Read Car_Nicobarese TANĪ-ĔL 8 Bible Online

TANĪ-ĔL 8 - Car_Nicobarese bible

TANĪ-ĔL 8

¹Im linūöyö samyeūheu ök rācha Pelsāsör nö hayöng ök heūvö nö meūkö tö chu, chū-ö Tanīĕl, unôichrit ök tömeūkö tö chu nö lā urĕh.

²Meuk chū-ö ik heūvö; ngaich hē chu meuk, i Sūsā chu-ö öp tökiröng elpanam, öp ip panam Etöm; ngaich chū-ö meuk ip heūvö i kui öp tahël chū-ö inrē Ūlai.

³Hachônglö mat re chū-ö ngaich meuk, yĕh meuk, hĕng nòng ök kūön sīṅp sökhaka nö i kui öp tahël. Nëtö sinrōl angā-aṅ; nët re innrē nuk sinrōl nö marô-òl, hĕng pöri ök tömarô-òl tök tahëng, ngaich ök tömarôlö nö sīöplö nö unôich.

⁴Ngaich chū-ö meuk ök kūön sīṅp nö sirōl kū-ötö sūng kū-ötö kapā kū-ötö lòhngö inrē; öt hĕng nòng töṙeūla tökô nö sökhak nö i kūö ò,öt hĕng tak umuh inrē tökô nö hayööken nö ṙā-ang i kumlēḵ ò; ngaich anga-aṅ nöng i kanahngenre hapōilöre inrē.

⁵Ngaich hē chu afēngen e, yĕh meuk, hĕng nòng ök kōiny pököre yamih nö löktö lā sūg nö havāngngö kūö ngam tumlat nö ṙòkhöre, nöng öt sustöre nö el tumlat; ngaich ök pököre nö löökö mineūkö sinrōl ihôi nuk mat ò,

⁶Yihtöre anga-aṅ ngaich nö ik kūön sīṅp öktö nëtö sinrōl, ökmaheukchu nö sökhaka nö i kui öp tahël, faltöre anga-aṅ ngaich nö in ò nö i lanīnö re.

⁷Meūkan chū-ö nö yihtöre nöharöhtöre nö ik kūön sīṅp, tainy anga-aṅ nö in ò ngaich sirōl ök kūön sīṅp ngaich ōhotī tö nuk tönët sinrōl ò; öt kanô-òṅvö ngaich ök kūön sīṅp nö sökhaka nö i kūö ò, afukngen ò pöri anga-aṅ nö el tumlat, röön tökui ò inrē; ngaich öt hĕng tak umuh tökô nö hayööken ök kūön sīṅp, nö ṙā-ang i kumlēḵ ò.

⁸Ngaich ök kōiny pököre nö yahen nö hapōilöre; hē ò pöri nö kalēḵ, ohngö ngaich ök tökiröng sinrōl, ngaich ṙënngen e nö sīöplö nup töfën tö löökö mineūkö sinrōl nö kū-ötö minë töfën kuföt ngam halīöngö.

⁹Löknyö ik töhĕng in u nö sīöplö ök töhĕng tökūöṅnö sinrōl, ök töyahlö ṙôkô sanīöpö nö kūö-ö tö lòhngö, kū-ötö chuhöt, kūö-ö tö tövai panam inrē.

¹⁰Sīöplö angū-ö nö kiröng uroh nö söl i minë töpōyen el halīöngö; ngaich rīk re aṅ i minë töpōyen taneūsömat tösuktu tö ò nö el tumlat, ngaich röön tö u nö el tumlat, ngaich röön tö kui u anga-aṅ.

¹¹Hapōilöre anga-aṅ, nö uroh nö sā kūön rācha minë tömaṙôngö; ngaich nuk töt heumköre töföngö tökētu nö kē-ĕyö nö ṙā-ang in ò, ngaich ök töhet chūök ò nö tiṙōli.

¹²Ngaich më tömaṙôngö nö kētu nö in ò nö hol re tö nuk tötheumköre töföngö tökētu kūö tökööl; suktu inrē ngam kanô-en nö el tumlat, höng kanahngenre inrē ngam sinrōl ngaich nö kôlò.

