Read Car_Nicobarese TANĪ-ĔL 6 Bible Online

TANĪ-ĔL 6 - Car_Nicobarese bible

TANĪ-ĔL 6

¹Ṙanāmölōn Tērīös angū-ö nö ha-ūichlö töhēngòng nët anāi setrāp nö i kui ngam pūlngö,nö keuhēutngöre chūök nö im pūlngö;

²Lūöi tak yip presiten i kui cha, aṅ incha ang Tanīĕl ök lööṙö tī yik setrāp tö nup hisāp, pòn sōtu öp rācha nö yëḵngen.

³Tö-eūnyu ngaich ang Tanīĕl nö lātulöng tö yip tahëng presiten setrāp inrē, pòn in ò ök tölöök ma-alaha; ngaich ök rācha nö hòṅ vīlen ò nö i kui ngam pūlngö nö ṙòkhöre.

⁴Ngaich yik presiten tö yik setrāp nö chöh löknyö chööḵnyö re, nö vë-eny fālen Tānīĕl tö inlahen ò nö im pūlngö hö-ö pöri cha-a nö kôtökūö tö löknyö ṙô re nö vë-eny fālen ò, pò ò nö kô-en, öt kôti nö in ò vanāchö, fālen inrē.

⁵Ngaich ngö ṙô yik tarik, Hö-ö in hō min kôtö kūö tö löknyö ṙô re vë-eny fālen ngòh Tanīĕl yē hī öt chöhlö e i tinlööken öp chöngö öp tēv ò.

⁶Ngaich vē presiten tö yik setrap nö hamūl lōn re nö yih nö ik rācha, ngaich ngö ṙô tö ò, Ō rācha Tērīös örheūheu man yēḵ aṅ!

⁷Ṙòkhöe yip presiten im pūlngö, tö yik prifek, tö yik setrāp inrē tö mahalēn, tö mahayöng inrē nö hō-o lōn tö ngam rācha nö vītö öp chöngö sinôḵngen inrē, tö öp töng vamë-eṅkūötēv hēk tarik el töluöi anāi sakamö, höng me-eṅ,

⁸Ō rācha, ngaich anga-aṅ min nö sukhötvö nö el kinlōngö lāyön. Ngaich man vīten öp sinôḵngen kūich tö minë-enyre inrē i mat līpöre, hòṅ e nö öt haṙīka, sā ngam chöngö aṅ Mītī, Pörsia inrē, ngam töt hanṙīken.

⁹Lökten ök rācha Tērīös nö kūich tö minë-eny re nö i mat ök līpöre ngaich sōḵngen e.’

¹⁰Hē Tanīel ngaich nö akahalōn tök līpöre nö ngaich nö kūichö mat tö minë-eny, chuh patī re ngaich anga-aṅ i nuk inkūp lökhöt kuföt ò el ök lātulöng urôhò tö luvë-akkūö nö kū-ö tö Yērusalem; sulngöre ngaich anga-aṅ nö lūöi heuh i tö hĕng sakāmö nö vë-ekūötēv ha-öiny inrē nö i kūö ngam Tēv ò, höng sā inlahen re tö lā-urĕh.

¹¹Ngaich yih vē tarik pòn halēn-ngenre ngaich kôtökūö tö Tanīĕl nö i kūö ngam Tēv re nö ve-ekūötev ve-elkūi inrē.

¹²Haröhtö re cha-a ngaich ngaich ngö ṙô nö i kūö ök rācha, tö inlahen ök sinôḵngen, Ō rācha! Röh öm kūich tö minë-eny re ip sinôḵngen, tö töng tarik vame-eṅkūö töng tēv hēk tarik inrē el në tö lūöi anai sakāmö höng me-eṅ, Ō rācha,ngaich ök rācha, Köp an nö sökhaka, nö sā chöngö aṅ Mīt, Pörsīa inrē nö töt hanṙīken,

¹³Ngaich cha-a nö sapṙô nö I kūö ök ṙācha, Tö Tanīĕl, tö hĕng tak aṅ in yip tö ahöti nö ṙa-ang Yūta nö öt chumkūöṙen tö meh, Ō rācha, tö ngam sinôḵngen inrē chūök meh kūich tö mine-eny re, ngaich pöri i tö hĕng sakāmö nö lūöi heuh nö vë-ekūötēv.

