Read Car_Nicobarese TANĪ-ĔL 5 Bible Online

TANĪ-ĔL 5 - Car_Nicobarese bible

TANĪ-ĔL 5

¹Vī tökiröng nyinā-aṅ yik töhĕng köṅny mā ò ök rācha Pelsasör, i kūö yik töhĕng köṅny inrē anga-aṅ nö òk vāin.

²Hē Pelsasör nö kalah ök vāin, ngaich tölṙô kinëtö nuk chūökṙen anga-aṅ nuk humlum rupīö inrē nuk kahëtö ök yöng ò Nēpukatnēsar nö ṙā-ang el ök tempöl i Yērusalem, pòn hōtu ök rācha tö yik mā ò, yik pīhö ò, tö yikpīhö ò töl nö òk kūö u.

³Ngaich cha-a nö kētö nuk humlum rupīö inrē chūökṙen nuk tökē-ĕyö nö ṙā-ang el ök tempöl, ök patī ngam Tēv i Yērusalem; ngaich ök rācha tö yik mā in ò inrē, tö yik pīhö ò, tö yik pīhö ò töl inrē nö òk aṅ u.

⁴Òk vāin cha-a ngaich ngaich ha-öiny yip tēv humlum rupīö inrē, mās, vët, chōn, ihong inrē.

⁵Ilööṙen ngaich nuk kuntī tarik nö meūkö ngaich kūich nö i kaha ök tö sumītö kaha patī ök rācha, kamlö nö ik chūök ëāṅvö tösökhaka; ök rācha ngaich rācha nö meuk ök kël hē e nö kūich.

⁶Lunyīṙö elmat ngaich ök rācha nö haṙī-ingre, ngaich nuk chanöh ellōn ò nö pinhëṅtökūö ò; ngaich anga-aṅ nö öt kalē-en, ponghen höö inrē nuk kinmônö ò.

⁷Pōitô ngaich ök rācha nö hūkö kinëtö yik mahachū, yik aṅ Kāltī, tö yik yōm inkaha taneūsömat inrē. Ngö ṙô ngaich ök rācha tö yik tö-akaha tarik aṅ Pēpilön, Öp töng vamë-ekūö ngih tökūichö, hameukhömat chu inrē tö manah e, hayūtö min tö tö-amëla mat töhuṙing hilā, sayōku likeun inrē, tö humlum ngaich vīlöngö min ngih linūöyö nö mahayöng nö ing pūlngö.

⁸Ṙòkhöre ngaich nö yih tö-akaha tarik ök rācha, hö-ö pöri cha-a nö kô nö vë-ekūö e hēk inrē nö mikahtölōn ök rācha tö manah e.

⁹Kiröngö pinhëṅ-eṅkūö ngaich ök rācha Pelsasör, lunyīngöre elmat ngaich nö harīkngöre; ngaich yik mā in ò nö kalūöchöre elkui.

¹⁰Yih ök rānī nö el ök chūök nāhaṅl hôl, kūö ṙô ök rācha tö yik mā in ò inrē; ngö ṙô ngaich rānī, Ō rācha, örheūheu man yēḵ aṅ! Uh nup yēḵ chanöh ellōn meh nö pinhëṅtökūö meh hēk inrē um haṙī-ingre lunyī elmat.

¹¹Hĕng taka öp umuh tarik ing pūlngö meh tö ma-alaha tö aṅ i yip töhet tēv. Hē nuk sakāmö ök yöng meh anga-aṅ nö kôti nö aṅhaṅv-in tö hanātö mikah elmat mikah inrē sā mikahyip tēv, ngaich ök rācha Nēpukatnēsar, ök yöng meh, nö vīlen ò nö yöngkūö tömilūönö, mahachū, aṅ Kālti, yōm inkaha tanēusömat inrē,

¹²Pòn aṅhaṅvin töp tölöök ma-alaha, inkaha, mikah elmat inrē nö vë-eny manah në heūvö, tut chīl, vinëonyö kanihngen elmat inrē in ngòh Tanīĕl nö kôti,ngam tökaheūkö minë-eny tök rācha nö Peltasasör. Yĕh, havëten Tanīĕl ngaich, anga-aṅ öp min mahameuktö öp manah e.

¹³Kēhötvö ngaich Tanīĕl nö i kūö ök rācha. Ngö ṙô ngaich ök rācha tö Tanīĕl, Më-e man Tanī-ĕl, töhĕng tak aṅ i yip tö-ahöti aṅ Yūtā, kahëtö ök yöng chu ök rācha öm ṙā-ang Yūtā.

¹⁴Hāṅngö meh chin tö-aṅhaṅv-in tö ma-alaha yip töhet tēv, tö meh inrē aṅhaṅvin tö hanātö; mikah elmat, tölöök mikah inrē nö kôti nö in meh.

