak nö yih röhta an ngam sakāmö nö ngaich. Un kuchīkölōn ngam mahavah, un rēhĕn ngam mi-inyīhah nö haṙīvölōn, tön lanīnö ap i kui cha nö maṙôngö.

¹³Pò ap mi-inyīha min nö öthavan tö tö-inyīhihyö tö ò, i saha cha nö aṅ. Pòn lanīnö öp i kui cha nö maṙôngö; öt havanritre ap min nö hēk; nö kūö öt lanöökö ò, öt hĕng tak tökô mahaköp inlahare.

¹⁴Ngaich yip nö föö römpĕt lēnö tī inrē tö taṙòkhöre; öthĕng tak pöri chamuh im kinyūngö, pò ngam lanīnö chu nö i kui cha nö maṙôngö.

¹⁵El kahôyö ap sanët, la-ël invah tölëlngökūö inyāichö inrē; anga-aṅ öp el kahôiṙen kapah tökūö sanët; anga-aṅ inrē öp elpanam keuheūtngöre tökūö inyāichö tölëlngökūö invah inrē.

¹⁶Ngaich yip tötkô-òngvah tö aṅ, i kui minë rôngö min cha-a, sā nyö-öṅ el achāṙö, ṙòkhöre min cha-a nö aluhure nö kö kūö nup fālenre.

¹⁷Ṙòkhöre nup kël nö ötkalē-en, ṙòkhöre inrē kui kinmônö nö ötkalē-en sā mak.

¹⁸Kafānöre yip tö sāk, kahūmöre inrē tö pinhë-eṅkūö; i kūö cha ap sumrōngkūö, el kui cha inrē nganāyö kui.

¹⁹Kavalngö rupīöre yip nö el talöökö, ngaich nup humlum cha nöng sā töthet nö ötkô nup rupīö cha tö nup humlum cha inrē nö ṙānyen cha ip sakāmö lanīnö ngam Mā Tēv; ötkô nup nö hatööḵngen kinpahare cha hēk hatööklö el tilkup cha tö u. Pò e nö kinvē-ĕ re cha nö i nup tökööl cha.

²⁰Nup tövai yanöṅtö cha hanyöṅtöre cha-a nö im tötöl kanôlò, ngaich cha-a inrē nö vī insā tēv nö sin-òkkūö nup sin-òkkūö inrē aṅ in ò; lökten chin min vīten e nö töthet chehen nö in cha.

²¹Ngaich chū-ö min kēten e nö eltī aṅ tahëng pumnāmö nö taneūngen cha, in yip tötlöök inrē aṅ ing tumlat nö kahil cha; hachōichi an min tö cha.

²²Havööngökūöre chin min tö cha, hòṅ cha min nö hachōichngö ngam tövai chūök chu; kuhēthötre yip min tötūmu nö hachōichngö e,

²³Piyāingö e inrē. Pò ngam panam nö tööḵlö tö mahām fālen tööḵlö inrē ngam elpanam tö chanökhuṙen,

²⁴Kētö yip manā-angkūö ötlanöökö chin min aṅ in yip pumnāmö tarik nö kē në patī nö amin re; keuheūtngen ngam tökalēḵ chin inkeūlen cha, minë töhet chūök cha inrē nö hachōichi.

²⁵Yĕn yih ngam miṙivlōn, ngaich cha-a min nö chöh lanāmö, hö-ö pöri min nö umuh.

²⁶Yihtöre ngam ötkanôlò nö i kui ngam ötkanôlò, kintūöyöṙô tömörit tö kintūöyöṙô; chöh öp tömeūkö cha-a nö in öp pròfĕt, ngaich pöri ngam chöngö nö hatngö nö ip kūönṙô, öp inlēnö inrē nö in yip mā.

²⁷Haṙīvölōn ngam rācha, kahūmö ngam kūön rācha tö ṙānā-anglōn, nup kël yip tarik inrē aṅ ngam panam nö lum kūö pihë-eṅkūö. Sā öp talöökö cha ngatī tī min chū-ö tö cha, sā ap inkaha fālen tö cha inrē ngatī chū-ö min akah fālen cha; ngaich akahalōn min cha-a tö chu öich Mā Tēv.