Read Car_Nicobarese TANĪ-ĔL 4 Bible Online

TANĪ-ĔL 4 - Car_Nicobarese bible

TANĪ-ĔL 4

¹Ṙā-ang ik rācha Nēpukatnēsar nö lamöö i taṙòkhöre tarik, pumnāmö tarik, tökeuheūttöre ëlô inrē, yip mī-iyöng ing tumlat nö ṙòkhöre: Lanāmö yēḵ ṙūölöre ṙôken in yīö!

²Tölöök an tö lōn chu öich hameuktö nup minkahngö pinngangkūö inrē tī ngam Lamātulöng Tēv nö in chu.

³Yöng ṙôkö nup minkahngö ò, yöng kumlēḵ nup pin-ngangkūö in ò! Töt chanūhuvṙen an ngam pūlngö ò, kaheuk tum köl chap an inrē ngam pūlngö ò.

⁴I patī re chū-ö, Nēpukatnēsar, öich kuchīken kôlò inrē el öp patī chu öich rācha.

⁵Hĕng ök heūvö chu ök tö tī-iv tö chu pa-ekūö; hē chu hulalhaka el chamam ngaich nuk chanöh ellōn tömeūkö inrē aṅ elkui chu nö pinhëṅtökūö chu.

⁶Lökten chu vītö chöngö öich hōtö yik taṙòkhöre tö-akaha tarik aṅ Pēpilön nö kētu nö i kūö chu, pò cha nö hōtu nö mikahtölōn chu tö manah ngam heūvö.

⁷Yih ngaich yik tömilūönö, mahachū, aṅ Kālti, yōm mikahakūö inrē tö taneūsömat; ngaich chū-ö vënyö ngam heūvö in cha, hö-ö pöri cha-a kô nö mikahtölōn chu tö manah e.

⁸Uhē-ĕren ang Tanīĕl nö yihtöre nö i kūö chu kaheūkö minë-eny anga-aṅ nö Peltasasar nö sā minë-eny öp tēv chu, ök tö-īnu tö ma-alaha yip töhet tēv ngaich chū-ö vënyö ngam heūvö in ò, öich ngö ṙô,

⁹Ō Peltasasar, yöngkūö tömilūönö, kūö chu akahalōn tö ngam ma-alaha yip töhet tēv nö in meh tö meh inrē öt kanihnguṙen tö öt mikah kūö; ngih ön yih heūvö maheuṅk chu; vë-enynang chu tö manah e.

¹⁰Në nun tömeūkö aṅ elkui chu hē chu hulalhaka el chamam: ngëcha chū-ö, ngaich meuk, hĕng māṅ öp chōn ellōn ngam tumlat; marôlòng anga-aṅ.

¹¹Sīöp ngaich ök chōn ngaich vītöre nö töngëḵ söllö elkui inrē aga-aṅ nö el halīögö ngaich meūkö anga-aṅ i manā-angkūö ngam tumlat nö ṙòkhöre.

¹²Vain up rōi ò pōyen nuk ṙòng ò inrē, ngaich anū-ö nö nyā-aṅ kūö taṙòkhöre. Kôtökūö nup töṙeūla tö tönyat nö elkatòh ò, iyöng i pak ò inrē nup chehechōn aṅ el kuföt, ṙòkhöre inrē tö-alahav nö nyā-aṅ in ò.

¹³Ngaich chū-ö meuk nuk tömeūkö aṅ elkui chu hē chu hulalhaka el chamam, yĕh meuk, hĕng taka ök amahaṅtī, töhet ök, yôntī nö ṙā-ang el halīöngö.

¹⁴Pōitô ngaich anga-aṅ nö hū-a nö ngö ṙô, Kūöltö ngam chōn, ṙalngö nup pak ò inrē, keuheūtngen nup rōi ò pirātngen nup ṙòng ò inrē; hökngen nup ṙòng ò inrē; hökngen nup töṙēula nö falngöre nö ṙā-ang elkatòh ò nup chehechōn inrē nö ṙā-ang i nup pak ò.