¹⁵Ngaich yin vē tö-akaha tarik, mahachū, nö kēhĕtvö nö i kūö chu nö vë-ekūö ngih tökūichö mikahtölōn chu inrē tö manah e; hö-ö pöri cha-a nö kô nö hameuktö manah e angu-ö.

¹⁶Ngaich pöri chu-ö hāṅngö meh kô kētö manah halööknyö nup ötmikah elmat inrē. Yĕh, yē meh kô vë-ekūö ngam tökūichö mikahtölōn chu inrē tö manah e, ngaich me-eṅ min hayūtö tö tö-amëlamat töhuṙing hilā, ngaich sayōku likeun tö humlum, ngaich linūöyö min öm mahayöng ing pūlngö.

¹⁷I kūö ök rācha ngaich ang Tanīĕl nö sapṙô, Hökngen nup raneushö yēḵ nöng raneushö meh, nup ṙëhe lumrāḵ inrē nö löö ip tahëng nö kētu; höng vë-ekūö ngam tökūichö pöri chu-ö min im rācha mikahtölōn ò inrē tö manah e.

¹⁸Ō rācha, ngam Tēv Lamātulöng an kamë-eṅkūö Nēpukatnēsör ök yöng meh tö inyöngö, kinröngö, kanôlò minā-aṅ inrē;

¹⁹Kūö ngam kinröngö inrē Anga-aṅ nö kē-ĕkūö ò, tö taṙòkhöre tarik, pumnamö tarik, tökeuheūttöre ëlô ṙòkhöre nö kichëyöre pa-ekūö inrē nö ikūö ò, öp lōn ò fëlngen ò anga-aṅ, ngaich öp lōn ò inrē ṙālen ò anga-aṅ ngaich nö aṅ; öp lōn ò hachōhlen ò anga-aṅ, öp lōn ò inrē tumṙeutu ngaich anga-aṅ.

²⁰Hē ò pöri nö hachônglö ellōn re nö lātulöng ngëḵngöre inrē öp ellōn ò lökten ò nö hakeū inlahen re, ngaich anga-aṅ nö kē-ĕyö nö ṙā-ang el öp kantēra re nö rācha, ngaich kē-ĕyö ngam kanôlò ò nö ṙā-ang in ò;

²¹Ngaich anga-aṅ nö ahōṙi nö ṙā-ang i tarik, ngaich vītu ök lōn ò nö sā kuilōn töṙeūla, ök elyöngö ò inrē nö holtöṙah köttö aṅ el inchōn; nyā kiyôp anga-aṅ sā kōiny nūa, nyôp inrē ök alaha ò tö tacham ngam halīöngö, hanöng saha ò nö akahalōn tö ngam Tēv Lamātulöng nö hayöng pūlngö tarik, ha-ūichlö öp lōn re inrē nö i kui e.

²²Ngaich me-eṅ kūön ò, Pelsasör, öt hayāichgö ellōn re, pòrô öm akahalōn tö në,

²³Ngaich pöri me-eṅ hatāilö re lā-al ngam Mā ngam halīöngö; ngaich minë chūökṙen aṅ ngam patī ò nö kētu nö i kūö meh, me-eṅ hēk tö yip mā in meh inrē, tö yip pīhö meh, tö yip pīhö meh töl inrē nö òk vain nö ël u; ngaich me-eṅ ha-öiny tēv rupīö humlum inrē, mās, vët, chōn, ihong inrē, nup tötmeuk, öthang, öt-akahakūö, ngaich pöri ngam Tēv ngam tö-aṅhaṅv eltī tö unhômö meh, ngam tö-aṅhaṅvin inrē tö nup talöökö meh, nö öt eū-eu tö meh.

²⁴Tīniyö ngaich ök kël nö ṙā-ang i kūö ò, ngaich ngih yih tökūichö tö ka-iphötvö.

²⁵Ngih ön yih tökūichö töka-iphötvö MENE, MENE TEKEL, PARSIN inrē.

²⁶Ngih ön yih manah u: MENE, kaheuk nuk sakāmö ngam pūlngö An ngam Tēv ngaich kētö manāngen e;

²⁷TEKEL, kalaha lumngan man ngaich el kinlaha lumngan ngaich kôti hāṅtökūö;

²⁸PERES, michööḵöyö an ngam pūlngö meh ngaich kētu nö i yip aṅ Mëtis aṅ Pörsiā inrē.

²⁹Ngaich ang Pelsasör nö chöngu tö Tanīĕl nö hayūtö, hayūtö ngaich Tanīĕl tö tö-amëla mat töhuṙing hīlā, hĕng ök sayōk humlum i likeun ò, ahangka inlahen inrē anga-aṅ, tö ò nö linūöyö nö mahayöng nö im pūlngö.

³⁰Im angū-ö hatööm ngaich nö fëliyö ang Pelsasör ök rācha aṅ Kālti.

³¹Ngaich Tērīös ök aṅ Mitīa nö kē ngam pūlngö, nö ṙòngmö tafūöl anāi nët samyeūheu ṙēti.