Read Car_Nicobarese TANĪ-ĔL 10 Bible Online

TANĪ-ĔL 10 - Car_Nicobarese bible

TANĪ-ĔL 10

¹Im linūöyö samyeūheu Sairös ök rācha aṅ Pörsia ök ṙô nö hameuktu nö in Tanīĕl, ök tökaheūkö minë-eny nö Peltasasör. Tökô-en ök ṙô, ngaich angū-ö nö tökiröng nö kanihngen. Akaha elmat anga-aṅ nö ngaich tö ök ṙô ane inrē akaha elmat tö ök tömeūkö.

²I nuk sakāmö anū-ö, chu-ö Tanīĕl, öich lūöi afta haṙīvölōn.

³Öt nyā-aṅvkūö chu-ö tö tökuchik, öt yihtöre nö elvāng chu alaha, vāin inrē, öt rēhĕn chū-ö hachamkö alahare, i nuk tölūöi afta.

⁴Im innët anāi fën sakāmö ngam raneh chingëṅt, sökhaka chū-ö i kui ök tökiröng tahël, angū-ö ön Taikrīs,

⁵Môklökūöre chū-ö ngaich, ngaich meuk, yĕh meuk, hĕng tak ök tarik tö inyut-tö linen hilā, ök töfanūmu ṙat tö Yūfös humlum.

⁶Sā peril ök alaha ò, sā minēukö hanyālö ök arëkūö ò, nup mat ò sā töhūkūö tanyukngö sā pinchālö tö-amëla mās nup kël ò kalröön ò inrē, sā ṙô tömaṙôngö nup ṙô inrē.

⁷Ngaich chū-ö, Tanīĕl, höng hĕng takmat öich meuk ök tömeūkö, pò yik tarik yik hol chu nö öt meuk ök tomeūkö, fuk kui pöri cha-a tö yöng kinchëyöre, falngöre ngaich cha-a nö hayunngöre.

⁸Lökten chu ṙā-ai höng hĕng tit taka öich meuk ngih tökiröng tömeūkö, ngaich ök kumlēḵ nö öt ōtre nö inchu; haṙīngöre ngam töyang mineūkö chu nö pōihangṙen, ngaich chū-ö ötköpö kumlēḵen.

⁹Ngaich chū-ö hang ṙënṙô nup ṙô ò; ngaich hē chu hang ṙënṙô nup ṙô ò, fukngö chū-ö ngaich fāthakkūö i linpātö haṙòh öich fāthakkūö el tumlat.

¹⁰Ngaich yĕh meuk, hĕng ök kël lamūölken chu, asöklen chu öich höng kichëyöre kël, kui kinmônö inrē.

¹¹Ngö ṙô ngaich anga-aṅ tö chu, Ō Tanīĕl, tarik tökiröngö hananghuṙen, hangihtöre tö minë ṙô minë ṙô chu in meh, hachīpöre söklöre, tön tīntu chin in meh töngamuh. Hē ò nö ṙònghöch ṙô tö ngih ṙô nö in chu, söklöre chu-ö ngaich höng kichëyöre.

¹²Ngö ṙô ngaich anga-aṅ tö chu, Um pa-ekūö, Tanīĕl, tön löktökūö ik raneh sakāmö hē meh kētö ellōnre hòṅ akaha elmat hayāichngöre inrē i kūö gam Tēv meh, nup ṙô meh inrē nö ngaich nö hāngö, ngaich chū-ö yih, tökūö nuk ṙô meh.

¹³Ngaich öp mākūö ngam pūlngö Pörsia nö sōten chu, nët anāi kahuk sakāmö; yih pöri Maiköl nö holṙen chu, öp töhĕng tak aṅ in yip mākūö, lökten chu ṙāngen ò umuh hol öp mākūö ngam pulngö Pörsia.

¹⁴Ngaich yih öich vīten meh akaha elmat töp lāinyngen yip tarik meh i nup sakāmö. Pò ngam tömeūkö nö öt sumkāmu yanīhih.

¹⁵Hē ò nö keuheūtö ṙô nö vë-ekūö chu tö në ṙô, havööngö kūöre chū-ö ngaich kū-ötö el tumlat ngaich öt salōho ṙô.

¹⁶Ngaich yĕh meuk, hĕng tak ök tösā aṅ in yip kūön tarik lamūölkö minuh chu; vā-alkūöre chū-ö ngaich, ngaich kahôka ṙô. Ngö ṙô chu-ö ngaich tö ò ök tö sökhaka nö i kūö chu, Ō Mā chu, kūö ngam tömeūkö nup töchök nö yih nö in chu, ngaich chin öt köpö kumlē-en.

¹⁷Sitih kanô-òṅ ang ngam tarik ngam mā nö vë-ekūö ngam mā re? Tön öt ōtre öp kumlē-en nö in chu, öt ōtren inrē öp unhômö nö in chu.

¹⁸Ngaich hēk ök hĕng tak tösā mineūkö tarik nö lūölken chu nö hangëken chu.

¹⁹Ngö ṙô anga-aṅ, Ō tarik tö kiröngö hananghuṙen, um pa-ekūö, lanāmö yēḵ in meh; hangë-eṅre um pinhëṅeṅvkūö. Ngaich hē ò nö vë-ekūö chu, ngëḵlöre ngaich chū-ö, ngaich ngö ṙô, Ṙò-òv an yēḵ ngam mā chu, tön ngaich man hangëlen chu.

²⁰Ngö ṙô anga-aṅ ngaich tö chu, Akahalōn ömeh töp lökten chu yih in meh? Havan pöri chū-ö töngamuh öich kiyung lā-al ngam mākūö Pörsia; ngaich yē chu keuheūten in ò, yĕh meuk, yih öp min mākūö Krīs

²¹Vë-enynang meh pöri chū-ö tök tökūchi i mat öp līpöre kanô-en: Öt hĕng tak umuh kumyung nö lā-al vē nö lā in chu, höng Maiköl, ap mā meh.