Read Car_Nicobarese TANĪ-ĔL 7 Bible Online

TANĪ-ĔL 7 - Car_Nicobarese bible

TANĪ-ĔL 7

¹Ik raneh samyeūheu Pelsasör ök rācha aṅ Pēpilön, ang Tanīĕl nö heūv, meuk ök el kui ò inrē hē ò nö hulalhaka nö el chaman re. Kūich ök heūvö re anga-aṅ ngaich, vë-eny e ngaich nö keuheūtnyö re ṙô.

²Ngö ṙô ngaich ang Tanīĕl, Meuk chin ip heūvö chu tö hatööm, yĕh meuk, minë töfën lā kuföt ngam halīöngö nö pasavlöng tī tö ngam tökiröng mai.

³Ngaich fën nòng nuk tökiröng töṙeūla meutlö nö ṙā-ang el ngam mai, tö kö harīkngöre tö höö.

⁴Sā lāyön ök mu-urĕh nö sanëòk tö sanëòk matēṙö. Ngaich hē chu hatīönken ò nyòklöngö ngaich nuk sanëòk ò, chātlöngö ngaich anga-aṅ nö ṙā-ang el tumlat ngaich asöklöng nö i kui nuk tönët kalröön ò nö sā tarik; ngaich kētu kuilōn anga-aṅ tö kuilōn tarik.

⁵Yĕh meuk, ök tahëng nòng töṙeūla, innët nòng, tösā për. Hĕng lā chinātlö anga-aṅ; lūöi nuk ranūmö elvāng ò ihôi nuk kanap ò; ngaich tölô anga-aṅ, Chōholre, pōi vat öm mīktö alaha.

⁶Ngëicha chū-ö ngaich unôichrit ngih, yĕh meuk, ök tahëng tösā līōpāt, töfënö sanëòk nö i uk re tö sanëòk chehechōn; fënö kui inrē ök töṙeūla; ngaich kētu pūlngö anga-aṅ.

⁷Unôich chū-ö tö ngih, meuk heūvö tö hatööm; yĕh meuk, ök finënö töṙeūla, pinhë-eṅkūö tö yahlö kumlēḵ inrē; kanāpu anga-aṅ tö tökiröng vët; mīkhöti anga-aṅ liköl inrē nö pinyeny, aṅtī tö elröön re inrē nö röön tö kui nup tahëng. Harīkngöre anga-aṅ tö nup töṙeūla mu-urĕh tö ò nö ṙòkhöre; sömö sinrōl inrē anga-aṅ.

⁸Hatīönkö nuk sinrōl chū-ö, yĕh meuk, ngaich hĕng ök tömeuinylö in u nö tahëng sinrōl, tökūöṅnö, I kūö e nuk tölūöi raneh sinrōl nö teuklöngö holtö ṙĕh re; yĕh meuk, mat nuk umuh in ngih sinrōl tösā mat tarik, elvāng inrē tö ṙô tö tökiröng ṙô.

⁹Hē chu ngëcha, ṙātu ngaich nuk kantēra ūichlöre ngaich ök hĕng tak mā misī; sā isōho tökënngö tacham ök inyut ò, sā töhet sanôi sīṅp ök keūyö i kui ò; töhūkūö tameūyö ök kantēra ò, töhūkūö tameūyö nuk kalröön inröl ò.

¹⁰Hëmnyi ök tameūyö, ngaich löknyö kūö ò nö yihtöre; hĕng köṅny tököṅnyu nö lök la-en ò, söm köṅny tum van tösöm köṅny sökhak nö i kūö ò; kinṙôka ngaich nö inkaha fālen, fehnyu kūö ngaich nuk līpöre.

¹¹Ngëcha chū-ö ngaich kūö ṙô nuk tökiröng ṙô ök sinrōl nö kahôka. Hē chu ngëcha, fëliyö ngaich ök töṙeūla, ngaich ök alaha ò töfëli kētu ngaich nö föngi nö i kūö tameūyö.

¹²Nuk chööḵṙen nuk töṙeūla pöri kē-ĕyö nuk pūlngö u, ṙūötu ṙô-òten pöri nuk nômö cha i töhĕng hē töhĕng ṙētak inrē.

¹³Ngaich meuk chū-ö i heūvö tö hatööm, Yĕh meuk, holtö taṙul ngam halīöngö. Hĕng tak ök umuh yamih tö sā kūön tarik, yih anga-aṅ nö i nuk sakāmö mā misī, ngaich kētu anga-aṅ nö i kuö ò.

