Read Car_Nicobarese TANĪ-ĔL 11 Bible Online

TANĪ-ĔL 11 - Car_Nicobarese bible

TANĪ-ĔL 11

¹Chū-ö pöri öich söklöre haköpngö ane inrē hangëken ò, ik raneh samyeūheu Tēriös ök aṅ Mëtī Mīt.

²Ngaich chin töngamuh hòṅ hameuktö ngam kanô-en, Yĕh meuk, lūöi töre tum tak yip min rācha chamôhòlre i Pörsia; ngaich öp finënö min nö töyahlö kanôlò tö cha nö ṙòkhöre; ngaich hē ò nö kalēḵ löktökūö nup kanôlò re, ngaich anga-aṅ min nö harunlö alaha yip töṙòkhöre nö lā-al ngam pūlngö Krīs.

³Ngaich chōholre min öp rācha hĕng tak tökalēḵ, öp mahayöng nö holtö tökiröng pūlngö ngaich la-evṙen tö töng kanahanglōn re.

⁴Hē ò min nö ngaich nö chōholre, ngaich min öp pūlngö ò nö payāyi harēvi inrē nö kū-ötö nup töfën kuföt ngam halīöngö, hö-ö pöri nö in yik kūön ò, öt rēhĕn nö sā ngam pūlngö ngam hayöng ò; pò ngam pūlngö ò min nö nyòklöngö ngaich chuh in yip tahëng tö vēḵ.

⁵Ngaich min nö kalēḵ öp rācha aṅ in yip rācha in ò nö tökalēḵ tö ò tö ngam pūlngö ò inrē nö tökiröng min angū-ö nö pūlngö.

⁶Unôichrit tö haroh tum samyeūheu cha-a min nö hanôlö höö, ngaich öp kikānö min kūön öp lā lòhngö rācha nö yihtöre nö ip rācha aṅ lā kapā nö halām; hö-ö pöri min anga-aṅ nö köptī tö kumlēḵ ngam kël ò, ngaich anga-aṅ tö yip kūön ò min inrē nö ötköp; ṙā-aiṙen min ngaich öp kikānö, yip hamòlröön ò inrē, töp kūön ò, ngaich ngam kikōnyö min nö aminuvö tö ò;

⁷I nup ṙētak anū-ö öp pak lamöklö i nup ṙĕh ò min nö sīöplö nö i chūök ò; ngaich anga-aṅ min nö yih nö lā-al yip kumyung ngaich kuhēthötre nö el chūök kumyung öp rācha aṅ lā kapā, ngaich anga-aṅ min nö lök alaha cha ngaich mihôiṅ.

⁸Ngaich anga-aṅ min nö halāingö nup tēv cha töhaṙöichö insātēv inrē nö i Aikup nö holtö nup töpōi ṙāi chūökṙen rupīö humlum inrē; rĕh tum samyeūheu min anga-aṅ nö ṙātö alaha re nö kilöön öp rācha aṅ lā kapā.

⁹Ngaich anga-aṅ min nö yih nö im pūlngö öp rācha aṅ lā lòhngö, hö-ö pöri min nö havan nö i panam re.

¹⁰Ngaich min yip kūön ò nö kiyung ngaich maṙôngö hamūl min tö töpōyen kumyung, yip yamih min nö taṙeichlöng nö lök in e, ngaich hēk min nö kiyung nö söl ip chūök ò nö kiyung.

¹¹Ngaich ök rācha aṅ lā lòhngö, nö tainy, ngaich kunyī-inyre min nö kiyung öp rācha aṅ lā kapā; ngaich anga-aṅ min nö hachohlö töpōyen, kētu pöri min angū-ö nö eltī ò.

¹²Ngaich hē yip tömaṙôngö nö kē-ĕ, hapōilö ellōn re min anga-aṅ, ngaich anga-aṅ min nö kavaltö yip tösöm köṅny, ötkô pöri min anga-aṅ.

¹³Pò öp rācha aṅ lā kapā min nö hēk nö hacholö tömaṙôngö, kiröngen tö yik lā urĕh; ngaich unôichrit tö haroh tum samyeūheu anga-aṅ min nö yih nö hol tö tökiröngen kumyung pōyen inrē nya-aṅkūö.

¹⁴I nup ṙētak anū-ö maṙôngö min chamôhòlre nö lāḵlö ngam rācha aṅ lā lòhngö; ngaich yip tarik töchökhuṙen in yip tarik yīö min nö chōholre nö hateungngöngam tömeūkö; hö-ö pöri min cha-a nö kô.

