Read Car_Nicobarese TANĪ-ĔL 12 Bible Online

TANĪ-ĔL 12 - Car_Nicobarese bible

TANĪ-ĔL 12

¹Hē e min Maiköl nö chōholre, öp tökiröng kūön rācha öp yōm më tarik meh. Ngaich min öp umuh nö hē kanihngen, tötha-eh misī hēten tö pumnāmö tarik söl ip hē e pöri yip tarik meh min nö ṙānyu, ṙòkhöre yip tökôti minë-eny min nö kūichiyö nö i mat öp līpöre.

²Maṙôngö yip mahaṙòh nö el pitung ngam tumlat nö aṅhen min, rīkre inrē lamöö i sinrōngkūö i minṙēngö inrē tötchanūhuvṙen.

³Ngaich cha-a yip tö akaha min nö yang sā yanāngö el taṙul; cha-a inrē yip tömaṙôngö havöötukūö nö im tölöök, sā taneūsömat nöng öt chanūhuvṙen.

⁴Me-eṅ pöri, Tanīĕl, öpngökūö nup ṙô, haköpngö kūö ngam līpöre inrē, hanöng saha öp ṙētak manāngen. Maṙôngö yip töng famalköre, ngaich ṙūöhölre min inkaha;

⁵Ngaich chū-ö Tanīĕl ngëicha, yĕh meuk, sökhak nak nët tak tahëng, hĕng tak lā hih i kui öp töhëm mak, hĕng tak inrē lā muh i kui öp töhëm mak.

⁶Ngaich ngö ṙô chū-ö tök tarik tö inyut tö linen hilā, ök mi-I kui nuk mak kun töhëm, I rô-òten öng min nö söl ip manāngen në pinngangkūö?

⁷Ngaich ök tarik tö inyūtu tö linen hilā, ök mi-ikui nuk mak töhëm, nö hachônglö lā hāmö kël re lā tavē inrē nö kū-ötö el halīöngö; ngaich chū-ö hang ṙô ò nö chūöku ṙô nö in ò ngam tö-örheūheu nö aṅ tö e min nöng töṙētakvö, nët heuh, ròngti inrē i töhĕng heuh; ngaich hē töveutta kumlēḵ yip töhet tarik nö yih nö kinheūtngen në nö hateūngi min.

⁸Hang chū-ö ngaich, öt akaha elnang pöri Ngaich ngö ṙô chū-ö, Ō Mā chu, asuh ap min kumṙen në?

⁹Ngö ṙô anga-aṅ, Ngaich man kiröönngöre, Tanīĕl, tön öpikūö nup ṙô haköpi kūö inrē hanöng saha öp hē manāngen.

¹⁰Ma-ṙôngö yip ma-ahetlöre, ngaich vīlöre min nö ishoh, halööktitre inrē; yip tötlöök pöri min nöng la-evṙen tö tötlöök; öt hĕng tak tötlöök min tö-akaha elmat; höng cha-a pöri min tö-akaha elmat yip tö akaha.

¹¹Ngaich löktökūö ngam ṙētak öp tö-iṙūöhen töföngö tökētu nö kē-ĕyö, ngaich öp sin-òkkūö öp ma-ahathanga nö asöklöng, ngaich mīnö nö umuh hĕng köṅny nëtòng machūötör anāi sakāmö.

¹²Tökôlò öp anga-aṅ öp hamööka ngaich yih ip töhĕng köṅny lūöyòng lūöi anāi taneui sakāmö.

¹³Ngaich pöri me-eṅ kuṙòh hanöng saha öp manāngen; ngaich öm heūheure, sökhak min inrē ip tömichööḵtu chūök meh ip manāngen nup sakāmö.