Read Car_Nicobarese TANĪ-ĔL 3 Bible Online

TANĪ-ĔL 3 - Car_Nicobarese bible

TANĪ-ĔL 3

¹Vī humlum insātēv ök rācha Nēpukatnēsar, ök tö tafūöl anāi sumkôngö rôlö tafūöl sumkôngö ṙôktāk inrē. Asöklö e anga-aṅ ngaich ip töṙā-akūö panam Tūra, ip panam Pēpīlön.

²Ngaich ök rācha Nēpukatnēsar nö tīnngö mahamūl yik setrāp, prifek mahayöng inrē, mahalēn, yōm rupīö, tökiröng kamhôka, tökūönnö kamhôka inrē, ṙòkhöre inrē yik mākūö panam nö yih nö i kinëten ök insā vahīlö ök rācha Nēpukatnēsar.

³Ngaich yik setrāp, prifek, mahayöng inrē, mahalēn, yōm rupīö, tökiröng kamhôka, tökūöṅnö kamhôṅka, ṙòkhöre inrē yik mākūö panam, nö hamūltu i kinëten ök insā ök asöklö ök rācha Nēpukatnēsar; sökhaka cha-a ngaich nö i kūö ök insā tö-asöklöng tö Nēpukatnēsar.

⁴Ngaich ök inhāṅnga nö pōiti ṙô, Tölô yin, Ō yī-ö tarik, pumāmö tarik, tökeuheūttöre ëlô inrē,

⁵Tö e hē yīö hang ṙô sinrōl, fanöö tötipö, līör, rikòn,ranöng, fanöö töhayūlö kuföt, tökeuhēuttöre mihëṅṙö inrē ranöng tinkökö,ngaich yī-ö afukngöre salām ngam humlum insā asöklö ngam rācha Nēpukatnēsar;

⁶Öp töt ma-afukngöre min nö salām ilööṙen min nö kavalhötvö nö el ngam töhūkūö tameūyö.

⁷Lökten, ilööṙen hē yik tarik nö hang ṙô sinrōl, tötīpö fanöö, līör, rikòn ranöng, tö hayūlökuföt fanöö, tökeuheūttöre mihëṅṙö inrē ranöng tinkökö, ṙòkhöre ngaich yik tarik, pumnāmö tarik, tökeuheūttöre ëlô inrē nö afukngöre nö salām ök humlum insā ök asöklö ök rācha Nēpukatnēsar.

⁸Lökten hē e yik rēvre aṅ Kālti nö yihtöre nö vënyö yik Yahūti.

⁹Ngö ṙô cha-a tök rācha Nēpukatnēsar, Ō Rācha, örheūheu man yēḵ aṅ!

¹⁰Me-eṅ, Ō Rācha, vamītö chöngö, öm hōtö tarik yip hamang ṙô öp sinrōl, tötīpö fanöö, līör, rikòn ranöng, töhayūlö kuföt fanöö, tökeuheūttöre inrē ranöng tinkökö, ngaich afukngöre nö salām ngam humlum insā;

¹¹Ngaich ök töt ma-a fukngöre nö salām kavalhötvö min nö i kūö ngam töhūkūö tameūyö.

¹²Rīkre yip umuh Yahūti yip vahīlö meh nö i kui në panam Pēpilön: Satrāk, Mësāk, Apĕtnikō inrē. Ō Rācha, cha-a yip tarik töt hamangṙô meh; hö-ö yip nö lök la-en yip tēvmeh hēk inrē öt salām ngam humlum insā ngam asöklö meh.

¹³Ngaich Nēpukatnēsar nö i tanainy elmat re nö tölṙô kinëtö Satrāk, Mësāk, Apĕtnikō inrē. Ngaich cha-a nö kēten vē tarik nö i kūö ök rācha.

¹⁴Ngö ṙô ngaich Nēpukatnēsar tö cha, Kô-en öng, Ō Satrāk, Mësak, Apĕtnikō inrē, tö yīö ötlök la-en yip tēv chu hēk inrē öt salām ngam humlum insā ngam asöklö chu?

¹⁵Yĕh ngaich yē yīö lēn öi hangṙô ngam sinrōl, tötipö fanöö, līör, rikòn ranöng, töhayūlö kuföt fanöö, tökeuheuttöre mihëṅṙö inrē ranöng tinkökö, öi afukngöre salām ngam insā ngam vahīlö chu, lööken min yī-ö; yē yīö pöri öt salām, ilööṙen min yī-ö kavalhötvö i kūö ngam töhūkūö tameūyö; achīö ap tēv ṙāmānyen yīö min ṙā-ang eltī chu?

