Read Car_Nicobarese ISIKĪ-ĔL 9 Bible Online

ISIKĪ-ĔL 9 - Car_Nicobarese bible

ISIKĪ-ĔL 9

¹Ngaich anga-aṅ nö pōitô hū-a nö elnang chu, nö ngö ṙô, Ṙūötöre, yī-ö ramökngö likeun aṅ ngih elpanam, kö aṅhaṅv eltī tö aṅtī re.

²Ngaich yĕh meuk, tafūöl tak yik tarik yamihtöre löktö lā-a öp lātulöng inkūp, tökū-ötö lā kapā, kö aṅhaṅv eltī tö aṅtīre, in cha inrē hĕng tak ök tarik tö inyuttö linen, nö kumtö inyul chūök kinūichö nö in ò. Kuhēthötre cha-a ngaich ngaich sökhaka nö ik mās tahāklö.

³Ngaich ngam lanöökö ngam Tēv Israel nö chuh lātulöng nö ṙā-ang I nup kërup chūök e nö töönghaka nö chuh el milūkö ngam patī; ngaich anga-aṅ nö havëkö ök tarik tö-inyuttö linen, ök tö-aṅhaṅv-in tö inyul chūök kinūichö.

⁴Ngaich ngö ṙô ngam Mā Tēv tö ò, Kiröönngöre man lök elpanam, lök Yērusalem, mikahngö māl yip tarik töhaṙivlōn mahalöinyöre inrē tökūö nup sin-òkkūö nup tökēkaṙen nö in e.

⁵In yip tahëng anga-aṅ inrē nö ngö ṙô nö hāngô tö chu, Tömrit ò lök ël ngam elpanam, fëlö e; öt ṙā-al an min ngam mat meh, öt hameuktö miṙēlōnre inrē me-eṅ min;

⁶Fëlngö tököiny tarik hĕngröt tī, ṙālö tarik rēlö inrē, kunnyīö kikānö inrē, un lūölka pöri nö hĕng tak öp tö aṅhaṅv-in tö minkahngö. Rĕhtenre el ngam töhet chūök chu. Lökten cha nö rĕhtenre nö in yik mā yik mī-ikūö ngam patī.

⁷Ngaich ngö ṙô anga-aṅ tö cha, Hachōichngö ngam patī, hatööḵlö minël el milūkö inrē tö yip töfëli. Kuṙòh kiröönngöre. Lökten cha nö kiröönngöre, ngaich fëlngö ngam elpanam.

⁸Hē cha nö ṙònghöichtī nö fël ngaich höng chū-ö tītö tö-ōtre, afukngöre chū-ö ngaich fātngökūöre, ngaich hū-a, Mah Mā Tēv! Hòṅ fëlngö vē tö-ōtren öm aṅ Israel i ṙīnösnyö ngam lanīnö meh i kui Yērusalem?

⁹Ngaich ngö ṙô anga-aṅ tö chu, Yahlö ṙôken ap nö kiröng fālen ngam patī Israel Yūtā inrē: tööḵlö an ngam panam tö mahām, tööḵlö inrē ngam elpanam tömichūḵṙen inkaha fālen; pò cha nö ngö ṙô, Ṙā-ayö an ngam panam tö ngam Mā Tēv, hö-ö an inrē ngam Mā Tēv nö ngëicha.

¹⁰Ngaich chū-ö ngih mat chu min nö öt ṙā-al, ötrēhĕn chū-ö min aṙē-ĕlōn, havëkö nup lā-en cha pöri chū-ö min nö i kui cha.

¹¹Ngaich yĕh meuk, ök tarik tö inyuttö linen, tö aṅhaṅv-in tö ök inyul chūök kinūichö, nö kumtö ṙô, nö ngö ṙô, Ngaich chin keuheūten sā ṙô meh tölṙô chu.