Read Car_Nicobarese TANĪ-ĔL 9 Bible Online

TANĪ-ĔL 9 - Car_Nicobarese bible

TANĪ-ĔL 9

¹Ik raneh samyeūheu Tērīös ök kikōnyö kūön Ahāsurös, aṅ Mëtī Mīt finötnyi, ök rācha nö i kui pulngö aṅ Kālti.

²Ik raneh samyeūheu ò nö hayöng, chū-ö, Tanīĕl, neuk i mat nup līpöre nup tūmö samyeūheu, tösā ṙô ngam Mā Tēv nö in Yarimiā ök pròfĕt, töhòṅ teungtökūö urēhĕkūö ngam pinyāingö Yērusalem, im sinat anāi samyeūheu.

³Ngaich chū-ö havöötökūöre im Mā Tēv, chöhan i vine-eṅkūötēv vinë-eṅlkui inrē holtö inhīkö sāk inyut, tisum inrē.

⁴Vë-ekūö ngam Mā Tēv chū-ö ngam Tēv chu halööknyôre inrē vë-eny tökööl re, öich ngö ṙô, Ō Mā, tökiröng Tēv pinhëṅ-ekūö inrē, mahaköp kinlēḵngô tököp inrē tö hanāngenlōn in cha yip töhāngenlōn tö ò mahaköp në chöngö ò inrē,

⁵Köölö fālen in ngaich kēken tövaich ane inrē köölö inlahen öi ahôngen inrē, kānngöre ṙā-ang i minë chöngö meh inchöngten inrē;

⁶Hö-ö in hangṙô yip tarik meh pròfĕt, yip töṙô-òv nö i minë-eny meh nö in yip rācha ih, kūön rācha ih, yöng ih inrē, in yip taṙkhöre tarik ngih panam inrē.

⁷Ō Mā, aṅ in meh an ngam lanöökö, i kūö ih pöri ngam kinlūöchöre el kui, nö sā ing sakāmö töngamuh, i vē tarik aṅ Yūtā, i vē aṅ Yērusalem, i taṙòkhöre inrē aṅ Israel, acha-a yip töröhta acha-a inrē yip tömarôvat, i nup panam chūök tī meh ahōngen cha, tökūö ngam tö ulāituṙen chanökhūtī ngam tī cha nö lā-al meh.

⁸Ō Mā, aṅ i kūö ih an ngam kinlūöchöre elkui, in yip rācha ih, in yip kūön rācha ih, in yip yöng ih inrē, pò ih köölö fālen in meh.

⁹Aṅ im Mā ngam Tēv ih an ngam miṙēlōn inṙē-ĕl tökööl inrē; pòrô īhö ahôngen ò,

¹⁰Ngaich rö-ö rēhĕn hang ṙô ngam Mā Tēv ngam Tēv ih i linökö në chöngö ò, në ṙāhātö ò nö i kūö ih nö lökten in yip tarik ò pròfĕt.

¹¹Ṙòkhöre yin vē Israel nö tôichngen nö im chöngö meh kānngöre yin inrē, sō nö hangṙô meh, Nup tökūichö im chöngö Môsös ngam tarik ngam Tēv, rinūtngövah töchūöku inrē kinlēḵngô nö hōngtu nö i kui hī, pò hī köölö fālen in ò.

¹²Haköpngö minë ṙô re an nö ngaich nup ṙô ò nö lā-alkūö hī yip mahayöngö hī inrē, cha-a yip mahayöngö hī, nö kētö kui hī tö tökiröng öt kanôlò; pòn keuheūtnyöre elkatòh ngam halīöngö nö öttöngatī-ivö nö sā ngam tö ngaich i Yērusalem.

¹³Sā kinūichngö e nö im chöngö Môsös, ṙòkhöre ngih öt kanôlò nö yih nö i kui hī, ngaich rö-ö ayī-ö havëka miṙēlōn im Mā Tēv ngam Tēv hī, öi havööngökūöre tö nup öt lanöököre ngaich hangihtöre töm kanô-en aṅ in ò.

¹⁴Lökten an ngam Mā Tēv nö höngöre tö ngam ötkanôlò ngaich kētö e nö i kui hī; pò ngam Mā Tēv ngam Tēv hī nö tölöök i nup vahīṙen ò nö ṙòkhöre nup tökeuheūten nö ngaich, ngaich rö-ö ayī-ö hangṙô ò.