¹⁴Hē ngam rācha ngaich nö hang minë ṙô; kihngen ngaich anga-aṅ, ngaich nö lōnu tö ṙinā-nyö Tanīĕl ngaich anga-aṅ nö pītnyöre söl i maneuttö ngam tavūöi nö hòṅ ṙānyen ò.

¹⁵Ngaich yik tarik nö yih nö hamūl lōn re nö ik rācha ngaich ngö ṙô tök rācha, Ō rācha, akahalōn tö e nö chöngö aṅ Mīt Pörsia inrē tö sinôḵngen hēk chöngö inrē nup töhaköpi tö ngam rācha nö ötkô nö haṙī-iyö.

¹⁶Ngaich ök rācha nö chöngu, kētu ngaich Tanīĕl ngaich suchötvö nö el kinlōngö lāyön. Ngö ṙô ngaich ök rācha tö Tanīĕl, Ṙānyen meh an yēk ngam Tēv meh, lahök la-en meh höng iṙūöhen!

¹⁷Hĕng ngaich ök ihong tökētu ngaich ṙātu nö i kūö ök kinlōngö, ngaich ök rācha nö hapanngökūö e, nö aṅtī tö ök kinlong re hol re inrē tök kinlong yik mā ò, pòn sōtu nö hĕng töhaṙīka i inlahen Tanīĕl.

¹⁸Chuh patī re ngaich öp rācha, ngaich hĕng mitööm nö ahik; öt hĕng inlōkökūö tökēhĕtvö nö in ò, falngöre inrē inṙôhò nö ṙā-ang in ò.

¹⁹I ṙanānglö ngam sakāmö, ök rācha ngaich nö chōholre nö kurāten nö chuh ik kinlōngö lāyön.

²⁰Hē ò ngaich nö röhta nö ip kinlōngö ök chūök Tanīĕl, hū-a ngaich anga-aṅ nö sā ṙôtö haṙīvlōn nö ngö ṙô tö Tanīĕl, Ō Tanīĕl,tarik ngam tö-aṅ Tēv, kô ang ngam Tēv meh nö ṙānyen meh ṙā-ang i nup lāyön, ngam lahök la-en meh höng iṙūöhen?

²¹Ngaich ngö ṙô Tanīĕl tök rācha, Ō rācha, örheūheu man yēḵ aṅ!

²²Tīntö ma-aṅhaṅngare an ngam Tēv chu nö tilupngö elvāng në lāyön ngaich anū-ö nö öt chökhuṙen tö chu, pò chu öt kôti fāluṙen i kūö ò i kūö meh chin inrē, Ō rācha öich öt la-evṙen tö tövaich.

²³Kiröngö ṙā-nāmölōn ngaich ök rācha, ngaich chöngu tö Tanīĕl nö kēlöngö nö ṙā-ang el ök kinlōngö, öt kanôtuvö aṅ in anga-aṅ tö tö yô-òv pinlāngen ò, pò ò nö hayönglenre nö im Tev re.

²⁴Ngaich chöngu ök rācha, tö yik tarik vame-eny fālen Tanīĕl nö kētu ngaich sukhötvö nö el kinlōngö lāyön cha-a, tö yik kūön cha, tö yik pīhö cha inrē; höng ölti cha-a nö lātaṙeū nö el ök kilōngö ngaich nuk lāyön nö mihôin töcha likölngö nuk tangëḵ cha inrē nö panyëny.

²⁵Ngaich ök rācha Tērīös nö kūich tö līpöre nö i taṙòkhöre tarik, pumnāmö tarik, i tökeuheūttöre ëlô yip mī-iyöng kūö ngih tumlat nö ṙòkhöre: Lanāmö yēḵ ṙūölöre ṙôken in yīö.

²⁶Vītö chöngö ing pūlngö chu tarik nökicheyöre pa-ekūö inrē nö i kūö ngam Tēv Tanīĕl, pòn Anga-aṅ tö-aṅ Tēv, tököp nöng örheūheu; Ngam pūlngö ò min öt hētu nö piyāyi, söl ip manā-aṅ min ngam pūlngö ò.

²⁷Ṙā-anyi ana, kē inrē, vī minkahngö an pinngangkūö inrē el halīöngö, tumlat inrē. Anga-aṅ an mahayööken Tanīĕl nö ṙā-ang i kumlēḵ nup lāyön.

²⁸Kôlò ngaich ang Tanīĕl i rô-òten Tērīös nö hayöng, i rô-òten Sairös nö hayöng, ök aṅ Pörsia.