¹⁴In ò ngaich ök pūlngö nö kētu, kanôlò pūlngö inrē, pòn hōtu taṙòkhöre tarik, pumnāmö tarik, tökeuheūtöre ëlô inrē, nö lök la-en ò; töt chanūhuvṙen an ngam pūlngö ò, ngam töt chaṙēviyö min, ngam pūlngö ò inrē, Töt panyāingen min.

¹⁵Ngaich pöri chū-ö, Tanīĕl, öp ma-alaha in chu nö paṙūtalōn tö nup heūvö el kui chu inrē nö pinhëṅtökūö chu.

¹⁶Yihtöre chū-ö ngaich ik töhĕng tak in cha yik tösökhaka nö umuh ngaich hatönan töp tökô-en inlahen në nö ṙòkhöre. Ngaich vë-eny-nang chu anga-aṅ, mikahtölōn chu inrē tö manah u.

¹⁷Në töfënnòng tökiröng töṙeūla, rācha nun töfën tak nö chamôhòlre min nö ṙā-ang el ngam tumlat.

¹⁸Ngaich pöri yip töhet aṅ im Lamātulöng min nö kē ngam pūlgö, ngaich örheūheu nö amīnu töngam pūlngö, höng öt chaūhuvṙen.

¹⁹Ngaich chū-ö hòṅ akahalōn tö kanô-en inlahen ngam finën nòng töṙeūla, ngam töharīkngöre, töyahlö pinhëṅeṅ, tökanāpu tö vët, kinsòh tö mās inrē; ngam mamīkhöti, lumköl inrē nö pinyeny, ngaich röön tö kui nup tahëng tö el röön re;

²⁰Inlahen nup tösöm sinrōl inrē nup i kui u, öp tahëng inrē sinrōl öp tö meuinylö nö urēhĕkūö nuk tölūöi nö fukngö aṅ in u, ök sinrōl tö matu elvāngu inrē tök tö ṙô-òv tö tökiröng ṙô, ök tösā tökiröng tö nuk hol re.

²¹Ngaich hē chu ngëcha, ngaich ngih sinrōl nö kiyung nö lā-al yip töhet, ngaich mihôiṅ tö cha,

²²Hanöng saha nup Sakāmö Mā-misī nö yih, ngaich kētu inkaha fālen yip töhet aṅ im lamātulöng, ngaich yih ngam ṙētak hē yip töhet nö kē ngam pūlngö.

²³Ngö ṙô anga-aṅ: Ngam inlahen ngam finën nòng töṙeūla, finënö pūlngö öp min umuh, i kui ngam tumlat, öp töharīkngöre min tö nup pūlngö nö ṙòkhöre, ngeūktö ngam tumlat öp min nö ṙòkhöre, rööntö kui e, likölngö e inrē nö panyeny.

²⁴Nup tösöm sinrōl pöri, aṅ i ngih pūlngö, söm tak yip min rācha chamôhòlre, tahëng inrē min chamôhòlre unôich tö cha; harīkngöre min anga-aṅ tö më lamā-urĕh, tumṙeūtö yip tölūöi tak rācha min anga-aṅ.

²⁵Kiröngö ṙô öp min nö lā-al ngam Lamātulöng, ngaich haṙei yip töhet aṅ im Lamātulöng, ngaich lōnu min tö inṙīngö në ṙētak chöngö inrē; ngaich anū-ö min nö kētu nö eltī ò, nö hĕng van, nët van ròngti töhĕng van inrē.

²⁶Ūichhak pöri min kamhôṅka nö i inkaha fālen, kē-ĕyö min inrē öp pūlngö ò, nö ngeūktu piyāyi inrē söl ip manāngen.

²⁷Ngaich ngam pūlngö ngam minā-aṅ inrē ngam ṙôkö ngam pūlngö inrē elkatòh ngam halīöngö min nö kētu nö in yip tarik aṅ in yip töhet ngam Lamātulöng; töt chanūhuvṙen min ngam pūlngö cha, ṙòkhöre min nup pūlngö nö lök la-en cha, hang chöngö cha inrē.

²⁸Angū-ö ön ngih kinheūten u. Chū-ö pöri, Tanīĕl, nup ellōn chu nö kiröngen tī nö pinhëṅken chu, lunyīngöre elmat chū-ö ngaich; ngaich pöri chū-ö höng haköpken u nö ellōn re.