Read Car_Nicobarese HŌSĪ 11 Bible Online

HŌSĪ 11 - Car_Nicobarese bible

HŌSĪ 11

¹Hē Israel misī nö nyīö, ngaich chū-ö hāngenlōn tö ò, ngaich havënyö ngam kūön re kikōnyö nö ṙā-ang Aikup.

²Hē cha nö havëken cha, kiröönngöre cha-a ngaich nö ṙāngen cha: kētö tökētu cha-a nö i nup Pē-al, föng töta-hūsa inrē nö i nup töka-īpö insā.

³Sönen chū-ö haköpten ifrēm nö kiröönngöre; fūölö cha chū-ö tö kël re, hö-ö pöri cha-a nö akahalōn tö chu öich chū-ö tölööken tī tö cha.

⁴Tūökö cha chū-ö nö tanūöktö tarik, nö nyanëktö hanāngelōn; ngaich chū-ö in cha sā cha yip kamëngö ngam kaneun nuā nö lökngö i samā u, ṙātö nyā-aṅkūö u chū-ö inrē i kūö cha.

⁵Öt havantöre an min nö ip panam Aikup; ngaich pöri min aṅ Asīriā nö rācha ò, pò cha nö sōḵ nö havantöre.

⁶Ngaich ap fël min nö fuk kui minë elpanam ò, ngaich hatngö tī min tö nup lanaklö cha, ngaich ahatngen u, kūö nup kanahngen cha inlēnö.

⁷Ngaich vē tarik chu nö hĕngkūö lōn tö hineūl rit re nö ṙā-ang in chu: pòrô cha-a nö havëten cha nö in ò ngam lamātulöng, öt hĕng tak min mahapōilen ò.

⁸Sitih tī öich min ṙā-ang tīre tö meh, Ifrēm! Sitih tī öich min ṙānyen meh, Israel! Sitih tī öich min vīten meh, sā Atmah! Sitih tī öich min ha-ūichlen meh, sā Sepōim! Havāng Hötre ap ellōn chu nö in chu, holre nup miṙēlōn chu nö hūlö kūö.

⁹Hö-ö chin hòṅ kēken ngam tanānyö lanīnö chu, hö-ö chin hòṅ havantöre piyāingen Ifrēm: pò chu öich chū-ö Tēv, rö-ö öich tarik; Töhet Töhĕng Öich ellōn meh; ngaich öt hòṅ kuhēthötre el ngam elpanam.

¹⁰Tömrit ngam Mā Tēv cha-a min nö kiröönngöre, ngam tösā ṙô lāyön nö ṙô-òv: pò ò min nö ṙô-òv, ngaich yip nyīö min nö yih nö ṙā-ang la sūng nö kichëyöre.

¹¹Yih cha-a min nö kichëyöre nö ṙā-ang Aikup nö sā chehechōn, sā pumpa inrē nö ṙā-ang ip panam Asīriā: ngaich chū-ö min vīten cha nö iyöng el patī re, ngö ṙô ngam Mā Tēv.

¹²Havīlen chu an Ifrēm nö holtö minyôinyaṅ, ngam patī Israel inrē nö holtö inchīlö: ṙòngmö hayöng pöri Yūtā nö hol ngam Tēv, kô-en an nö hol ngam Töhĕng Töhet.