Read Car_Nicobarese TANĪ-ĔL 2 Bible Online

TANĪ-ĔL 2 - Car_Nicobarese bible

TANĪ-ĔL 2

¹Im innëtö samyeūheu Nēpukatnēsār nö hayöng, heūv ngaich Nēpukatnēsar: ngaich kihngen ök ellōn ò, ṙā-ai inrē anga-aṅ tök inṙôhòre.

²Ngaich ök rācha nö tölṙô yik tömilūönö, mahachū, vamīngen, yik aṅ Kālti inrē nö havëtu nö vënyö nuk heūvö ök rācha. Lökten cha nö yih sökhaka ngaich nö i kūö ök rācha.

³Ngö ṙô ngaich ök rācha tö cha, Heūvu chin, ngaich kihngen ellōn öich hòṅ akahakūö töp heūvö.

⁴Ngaich ngö ṙô yik aṅ Kālti tök rācha, Ō rācha örheūheu man yēḵ aṅ! Ve-enynang vē tarik re man tap heūvö, ngaich ihö min hameuktö öp manah.

⁵Ngaich ök rācha nö sapṙô yik aṅ Kālti, Kô-en öp ṙô in chu; yē yīö öt mikahhtölōn chu tö heūvö öp manah e inrē, ngaich yī-ö min hateuchtu alaha, nup patī yīö inrē min nö tiṙōli.

⁶Yē yīö pöri hameuktö öp heūvö öp manah e inrē, ngaich yī-ö min teūngen in chu tö raneushö ṙëhe lumrāḵ inrē tökiröng ineū-eu inrē. Lökten töp manah e inrē.

⁷Sap ṙô cha-a ngaich im innët heuh, Ṙô-òv an yēḵ ngam rācha nö in vē tarik ò tap heūvö, ngaich īhö min hameuktö öp manah e.

⁸Sapṙô ngaich ök rācha, Akahalōn takô chin tö yīö hòṅ kē rô-òten e, pò yīö meuk ngam ṙô chu nö kô-en.

⁹Tö yīö yē yīö öt mikahtölōn chu tö öp heūvö höng humĕng mirökö öp in yīö. Hē-ngòng lōn yin hòṅ vī minyôiny-aṅ hachōichngö nup ṙô inrē i kūö chu hanöng saha nup ṙētak nö haṙī-ingre. Lökten vënyö öp heūvö in chu, ngaich akahalōn chū-ö min tö yīö kô hameuktö manah e in chu.

¹⁰Sapṙô ök rācha ngaich yik aṅ Kālti, Öt hĕng tak aṅkūö ngih tumlat tökô nö asahkūö ngam havëkö ngam rācha; pòn öt tökirönguvö tömihôiṅ inrē rācha mahavëkö tö ngatī nö i tömilūönö hēk mahachū hēk an Kālti.

¹¹Tökihngen an ngam havëkö ngam rācha, öthĕng tak tökô nö hameuktö e nö im rācha höng yip tēv yip töt mī-iyöng nö holtö-ṙah tarik.

¹²Kūö e ngam rācha nö tainy angëṅ tachōich inrē, ngaich tölṙô finëlgö yik tö-akaha tarik nö ṙòkhöre aṅ Pēpilön.

¹³Sölngö ngaich ngam chöngö ngam finëlngö yik tö-akaha tarik, chöhö Tanīĕl ngaich cha-a yik hol ò inrē nö hòṅ fëlngen cha.

¹⁴Ngaich Tanīĕl nö sapṙô Arī-òk nö holtö huneū-euṙô re mikah inrē, ök yönkūö yik amahtö ök rācha, ök kumröönngöre nö ngaich nö fëlngö yik tö-akaha tarik aṅ Pēpilön;

¹⁵Ngö ṙô anga-aṅ tö Ariòk, ök yöngkūö kumyung ök rācha, Suh öp kumlēḵ chöngö öp rācha nö ngatī? Ngaich Ari-òk nö mikahtölōn Tanīĕl tö e.

¹⁶Kiröönngöre ngaich Taniĕl nö kuhēthötre nö vë-ekūö ök rācha nö kētö ṙētak ò, hòṅ ò nö hameukhömat ök rācha tö manah.

¹⁷Chuh patī re ngaich Tanīĕl ngaich mikahtölōn hēḵ Hananiā, Mīsa-ĕl, Asariā tö, yikhol ò inrē.