¹⁵Ṙāngö ngam kaṙālö nup ṙĕh pöri nö el eumlat, vöönö tö vët nyanëk mās inrē, nö ellōn minë tö-ayal kiyôp ngam elkahôyö. Hökngen ò nö nyôp tö tacham ngam halīöngö; hökngen ò nöng sā nup töṙeūla i kui kiyôp ngam tumlat;

¹⁶Hökngen öp kui lōn ò nö haṙī-ingre tö kuilōn tarik, hökngen öp kuilōn töṙeūla nö kētu nö in ò; hökngen nup tö sat ṙētak nö chööḵngö kui ò.

¹⁷Lamökten i chöngö yip amahāṅti ön ngih sācha, lamökten i ṙô yip töhet ngam chöngö, pòn hōtu yip tö-aṅ nö akahalōn tö ngam Lamātulöng nö hayöng pūlngö tarik, ngaich kētö e ip chūök lōn ò, ngaich i kui e tī nö ha-uichtö öp manā-angkūö ṙôngòng tarik.

¹⁸Meūkö öng ngih heūvö tö chu, chu-ö rācha Nēpukatnēsar. Vënyö öp manah e me-eṅ, Ō Peltasar, kūö yip tö-akaha tarik nö ṙòkhöre i ngam pūlngö chu nö ötkô nö mikahtölōn chu tö manah e, kô pöri me-eṅ, pò ngam ma-alaha yip töhet tēv nö in meh.

¹⁹Ngaich Tanīĕl, ök töminënyu tö Peltasasar, nö rahëichtaṙen nö pingangkūö, pinhëṅtökūö ò inrē nuk chanöh lōn ò. Ngö ṙô ngaich ök rācha, Peltasasar, uh an yēḵ ngam heūvö hēk inrē öp manah e nö pinhëṅtökūö meh. Mā chu, lamöö in cha an yēḵ ngam hēuvö cha-a yip tösumrīk tö meh öp manah e inrē löö in yip lā-al meh, ṙô Peltasasar nö sapṙô!

²⁰Öp chōn maheuk meh, öp samīöp ngaich vītöre nö töngëḵ, lökten ök el kui ò nö söllö nö el halīöngö, ngaich meūkö angū-ö nö söl i manā-angkūö ngih tumlat nö ṙòkhöre;

²¹Öp tövāyö rōi tö pōyen ṙòng inrē i ṙòng ò nuk nyā-aṅkūö taṙòkhöre; kôtökūö inrē nuk töṙeūla elkahôyö tö tönyat nö elkatòh ò, ök tö-aṅhaṅv pak inrē tö nup chehechōn nö iyöng.

²²Me-eṅ man, Ō rācha, öm samīöp ngaich vītöre ngëḵ. Ngaich ngam ṙôkö meh nö sīöp söllö ngaich nö el halīöngö, ngam pūlngö meh inrē nö sölngö i manā-angkūö ngam tumlat.

²³Öp lökten ngam rācha nö meuk ök töhĕng tak amahaṅti, ök töhet, yamônti nö ṙā-ang el halīöngö tö ngö ṙô, Kūöltö ngam chōn kumpāhan, ṙāngö ngam kaṙālö nup ṙĕh pöri nö el tumlat, nyëkö tö vët inmöp mās inrē, nö el nup tö-ayal kiyôp ngam elkahôyö; hökngen ò nö nyôp tö tacham ngam halīöngö; hökngen ò inrē nö hol nup töṙeūla el ngam kahôyö, hanöng saha nup tösat ṙētak nö chööḵngö kui ò;

²⁴Ngih ön manah e, Ō rācha: Chöngö ngam Lamātulöng an, ngam yamih nö i kui ngam mā chu ngam rācha,

²⁵Tö meh min ahōṙi ṙā-ang i tarik, ngaich öp elyöngö meh min nö holtöṙah nup töṙeūla el ngam kahôyö; vītuṙen me-eṅ min nyā kiyôp sā kōiny nūā, ngaich nyôp min me-eṅ tö tacham ngam halīöngö, sat van nup ṙētak min nö chööḵngö kui meh, hanöng saha meh akahalōn tö ngam Lamātulöng nö hayöng pūlngö tarik, kētö e inrē nö ip chūök lōn ò.