¹⁵Ngaich yih min öp rācha aṅ lā kapā nö tiṙōlgö nup chūök cha nö kiyung, ngaich kē öp elpanam tökôlò kinlonglö tö chūök kumyung. Ngaich yip aṅ lā kapā kumyung nö ötkô nö sökhaka min, pòrô yip atöllö ò kumyung pòn öt kumlēḵĕv min nö sökhaka.

¹⁶Yih pöri anga-aṅ min nö lā-al ò nöng asā kanahanglōn re, ngaich öt hĕng tak min tösökhak nö i kūö ò; ngaich anga-aṅ min nö sökhak nö im tökôlò panam, keuheūthötre min angū-ö nö elkatòh chöngö ò.

¹⁷Hachip kūö re min anga-aṅ nö yih nö holtö kumlēḵ ngam pūlngö ò nö keuheūtlöre, ngaich anga-aṅ min nö kumtö talöökö inlāmö ngaich hateungngö u ngaich anga-aṅ min nö kē-ĕkūö ò tö kūön kikānö pumyāingö ngam pūlngö; hö-ö pöri min angū-ö nö sökhaka, öt taneunglen ò inrē.

¹⁸Unôichngöre min anga-aṅ nö havööngökūöre nö i nup lā kūö mai panam ngaich maṙôngö kahë min tö u; hĕng tak pöri min öp yöngṙen kumyung kumheūtngen öp tī ò inyëḵngen; kô-en min anga-aṅ nö havantö öp inyëḵngen nö i kui ò.

¹⁹Havöökūö e min anga-aṅ nö havan nö kū-ötö nup töpōyen chūök kumyung panam ò; kavē-ĕre pöri min anga-aṅ ngaich fukngö, ngaich öt kôti min.

²⁰Ngaich chōholre min hĕng tak öp tamīnngö öp töhĕng tak mahateung tī re nö kē masūl nö lökten i ineū-euṅ ngam pūlngö; ngaich pöri nö i ël tötṙōl sumkam min anga-aṅ nö liköliyö, öt i tanānyö öt rēhĕn nö i kinyūngö.

²¹I chūök ò min ngaich nö chōholre öp tömināich tarik öp tötkē-ĕvkūö tö minā-aṅ rācha; yih min anga-aṅ nöng öt akahtuṙen ngaich teūngen tö ngam pūlngö lökten i inrōilö ṙô.

²²I kūö ò min yip kumyung nö hatngö payāyi inrē, tö öp kūön rācha kinlēḵngô inrē.

²³Löktökūö im hē inmūlö nö in ò anga-aṅ min nö michū inlahen; vītöre ap min nö kalēḵ nöng hol tö tökūöṅnen tarik.

²⁴Öt akahtuṙen anga-aṅ min nö yih nö ip tökôlò alaha ngam panam; ngaich anga-aṅ min nö tinī-iv tö töt rēhĕn nö la-en yik yöng ò, öt rēhĕn nö la-en yik yöng yik yöng ò, piyāyi chūök nö in cha töng kinëtöre tö chehen, kinīlö chehen inrē. Lukkö tī re anga-aṅ min nö lā-al nup töngëḵ chūökö, höng rahëichtaṙen pöri.

²⁵Ngaich anga-aṅ min nö harunlö kumlēḵre öt pinhëṅeṅkūö re inrē nö lāḵlö ök aṅ lā lòhngö rācha nö holtö tökiröngen kumyung; kiyung ngaich min öp rācha aṅ lā lòhngö nö holtö tökalēḵ kumyung töpōyen; ötkô pöri min anga-aṅ nö sökhak, pòn chöhöh min nö vītu öp lökngövah ò.

²⁶Uroh min yip hamòlkūö ò nö nyā tökôlò nyā-aṅkūö töpô-òvkūö min tö ò; hatngö min yip kumyung in ò, pōihangṙen min nö fukngö yip töfëli.

²⁷Nap tönët tak pöri rācha nup lōn cha min nö hòṅ i ötlanöökö; hĕngre chūök nap min nö minyôny-aṅ nö ip tö halēnlöng ṙētak.

²⁸Ngaich havanlöre min anga-aṅ nö i panam re nö kiröngen kum tö chehen, ngaich pöri ök kū-ö ellōn ò nö im töhet kinlēḵngô. Ngaich anga-aṅ min nö la-evṙen töp kui re, ngaich havantöre nö i panam re.

²⁹Ip ṙētak töhalēnglöngö min anga-aṅ nö havantöre nö yih nö lā lòhngö; hö-ö pöri min angū-ö ing töngamuh nö sā re ik lā urēh.