¹⁶Ngaich sapṙô rācha Satrāk, Mësak, Apëtnikō inrē, Ō Nĕpukatnēsar, öt kusīknyôre in sapṙô meh in e.

¹⁷Yē e nö ngatī, kô ap Tēv ih öp lahök la-en ih nö ṙānyen ih nö ṙā-ang i kūö ngam töhūkūö tameūyö; ṙānyen ih ap min inrē nö ṙā-ang eltī meh, Ō rācha.

¹⁸Yĕn rö-ö pöri, akahalōn man yĕh tö e, Ō rācha, tö ih öt hòṅ lök la-en yip tēv meh hēk inrē öt hòṅ salām ngam humlum insā ngam asöklö meh.

¹⁹Tööḵlö ngaich Nēpukatnēsar tö inngëntachōich, ngaich ök arëkūö ò nö haṙī-ingre Nö in Satrāk, Mësak, Apĕtnīkō inrē. Ngaich anga-aṅ nö tölṙô inṙāchtökūö ngam töhūkö tameūyö nö sat köl kumlēḵ nö mötlö tö re yĕn haṙāchö.

²⁰Ngaich anga-aṅ nö tölṙô yip tökalēḵ tarik aṅ i yik kumyung in ò nö nyëkö Satrāk, Mësak, Apĕnikō inrē, ngaich kavalhötnen cha nö i kūö ök töhūkūö temeūnyö.

²¹Ngaich vē tariknö nyëkö nöng inyut töhëich tö nuk tökiröng inyut cha, töt këlu inyut cha, sapīöv cha, nup tahëng inrē tökiröng inyut cha, kavalthöt vö cha-a ngaich nö el kūö ök töhūkūö tameūyö.

²²Kūö chöngö ök rācha nö keung ök tameūyö nö ṙāchökūö, ökngö kūö ngaich ök pinchôllökūö e tö yik tarik kamë-eṅ Satrāk, Më-sak, Apëtnikō inrē.

²³Fuk el kūö ök töhūkūö tameūnyö nöng nyëkhakṙen vē tölūöi tak tarik, Satrāk, Mësak, Apĕtnikō inrē.

²⁴Pingangkūö ngaich ök rācha Nēpukatnēsar choholre ngaich nö kurāten. Ngö ṙô ngaich anga-aṅ tö yik mahalēnöre, Röh öi ayī-ö lūöi tak kavalhöt tö tarik tö tönyëkö i kūö tameūyö? Sapṙô ök rācha ngaich cha-a, Kô-en, Ō rācha.

²⁵Ngö ṙô ngaich anga-aṅ nö sapṙô, Fën tak maheuṅk pöri chu-ö tötarik tötnyëkö, havötköre nö ellōn ngam tameūyö, hö-ö yin inrē nö chök; sā mineūkö kūö kūön yip tēv an ngam finënö.

²⁶Yihtöre ngaich Nēpukatnēsar nö haröhtöre nö i kūö inkūp öp töhūkūö tameūyö, ngaich ngö ṙô, Satrāk, Mësak, Apĕtnikō inrē, tarik ngamTēv Lamātulöng, kunyī-inyre, yihtöre ihih! Ngaich Satrāk, Mësak, Apëtnikō inrē nö kunyi-inyre nö ṙā-ang i kūö ök tameūyö.

²⁷Ngaich yip setrāp, mahayöng, mahalēn ök rācha inrē nö hamūlöre ngaich meuk ök tameūyö nö öt kanô-òṅvö nö i alaha yik tarik; öt ökngö nuk keūyö i kui cha, nuk tökiröng inyut cha öt lökngöre, öt tōngö inrē cha-a nö el kūö tameūyö.

²⁸Ngö ṙô ngaich Nēpukatnēsar, Tökôlò an yēḵ Ngam Tēv Satrāk, Mësak, Apĕnikō inrē, ngam tamīntö ma-aṅhāṅnga re nö ṙānyö yip tarik ò, yip mahayönglenre nö in ò, ngaich nö rööḵngen tī tö chöngö ngam rācha, nö kētö nuk alaha cha nö öt lök la-en ane inrē öt salām töng tēv höng ngam Tēv cha.

²⁹Lökten chin vī chöngö: Yip tarik, pumnāmö tarik, hēk inrē tökeuheūttöre ëlô töchōchô tö ngam Tēv, Satrāk, Mësak, Apëtnikō inrē nö chiṙësi alaha min nö patik,tiṙōli min inrē nup patī cha; pòn rö-ö nö tahëngu tēv tökô nö ngatī inlahen nö ṙā-any.

³⁰Ngaich ök rācha nö hapōilen Satrāk, Mësak, Apĕtnikō inrē nö i nuk panam Pēpilön.