Read Car_Nicobarese HŌSĪ 1 Bible Online

HŌSĪ 1 - Car_Nicobarese bible

HŌSĪ 1

¹Ngam ṙô ngam Mā Tēv ngam yamih nö in Hōsī ök kikōnyö kūön Pirī, i nuk sakāmö Yūsayā Yôtam, Āhas, Hēsikiā inrē yik rācha aṅ Yūtā, i nuk sakāmö Yērōpoām inrē ök kikōnyö kūön Yôas rācha aṅ Israel.

²Hē ngam Mā Tēv ik raneh nö ṙô-òv lökten in Hōsī, ngö ṙô ngam Mā Tēv nö in Hōsī, Kuṙòh, kēḵ pīhöre man tö töng mi-inyihköre; ip kūön mī-inyihköre pò ngam panam nö asēhkö tökiröng mī-inyihköre, ngaich nö ṙāngö ngam Mā Tēv.

³Lökten anga-aṅ nö kiröönngöre ngaich kē-ĕ Kōmör ök kikānö kūön Tiplēm, pirūkö nyīö ngaich anga-aṅ, ngaich kayôḵnyö kūön ò tö kikōnyö.

⁴Ngö ṙô ngaich ngam Mā Tēv tö ò, Havëkö minë-eny ò nö Yesrīl; tön rahëchtöre ṙen, ngaich chū-ö min hava hal vah ngam mahām Yesril i kui patī Yēhū, ngaich vīten ngam pūlngö aṅ patī Israel nö ṙāngenre.

⁵Ngaich ngö inlahen angū-ö min ip sakāmö angū-ö, likölngö ap linreny Israel chin min el achāṙö Yesrīl.

⁶Pirūkö nyīö hēk anga-aṅ, ngaich kayôḵnyö kikānö nyīö. Ngaich ngö ṙô ngam Mā Tēv tö Hōsī, Havëkö minë-enyò nö Töt aheuk huvö: pò chu ngaich öt ōtre neūkölōn tö patī Israel, töp lökten chu aṙēlen cha min.

⁷Aheūkölōn pöri chū-ö min ip patī Yūtā, ngaich hayööken cha lökten ngam Tēv cha ngam Mā Tēv; öt hayööken cha nö lökten i linreny öt rēhĕn lökten i fël, öt rēhĕn lökten kinyūngö, öt rēhĕn lökten i kōra, öt rēhĕn lökten tarik aṅ uk kōra.

⁸Ngaich hē ò nö ṙā-angkūö Töt-aheukhuvö nö pōḵ, pirūkö nyīö ngaich anga-aṅ, ngaich kayôḵnyö nyīö kikōnyö.

⁹Ngö ṙô ngaich ngam Mā Tēv, Havëkö minë-eny ò nö Öt tarik chu; pò yīö rö-ö tarik chu, ngaich rö-ö chū-ö min Tēv yīö.

¹⁰Sönen pöri min öp ṙôken kūön Israel ö sā kuyāyö mai, öp töt kanlahen ṙôken, öt rēhĕn nö kanṙeūken; ngaich ngö inlahen angū-ö min, nö ṙënngen ngam töṙônyu nö in cha, rö-ö yin yī-ö tarik chu, ngö pöri min ngam ṙô nö in cha, Kikōnyö yin yī-ö kūön ngam tö-aṅ Tēv.

¹¹Ngaich yip kūön Yūtā kūön Israel inrē min nö hamūlöre, ngaich vīlö töhĕng tak cha-a min nö yöngṙen re, ngaich kiröönngöre min nö ṙāngö ngam panam pòn kiröng min öp sakāmö Yesrīl.