¹⁵Ō Mā Tēv ih, kamënyö vē tarik meh nö ṙā-ang ip paam Aikup nö aṅtī tö kumlēḵ kël re, ngaich vīlö minë-eny re me-eṅ, sā ngih sakāmö töngamuh, köölöfālen in, kēken ötlanöökö in.

¹⁶Ō Mā, sā nuk tölöök la-en mehnö ṙòkhöre, havööngökūö tanānyöre man yēḵ lanīnöre inrē ṙa-ang im elpanam meh Yērusalem, ngam töhet rung meh; kūö në tökööl fālen ih, ötlanöökö yik muvöhngö ih inrē, ngaich Yērusalem tö vē tarik meh inrē vītöre nöng kūöngô vē taṙòkhöre mahavīlen ih.

¹⁷Ō Tēv ih, yĕh lökten hangṙô ngòh tarik meh nö vë-ekūö meh vë-elkui nö in meh inrē, ngaich kūö meh inrē, Ō Mā, vīten ngam kūö re man nö yang nö i kui ngam töhet chūök meh, ngam tötiṙōli nö ngaich.

¹⁸Ō Tēv chu, asītö elnang re hangihtöre inrē; milaklö mat re ngëichkö ngam pinyāingö ih, ngam elpanam inrē ngam tö minënyu tö minë-eny meh; tö rö-ö in kētö nup vine-elkui i kuö meh i lanöökö re, i ngam tökiröng pöri miṙēlōn meh.

¹⁹Ō Mā Tēv, hangihtöre Ō Mā Tēv, aṙēlö; Ō Mā Tēv kētöre hang ṙô ih; un ahāṅkenre, öm chööḵnyö tö re, Ō Tēv chu, kūö ngam elpanam meh yip tarik meh inrē töhavëka nö i minë-eny meh.

²⁰Hē chu ṙònghöichṙô ṙô-òv vë-ekūötēv inrē, vë-eny tököölre tökööl yip tarik chu inrē Israel, kētö öp vine-elkui inrē i kuö ngam Mā Tēv ngam Tēv chu tökūö ngam töhet rung ngam Tēv chu;

²¹Hē chu ṙònghöichṙô vë-ekūötēv, ngaich ök tarik Kēprīĕl, ök maheuk chu ik tö meūkö lā urĕh, nö yihtöre nö in chu nö yit nö kiteūtöre tö harap i ṙētak tökētuvö.

²²Yih Anga-aṅ, ngaich ngö ṙô tö chu, Ō Tanīĕl, yih chin töngamuh ngaich kē-ĕkūö meh tö mikah mikah elmat inrē.

²³I raneh nyô meh vë-elkui ngaich ök ṙô nö kiröönngöre, ngaich yih chu-ö vë-enynang meh tö e, pò meh öm tölngö töhanghuṙen; lökten man ngëichkö ngam ṙô akaha elmat inrē tö ngam tömeūkö.

²⁴Sat afta i nup samyeūheu nö chöngö i inlahen yip tarik meh töngam töhet elpanam meh inrē nö kinhēutngen ngam fālen, tinahngö tökööl, inlām tö ötlanöökö inrē, kinëtö lanöökö inrē töt chanūhuvṙen inköpngö kūö ngam tömeūkö tö ngam pròfĕt inrē, inchāmö kui ngam tölngö töhet chūökö inrē.

²⁵Lökten man akahalōn akaha elmat inrē tö e, nö löktökūö kinröönngö ngam ṙô, ngam ṙô, nö invannlö minānlö Yērusalem söl i yanīhih ngam töhachāmö el kui, ngam kūön rācha nö sat afta min. Ngaich el tötafūöl anāi nët afta angū-ö min nö mānlöngö nö hēk nö fën minëṙö öp talöökö mak, hē el kanihngen pöri.

²⁶Ngaich unôichrit nup tötafūöl anāi nët afta, öp töhachāmö kui min nö rökiṙen, ngaich rö-ö nö aṅhaṅv-in min; ngaich yip tarik öp kūön rācha öp yamih min nö tīṙōlngö ngam elpanam tö ngam töhet chūök inrē. Kumtö ṙanööingö öp manāngen e min, ngaich söl ip manāngen min öp kinyūngö umuh; pinyāingö, öp chöngö.

²⁷Ngaich anga-aṅ min nö vī öp tökalēḵ kinlēḵgô i tömaṙôngö nö hĕng afta; ngaich im tö ròngti afta anga-aṅ min nö ṙāngen nup tökētuvö; ngaich i rōi kël öp sin-òkkūö min nö yih öp pumyāihanga hanöng saha ngam chöngö nö keuheūten ngaich hōngtu kui min öp pumyāihanga.