¹³Ngaich chū-ö hangṙô ök töhĕng tak töhet nö ṙô-òvö; ngaich ök tahëng töhet nö gö ṙô tö ök töhĕng tak töṙô-òvö, Tö irô-òten öng ngam tömeūkö innlahen ngam tötheumköre töföngö tökētu, ngam tökööl vamīten töhatngö, ane inrē kinëngö ngam töhet chūök tö më tömaṙôngö nö rööntu kui tö elröön?

¹⁴Ngaich ngö ṙô anga-aṅ tö ò, Nët köṅny lūöyòng nup harap nup peuheū inrē; ngaich ngam töhet chūök min nö havantu nö ip inlahen e töchip.

¹⁵Hē chu, chū-ö Tanīĕl öich meuk ök tömeūkö, lukkenre chu-ö ngaich hòṅ akaha elmat tö e; yĕh meuk, ngaich hĕng tak ök i kūö chu tösökhaka tösā mineūkö tarik.

¹⁶Ngaich chū-ö hangṙô tarik ihôi minë kui ngam tahël Ūlai, hū-a angū-ö, Kēprīĕl, vīten ngòh man tarik nö akaha elmat tö ngam tö meūkö.

¹⁷Yihtöre ngaich anga-aṅ nö haröhtöre nö i chūök chu sökhaka; ngaich hē ò nö yihtöre, pa-ekūö chū-ö ngaich, a fukngöre ngaich chū-ö fāthak-kūö. Ngö ṙô pöri anga-aṅ tö chu, Akaha elmat man, Ō kūön tarik, tö ngam tömeūkö nö ṙētak manāngen.

¹⁸Ngaich hē ò nö ve-ekūö chu, lapat chu-ö ngaich haṙòh fathakkūö el tumlat; lūölken chu pöri anga-aṅ ngaich asöklen chu.

¹⁹Ngö ṙô anga-aṅ ngaich, Yĕh meūk, hòṅ mikahtölōn meh chin tö öp manāngen öp lanīnö min; pò e nö aṅ i nup töhalēnlöng ṙētak öp manāngen.

²⁰I inlahen ngam kūön sīṅp öp maheuṅk meh tö nëtö sinrōl, acha-a yin rācha aṅ Meti Mīt aṅ Pörsia inrē.

²¹Anga-aṅ ngma kōiny pököre rācha a aṅ Krīs; öp tökiröng sinrōl ihôi mat ò, anga-aṅ an raneh rācha.

²²I inlahen ngam sinrōl tö-ohngö, i chūök e ngaich nuk töfën tahëng nö sīöplö, fën nup min pūlngö chamôhòlre nö ṙā-ang i pumnāmö tarik ò, hö-ö pöri nö holtö kumlēḵ ò.

²³Ip manā-aṅ kinheūten cha nö hayöng, yē yip tötlöökö la-en min nö söllö nö ip tölngöre, hĕng tak ngaich öp rācha töt pa-ekūö, öp tö akaha elmat tö chīl, min nö chōholre.

²⁴Kiröng öp min chöngö ò, pinhë-eṅkūö öp min tī ò nö pinyāihanga, teunglen öp min inrē nö i la-enre, fëlngö tökalēḵ tarik öp min tarik inrē aṅ in yip töhet.

²⁵Lökten i milichngen ò min anga-aṅ nö vīten inchīlö nö teunglen nö eltī ò, ngaich anga-aṅ min nö ellōn re lōn nö hapōilöre. Höng rultöre öp min nö fëlngö tömaṙôgö; ngaich uroh min anga-aṅ nö chōholre nö lā-al öp Rācha kūö vē rācha; ohngö pori min anga-aṅ nö öt lökngö eltī tarik.

²⁶Ngam tömeūkö i nup harap i nup peuheū inrē nö kô-en ngam tövënyu nö ngaich; haköpngökūö ngam tö-meūkö pöri, tön tö ṙōltöre sumkam an nö löktökūö töngamuh.

²⁷Ngaich chu-ö, Tanīĕl, öich ötkô, ngaich hulalhak öich vahavö rĕh tum sumkam; chōholre chu-ö ngaich lök i la-en öp rācha; pa-ekūö pöri chu-ö tö ngam tömeūkö öich öt akaha elmat inrē tö e.