Read Car_Nicobarese ISIKĪ-ĔL 8 Bible Online

ISIKĪ-ĔL 8 - Car_Nicobarese bible

ISIKĪ-ĔL 8

¹Im tinfūölö samyeūheu, imtinfūölö chingëṅt, im tinneūyö sakāmö ngam chingëṅt, i saha chu uichhaka el patī re, holtö yip mā aṅ Yūtā ūichhaka nö i kūö chu, in e ngaich ngam kël ngam Mā Tēv nö i kui chu.

²Ngëicha chū-ö ngaich, ngaich, yĕh meuk, hĕng taka ök tösā minēukö tarik; lātaṙeū ök tösā mineūkö ṙat ò nöng tameūyö, lātulöng inrē tö ṙat ò nö sā mineūkö tö-ayānga, sā tö-amëla mās.

³Silôtö ök tösā kël anga-aṅ, ngaich kē keūyö elchalòng kui chu; ngaich ngam Töhet Fanöinylö nö chitlen chu ihôi ngam tumlat töm halīöngö, ngaich kēten chu öich meuk ngam Tēv i Yērusalem, i lökhöt kūö ök inkūp ök lātuhēt el milūkö tökū-ötö lā kapā, ik anūichö ök insātēv lanīnö, ök maharunyö lanīnö.

⁴Yĕh meuk, in e ngaich ngam kanôlò ngam Tēv Israel, sā ök tömeūkö maheuṅk chu im töṙā-akūö panam.

⁵Ngaich ngö ṙô anga-aṅ tö chu, Kūön tarik, môklö kūöre man töngamuh kū-ötö lā kapā. Môklökūöre chū-ö ngaich kū-ötö lā kapā, ngaich yĕh meuk, lā kapā öp inkūp ap tahaklö, i lökhöt ngòh insātēv lanīnö.

⁶Ngö ṙô ngaich anga-aṅ tö chu, Kūön tarik, meuk vahīṙen cha ömeh, tö ngam tökiröng sin-òkkūö kahëken ngam patī Israel nö ihih, nö ahōngen chu marôvat tö ngam töhet chūök chu? Hönlöre maheuṅk pöri min me-eṅ tö tökiröng sin-òkkūö.

⁷Ngaich anga-aṅ nö kēten chu ip inkup el milūkö; ngaich hē chu ngëicha, yĕh meuk, hĕng ap umuh manëngö ip kinlōngö.

⁸Ngaich ngö ṙô anga-aṅ tö chu, Kūön tarik, ul man i kaha ngam kinlōngö; ngaich hē chu ul i kaha ngam kinlōngö, yĕh meuk, hĕng ap inkūp umuh.

⁹Ngaich ngö ṙô anga-aṅ tö chu; Meuthöt man, ngëichkö nup tötlöök sin-òkkūö nup kahëken cha nö ihih.

¹⁰Lökten chu meuthöt ngaich meuk; ngaich umuh, i kaha öp kinlōngö nö vinngö kūichö insā, nup tökeuheūttöre mihëṅṙö lamāna chehen, tanòk elmat nö töṙeūla, ṙòkhöre nup insātēv aṅ patī Israel.

¹¹I kūö cha nö sökhaka yik tösat anāi tarik aṅ in yik mā aṅ patī Israel, holten tö Ya-āsania ök kikōnyö kūön Safān sökhaka nö in cha. Kö aṅhaṅv eltī tö chūök finöngö tötahūsa, ngaich ök lul töhahūsa taṙul nö chuh lātulöng.

¹²Ngaich ngö ṙô anga-aṅ tö chu, Kūön tarik, meuk la-en vē mā öm ngaich aṅ patī Israel nö el sinngūlö, Kö aṅhaṅv el urôhò yin tö insā? Pò cha nö ngö ṙô, Öt meūkö hī an ngam Mā Tēv ngaich an ngam Mā Tēv nö ṙāngö ngih panam.

¹³Ngö ṙô inrē anga-aṅ tö chu, hönlöre maheuṅk man min tö tökiröng sin-òkkūö nup kahëken cha.

¹⁴Ngaich anga-aṅ nö kēten chu i lökhöt öp lā kapā inkūp ngam patī ngam Mā Tēv; ngaich yĕh meuk, ūichhak yik kikānö nö peūnyö Tammus.

¹⁵Ngö ṙô ngaich anga-aṅ tö chu, Meuk ngih öm ngaich, Ō kūön tarik? Hönlöre maheuṅk man min tö tökiröng tö në sin-òkkūö.

¹⁶Ngaich kēten chu anga-aṅ el ap lātuhēt el milūkö ngam patī ngam Mā Tēv; ngaich yĕh meuk, ip inkūp ngam patī ngam Mā Tēv, ihôi öp nyatrit rittūi töp tahāklö, nö lohten nö nët anāi taneuitak yik tarik, nö havöötö ukre nö ik patī ngam Mā Tēv, kū-ötö lā chuhöt inrē nuk kūö cha, salām ngam tavūöi nö kū-ötö chuhöt.

¹⁷Ngaich ngö ṙô anga-aṅ tö chu, Ngaich öm meuk ngih, Ō kūön tarik? Töhöhövṙen öng nö im patī Yūtā ngam kinëken minë sin-òkkūö minë kahëken cha nö ihih, tö cha nö hatööḵlö ngam panam tö chanökhuṙen, nö ṙūölenre nö harunnyö tanānyö chu? Yĕh meuk, kalonghöt elmeh re yin tö ngam pak.

¹⁸Lökten chin min lök alaha cha i lanīnöre; öt ṙā-al ön min ngih mat chu, öt rēhĕn chū-ö min aṙē-ĕlōn; pòrô cha-a nö peuiny nö pōitô nö elnang chu, öt hang ṙô cha chū-ö min.