²⁶Ngaich sā e nö hachöngtenvö ngam kaṙālö nup ṙĕh öp chōn nö ṙā-ayö, köp an min ngam pūlngö meh nö in meh, löktökūö öp hē meh akalahōn tö ngam Halīöngö nö hayöng.

²⁷Ō rācha, lökten man hō-o ngaich inlēnö meh tö chu; litòk nup tökööl lökten in inrūnöre i lanöökö, nup öt kanöölö meh inrē lökten i inmeuktö miṙēlōn i töhakihtuṙen, hòṅ e nö amāhaiṙen nö ṙūötu rô-òten ngam lanāmö meh.

²⁸Ṙòkhöre nun në nö yih nö i kui ök rācha Nēpukatnēsar.

²⁹I kinheūten tönët sīön chumngëṅtö anga-aṅ nö havötöre nö i kui ökpatī rācha i Pēpilön,

³⁰Ngö ṙô ngaich ök rācha, Röh öng nö ngih tökiröng Pēpilön, nö vahīlö chu i kumlēḵ chöngö chu nö elyöngö rācha nö ineū-euṅ minā-aṅ chu inrē?

³¹Hē minë ṙô nö ṙòngmö elvāng ök rācha suktöre ngaich ök ṙô nö ṙā-ang el halīöngö, Ō Rācha Nēpukatnēsar, lamöö in meh ana ngam töṙônyu: Ṙāngen meh an nö ngaich ngam pūlngö meh,

³²Ngaich man min ahōṙi ṙā-ang i tarik, ngaich öp elyöngö meh min nöng i nup töṙeūla el ngam kahôyö; ngaich vītuṙen min me-eṅ nyā kiyôp sā kōiny nūa; sat van nup ṙētak min nö chööḵngö kui meh hanöng saha meh haköptöre tö ngam Lamātulöng nö hayöng pūlngö tarik ngaich kētö e nö ip chūök lōn ò.

³³Ilööṙen ngam ṙô nö hateūngi nö in Nēpukatnēsar. Ahōṙi ngaich anga-aṅ nö ṙā-ang i tarik ngaich nyā kiyôp nö sā kōiny nuā, nyôpö alaha ngaich anga-aṅ tö tacham ngam halīöngö hanöng saha ök keūyö ò nö marôlòng nö sīöp sā sanëôk matēṙö, sā kinsòh chehechōn nup kinsòh ò inrē.

³⁴I manāngen nup sakāmö chū-ö, Nēpukatnēsar, môklökūöre el halīöngö, ngaich havantö re ök mikah chu nö in chu, ngaich chū-ö hakôlò ngam Lamātulöng, ha-öny, eū-an inrē ngam tö-örheūheu nö aṅ; Pò ngam pūlngö ò nö töt chanūhuvṙen nö pūlngö, tö köp inrē ngam pūlngö ò i tumköl chap;

³⁵Ṙòkhöre yip aṅ ngam tumlat nö kaheuktu nöng törö-övö; kahang tīre sā lōn ò i nup el halīöngö in yip aṅ ngih tumlat inrē; öt hĕng tak tökô nö haköp kël ò hēk ngö ṙô tö ò, Suh ap la-en meh?

³⁶Hē e ngam mikah chu nö havantöre nö in chu; ngaich kūö ngam kanôlò ngam pūlngö chu, minā-aṅ chu; lanöökö e inrē nö havantöre nö in chu. Chöhöh chu ngaich yik mahalēnö chu mā chu inrē, ngaich chū-ö köp im pūlngö chu, ngaich hēk nö ṙūötuṙen ngam ṙôkö chu nö in chu.

³⁷Ngaich chu-ö, Nēpukatnēsar, ha-öiny, hapōīlö ane inrē eū ngam Rācha ngam halīöngö; kūö nuk la-en ò nö töhuveū nup talöökö ò inrē nö tölöök; ngaich cha-a yip lamök i inkeūlen re mihôiṅ anga-aṅ nö hakūöṅnngen cha.