³⁰Pò nup chōng aṅ Kittim min nö yih nö lā-al ò, ngaich pa-ekūö min anga-aṅ ngaich heūlngöre, havanrit re min nö tainy kētöre ngaich nö lā-al ngam töhet kinlēḵngô. Havanritre min anga-aṅ ngaich hangṙô cha yip ṙamangö ngam töhet kinlēḵngô.

³¹Meūkö min yip kumyung aṅ in ò nö hachōichngö ngam tempöl tö nup chūök kumyung inrē, ngaich kēngö nup tö-iṙūöhen töföngö tökētu. Ngaich cha-a min nö asöklö öp sin-òkkūö öp vamīten töhatngö min.

³²Ngaich anga-aṅ min nö haṙööingen cha nö holtö inrōilö ṙô yip fumlalngö ngam kinlēḵngô; ngaich pöri yip tarik tö-akahakūö tö ngam Tēv re nö ngëḵ min nö söklöre nö kētö kūö alaha re.

³³Ngaich cha-a yip aṅ in yip tarik yip tö akaha min nö maṙôngö tī tö tö-akaha elmat, pòrô cha-a min nö fuk kūö sanët tameūyö inrē, i inkövö kinëtore inrē tö chehen, nö rĕh tum sumkam.

³⁴Hē cha nö fukngö, rehëichyen taneūngen cha-a min tö hinòlṙen. Ngaich maṙôngö min yip mahamūltöre nö in cha nö holtö inrōilö ṙô;

³⁵Rēvre tö cha inrē yip tö-akaha min nö fukngö, nö halööktit, ahetlen cha inrē, vīten cha inrē nö isoh, hanöng saha öp hē manāngen, pò e nö ṙòngö ṙētak töhalēnlöng.

³⁶Ngaich öp rācha min nö la-evṙen nö asā lōn re; hapōilöre ap min kumrönglöre inrē nö lā tulöng tö vē taṙòkhöre tēv ngaich ṙô tö pinngangkūö min nö lā-al ngamTēv vē tēv. Kôlò min anga-aṅ söl ip inteungngö ngam lanīnö; pò öp kuilōn min nö keuheūtiṙen.

³⁷Hö-ö öp min nö chumkūöṙen tö yip tēv yip yöng re, hēk inrē nö ip töhĕng tak hanāngen kikānö; öt hĕng tak chumkūöṙen min anga-aṅ tö tahëng tēv, pò ò min nö kumrönglöre nö i kui taṙòkhöre.

³⁸Milēḵṙen ap min tö tēv chūök kumyung nö ṙënngen në; milēṙen min anga-aṅ tö tēv öp mikahkūö yip yöng ò nö hol tī tö humlum rupīö inrē, töpōi ṙāi ihong raneushö inrē töpōi ṙāi.

³⁹Lök alaha nup töngëḵ öp min chūök kumyung i hinòlṙenre töp aṅ tahëng tēv; acha-a yip ma-akāhan min kumrönglen ò tö ineū-euṅ. Vīlen cha öp min nö mahayöng nö i kui tömaṙôngö ngaich michööḵ ngam panam min nö raneushö.

⁴⁰Ip hē manāngen öp rācha aṅ lā lòhngö min nö kiyūngan; ngaich pöri min öp rācha aṅ lā kapā nö siyahtöre nö i kui ò nö sā lamfeui fuföt holtö inröl aṅ uk kōra inrē tarik, holtö chōng töṙōl nòng inrē; ngaich yih min anga-aṅ nö i minë panam nö tiṙēichngö u nö lök in u.

⁴¹Yih min anga-aṅ nö ip panam tövai. Söm köṅny yip töfukngö min, ṙānyu pöri min cha-a nö ṙā-ang eltī ò: yip aṅ Itöm Mô-āp inrē yip ṙôken aṅ Amön inrē.

⁴²Hateutnyö kël re min anga-aṅ nö lā-al nup panam, öt hō min inrē Aikup nö öt kô-òngvah.

⁴³Vītöre min anga-aṅ nö mahayöng nup kanôlò humlum, rupīö inrē, ṙòkhöre inrē inrē töpōi ṙāi chehen aṅ Aikup; ngaich yip aṅ Lipyā aṅ Itiōpīa inrē min nö tömrit yip hol ò.

⁴⁴Nup inhāṅnga pöri nö löktö lā kapā inrē min nö pinhëṅtökūö ò, ngaich kiröönngöre min anga-aṅ tö holtö tökiröng tanānyöre nö hòṅ ahatngen cha nö maṙôngö fahëlngö.

⁴⁵Vītö nup tövai inrūkui re min anga-aṅ nö ihôi ngam mai tö ngam tövai töhet rôngö; sön min anga-aṅ nö yih nö im manāngen ò, nö öt hōlu tö mahayööken re.