Read Car_Nicobarese HŌSĪ 10 Bible Online

HŌSĪ 10 - Car_Nicobarese bible

HŌSĪ 10

¹Tö-uhāvö rōi an Israel nö vāin, nö tö siöpnyöre ṙòng: sā ṙôken nup ṙòng ò, anga-aṅ nö ṙūölö ṙôken nup tahāklö, sā kanôlò kūö ngam panam ò ngaich vāyö vahī cha-a tö insātēv.

²Harēv ellōn re cha-a; ngaich yip pöchö min nö kôti nö fāluṙen: tiṙölngö nup tahāklö cha an min hachōichngö nup insātēv an min.

³Kônyô yip min nö ngö ṙô, Hö-ö in ayī-ö rāchavö: pò hī öt pa-ekūö tö ngam Mā Tēv: ngam rācha öre, asuh kanô-òṅ ò nö in hī?

⁴Ṙô chanök alaha nup ṙô cha minyôiny-aṅ nö chūöku ṙô nö vī në kinlēḵngô: lökten öp inkaha fālen nö sīöplöre sā nup chōn tö masā alaha kūö nö el chūök tineūchö nö el panô-òṅ.

⁵Pa-ekūö yip min aṅ Samariā tö nup kun nuā i Pĕtaven: pò yip tarik umuh min nö haṙivhen ò, yip kūönṙô inrē umuh tö ṙāmölōn nö in ò, pò ò nö kiröönngöre nö ṙā-ang in ò.

⁶Kē-ĕyö an min inrē nö i Asīriā nö raneushö ap rācha Yarep: kē sumrōngkūö re min Ifrēm, sirōngkūö min inrē Israel töp kanahngen ò inlēnö.

⁷Samariā pöri, rökiṙen ök rācha e, sā pēhĕ kui mak.

⁸Nup lātulöng chūökö inrē i Aven; ngam tökööl in Israel, piyāyi min: töchökhu, töchökhu rōi inrē, sīöplö min nö i kui nup tahāklö cha; ngaich cha-a min nö ngö ṙô tö minë rôngö, Kahul tö kui ih; tö minë rung inrē, Afuk kui ih.

⁹Ō Israel, löktökūö sakāmö Kīpiā man ngaich köölö fālen: ine cha-a nö sökhaka; hòṅ ngam kinyūngö lā-al yip kūön öt lanöökö nö öt kô-ö min nö in cha i Kīpiā.

¹⁰Yē e nö lōn chu, ngaich chökṙen cha chū-ö min; ngaich yip tarik min nö hamūlö nö lā-al cha yē cha nö nyëktu nö i nup tönët tökööl fālen cha.

¹¹Kūön nuā an Ifrēm nö töharūnö, töhāngenlōn nö röönnyö ṙòng sāiny; ngaich pöri chū-ö vāngngö kui öp tövai likeun ò; ha-ūichlö mī-i uk Ifrēm chin min; kuköh an min Yūta ngaich Yāköp min nö piṙeh pinkoho tumlat tī ò.

¹²Teūich tö e inrē im lanöökö, uvòh sā ngam miṙēlōn liruklö ngam tumlat meh töt kuköhö; tön ṙētak chinöhö ngam Mā Tēv an nö ngaich, hanöng saha yanīhih ò nökumṙahtö lanöökö nö i kui yīö.

¹³Kuköh öt lanöökö yin, ngaich uvòh öt lanöökö; nyā-aṅvkūö yin ngaich tö ṙòng minyôiny-aṅ pò meh hayönglenre im talöökö meh, i ṙôkö kumlēḵ yip tarik meh.

¹⁴Lökten ap min tinṙōlen in yip tarik meh, ṙòkhöre min inrē nup chūök kumyung in meh nö piyāyi, sā tī Salmān nö piyāingen Pĕtarpĕl hē sakāmö kinyūngö: holtö kūön re ök yöng nyīö nö kavāli nö panyeny.

¹⁵Ngatī tī min Pētĕl tö yīö kūö yöng öt lanöökö yīö: ip minlīlö peuheū min öp rācha Israel nö rökiṙen nö hatngö.