¹⁸Ngaich vë-ekūö cha nö chöh miṙēlōn ngam Tēv ngam halīöngö tö inlahen ngih ötmikahkūö, hòṅ Tanīĕl tö yik hol ò inrē nö öt anòngngövah yik tö-akaha tarik aṅ Pēpīlön.

¹⁹Hameuktu ngaich nö in Tanīĕl ngam ötmikahkūö nö mimeūkö tö hatööm. Ngaich Tanīĕl nö hakôlò ngam Tēv ngam halīöngö.

²⁰Ngaich ngö ṙô Tanīĕl: Tökôlò an nö örheūheu ngam minë-eny ngam Tēv, ngam tö-aṅhaṅvin tö mikah kumlēḵ inrē.

²¹Haṙīngö ṙētak an hē inrē; kēngö rācha an ha-ūichlö rācha inrē; kētö mikah an i tö-akaha inkaha inrē in cha yip tö-aṅhaṅv-in tö mikah elmat;

²²Hameuktö tö-aṙū an ötmikahkūö inrē; akahalōn an tö më-el sinngūlö, iyöng in ò an ngam hanātö.

²³In meh, Ō Tēv yik muvöhngö chu, öich kētö nöinytö tī nöinyö inrē, pò meh kētö mikah in chu kumlēḵ inrē, ngaich inrē mikahtölōn chu töp havëkö ih in meh pò meh ngaich mikahtölōn ih tö nup mī-in ap rācha.

²⁴Lökten ang Tanīël nö chu in Ari-òk ök tö kētu chöngö tö ök rācha nö fëlngö yik tö-akaha tarik i Pēpilön; kiröönngöre anga-aṅ ngaich ngö ṙô tö ò, Uh man fëlngö yip tö-akaha tarik i Pēpilön; kēten chu i kūö öp rācha, ngaich chū-ö min hameuktö öp manah ip rācha.

²⁵Ngaich Ari-òk nö kēten Tanīĕl nö i kūö ök rācha nö kurāten, ngaich ngö ṙô tö ò: Kôtökūö chin in yip tö-ahötī nö ṙā-ang Yūtā tö öp tarik tökô nö mikahtölōn ngam rācha tö manah.

²⁶Ngö ṙô ngaich ök rācha tö Taniĕl, ök tö minënyu tö Paltasasar, Kô ömeh mikahtölōn chu tö heūvö maheuṅk chu töp manah e inrē?

²⁷Sapṙô ök rācha ngaich Taniĕl, Öt tarīku tö-akaha mahachū, tömilūönö, hēk inrē ma-akah taneūsömat tökô nö hameukhöti nö im rācha töp ötmikahkūö havëkö ngam rācha,

²⁸Hĕng taka pöri ap Tēv el halīöngö mahameuṅktö ötmikah kūö, ngaich anga-aṅ nö mikahtölōn ngam rācha Nēpukatnēsar töp mī-i nup sakāmö min. Në nun heūvö meh tömeūkö inrē tö meh nö elkui meh hē meh hulalhaka el chamam:

²⁹Löö in meh, Ō rācha hē meh hulhaka el chamam nö yih nup lōn töp mu-unôich min, ngaich anga-aṅ ngam mahameuk tö ötmikahkūö nö mikahtö lōn meh töp mīnö.

³⁰Rö-ö pöri chū-ö kūö mikah re öich mööḵlö tö yip taṙòkköre tö-aṅ öich hameukhumat tö ngam ötmikahkūö, hinôten ngam manah pöri nö vënyu nö im rācha, hòṅ meh akahalōn tö chanöh el kuilōn meh.

³¹Ō rācha, meuk man ngaich, yĕh meuk, öp tö kiröng insā. Anga-aṅ ngòh insā, tökalēḵ tölngö inmëlö inrē, sökhak nö i kūö meh, pinhe-eṅkūö inrē öp mineūkö ò.

³²Tövai nö humlum öp kui ngòh insā, rupīö öp elngòh ò takeun kël inrē, mās öp aich ò takeun ò inrē,

³³Vët nuk kalröön ò, nuk röön ò ròngti nö vët ròngti nö tilin inrē.

³⁴Ngaich hē meh ngëicha, hĕng öp ihong töfūngö tö kël tarik, ngaich fohtöre angū-ö nö im insā nö fuk ik röön ò vët tilin inrē, oh ngaich anū-ö nö panyeny tökūö e;

³⁵Ngaich ngam vët, tilin, mās, rupīö, humlum inrē, nö ṙòkngöre nö ohngö nö panyeny ngaich anū-ö nö sā uk nëlö hē el sikehngö el chūök pinṙōngö sāiny; kumröön kūföt anū-ö ngaich, lökten u nö öt chūöku nö kôti. Ngaich pöri ngam ihong töpala-aiṙen tī tö ngam insā nö vītöre nö tökiröng nö rôngö ngaich hatöölö në tumlat.

