Read Car_Nicobarese TANĪ-ĔL 1 Bible Online

TANĪ-ĔL 1 - Car_Nicobarese bible

TANĪ-ĔL 1

¹Im linūöyö samyeūheu Yēhōyakim rācha aṅ Yūtā nö hayöng, ang Nēpukatnēsar rācha aṅ Pēpilön nö yih nö i Yērusalem nö kayīngö e.

²Ngaich ngam Mā nö kēten Yēhōyakim rācha aṅ Yūtā nö eltī ò, nö holtö nuk chehen ngam patī ngam Tēv; ngaich kētö u anga-aṅ nö ip panam Sainār, nö i patī ök tēv ò, chaphöt nuk chehen ngaich nö el chūök chehen ök tēv ò.

³Ngaich ök rācha nö tölṙô Aspēnas, ök yöngkūö yik kumkantöre in ò, nö kētö tarik aṅ Israel, hĕnghöre aṅ i mupīhö rācha aṅ i mā inrē.

⁴Tö-ayal töt vahav alaha, tövai töhuveū-en inrē i nup taṙòkhöre mikah, tö aṅhav-in tö inkaha, tö-akaha elmat i inköpö, tökô inrē nö la-evṙen nö el patī rācha, haköptu inrē cha-a tö mat līpöre ëlô aṅ Kālti inrē.

⁵Halēniṙen minchööḵö cha-a tö tökôlò nyā-aṅkūö tö ngam rācha nup nyahā ngam rācha, nup vāin inrē tö-ôkö tö ò. Hōtu cha-a nö lūöi samyeūheu nö haköptu; ngaich hē kinheūten ngam ṙētak sökhaka cha-a ngaich nö i kūö ngam rācha.

⁶Aṅ in cha yin vē hēḵ Tanīĕl, Hananiā, Mīsaĕl, Asariā inrē aṅ miyöngö Yūtā.

⁷Kētö minë-eny cha yik yöngkūö yik kumkantöre: Paltasasar ang Tanīĕl nö kaheūkö tö ò, Satrāk ang Hananiā nö kaheūkö tö ò, Mësak ang Misaĕl nö kaheūkö tö ò, Apĕtnīkō inrē ang Asariā nö kaheūkö tö ò.

⁸Halēnngö ellōn re pöri ang Tanīĕl nö öthòṅ hachōichngöre nö i nuk tökôlò nyā-aṅkūö rācha, hēk inrē i vāin tö-ôkö tö ò; lökten ò nö ve-ekūö ök yöngkūö yik kumkantöre nö halöngten ò nö un hachōichngöre.

⁹Ngaich ngam Tēv nö kētö miṙēlōn nö in Tanīĕl i kūö ök yöngkūö yik kumkantöre.

¹⁰Ngaich ök yöngkūö yik kumkantöre nö ngö ṙô tö Tanīĕl, Pā-ekūö chin töp mā chu öp rācha, öp töchöngu tö nyā-aṅkūö meh òk meh inrē nö meūkö meh min öktôlò inlaha tö yip ṙālö tarik yip tösā ṙētö meh. Ngaich me-eṅ min hakihten ngih kui chu in öp rācha.

¹¹Ngaich ngö ṙô Tanīĕl tök yōm chehen ök tövīlöngö tök yöngkūö yik kumkantöre nö hayōmö hēḵ Taniĕl, Hananiā, Misaĕl,Asariā inrē;

¹²Kalahten vē tarikre man nö söm sumkam; hökngen ih höng kē-ĕvkūö tö nyā-aṅ re tö aṅ panô-òṅ höng òk mak inrē.

¹³Ngaich me-eṅ min ngëichkö öp mineūkö ih tö mineūkö yip ṙālö tarik nyamā nup tökôlò aṅ i nyā-aṅkūö ap rācha, ngaich sā mat meh meuk ngati tī me-eṅ lök alaha vē tarik meh.

¹⁴Hangṙô cha ngaich anga-aṅ nö in e, ngaich kalahten cha nö söm sumkam.

¹⁵I kinheūten nup tö söm sakāmö meūkö cha-a ngaich nö ĕhten kiröng alaha inrē tö yip ṙālö tarik yik nyamā-avkūö nö i nyā-aṅkūö ök rācha.

¹⁶Lökten ök yōm chehen nö kēngö nup tökôlò nyā-aṅkūö cha tö ök vāin inrē tö-ôkölang tö cha, ngaich kē-ĕkūö cha tö an panô-òṅ.

¹⁷Ngaich ngam Tēv nö kē-ĕkūö cha vē tö fën tak ṙāl tarik tö inköpö huneū-en inrē nö i mat līpöre i mikah inrē; ngaich Tanīĕl nö akaha elmat tö nup mineūkö nup mī-i heūvö.

¹⁸Hē kinheūten ök ṙētaka, hē ök rācha nö tölṙô kinëhet cha, kēhĕtnen cha ngaich ök yöngkūö yik kumkantöre nö i kūö Nēpukatnēsar.

¹⁹Vë-ekūö cha ngaich ök rācha, ngaich öt hĕng tak in cha nö ṙòkhöre tökôti nö sā hēḵ Tanīĕl, Hananiā, Misaēl, Asariā inrē; lökten cha nö sökhaka nö i kūö ök rācha.

²⁰I tökeuheūttöre mikah mikah elmat inrē nuk intönö cha tök rācha, kôtökūö anga-aṅ tö cha nö söm köl heuh nö ĕhten tö yik tömilūönö mahachū inrē i nuk pūlngö ò nö ṙòkhöre.

²¹Ōtren ang Tanīĕl söl ik raneh samyeūheu Sairös ök rācha.