³⁶Angū-ö ön ngih heūvö; ngaich in töngamuh vë-eny ngam manah e im rācha.

³⁷Ō rācha, me-eṅ, rācha kūö vē rācha tökē-ĕvkūö tö pūlngö tö ngam Tēv ngam halīögö, minhôiṅyö, kumlēḵ, kanôlò inrē,

³⁸Tökētu eltī inrē tö ò, tö vē kūön tarik, ip töng chūök cha nö iyöng, töṙeūla elkahôyö, chehechōn el kuföt, vītu me-eṅ hayöngö u nö ṙòkhöre-me-eṅ man tö kui tö humlum.

³⁹Unôichrit meh min öp tahëng pūlngö töhöö-angen tö meh, ngaich sön inrē öp linūöyö pūlngö öp mās, öp mahayöng ngih tumlat min nö ṙòkhöre.

⁴⁰Ngaich finënö min öp pūlngö umuh, töngëḵ sā vët, kūö ngam vët nö lakölötī panyāchö tī inrē nö panyeny tö taṙòkhöre; sā ngam vët inrē kaṙöpötī, ngaich angū-ö min nö liköl kiṙöp në taṙòkhöre inrē.

⁴¹Ngaich sā meh meuk ngam röön tö nuk kunröön nö ròngtī nö tilin tī vamī tanīöyö ròngti inrē nö vët, maharēvöre an angū-ö min nö pūlngö; rīkre pöri min in e tösā nganë-eṅ vët, sā ngam maheuṅk meh vët tökalūöchö tö ngam tilin tumlat.

⁴²Ngaich sā minë kunröön ngam röön nö ròngti nö vët ròngti inrē nö tilin, ngatī min ngam pūlngö nö ròngti nö ngëḵ ròngti inrē nö lareuka.

⁴³Sā maheuṅk meh tö ngam vët tökalūöchö tö ngam tilin tumlat, ngatī cha-a min nö kalūöichhen höö im pīnīhö, hö-ö pöri min cha-a nö köp nö in höö, sā ngam vët nö öt kalūöichtöre nö im tilin.

⁴⁴I nup sakāmö yip rācha min ngam Tēv ngam halīöngö min nö asöklö öp pūlngö öp töthētu nö payāyi min, ötrēhĕn öp inyöngö tö e nö ṙā-ai nö i tahëng tarik. Panyënyö tī öp min nö likölngö nup pūlngö nö ṙòkhöre, ngaich kētö manāngen u, ngaich sökhak anū-ö min nö örheūheu.

⁴⁵Höng sā maheuṅk meh tö ngam ihong nö öt funglöng tö kël tarik nö im rôngö, tö e inrē nö lakölö tī tömvët nöpayeny, töm mās, tilin rupīö, humlum inrē. Mikahtölōn ngam rācha an ngam tökiröng Tēv töp mu-unôich min. Töteung an ngam heūvö, kô-en inrē ngam manah e.

⁴⁶Afukngöre ngaich nö fāthakkūö ök rācha Nēpukatnēsar, nö salāmö Tanīĕl, ngaich tölṙô kinëtö tökētu nö in ò tötahūsa inrē.

⁴⁷Ngö ṙô ök rācha tö Tanīĕl, Kô-en an ngam Tēv meh nö Tēv vē tēv Mākūö vē rācha inrē, mahameuktö ötmikahkūö inrē, pò meh ngaich kô hameuktö ngih ötmikahkūö.

⁴⁸Ngaich ök rācha nö kētö lamātulöng ineū-euṅ Tanīĕl nup töpōyen inrē raneushö, ngaich vīlen ò nö mahayöng nup pumnāmö i Pēpilön nö ṙòkhöre, yöngkūö yik tö-akaha inrē tarik i Pēpilön nö ṙòkhöre.

⁴⁹Ngaich Tanīĕl nö vë-ekūö ök rācha, ngaich anga-aṅ nö vīlen hēḵ Satrāk, Mësak, Apetnīkō inrē nö i kui nuk pūmnāmö i Pēpilön; höngngöh pöri Taniĕl nö ik rācha el chūök kamhôṅka.