Read Car_Nicobarese HŌSĪ 12 Bible Online

HŌSĪ 12 - Car_Nicobarese bible

HŌSĪ 12

¹Ha-āṅhalre an Ifrēm tö kuföt, ngaich tömrit ngam kuföt chuhöt: iṙūöhen an nö ṙūölö ṙôken minyôinyaṅ inhatngö inrē; kilēḵngôre cha-a inrē nö in Asiriā, ngaich kumtö tavī-i nö i Aikup.

²Lā-al ṙô Yūta an inrē ngam Mā Tēv, ngaich chū-ö min sācha tī tö Yāköp sā nup talöökö ò; sā nup vahīṙen ò tī chin min öich havahal tī ò.

³El chūök kanūönö anga-aṅ nö kē kulôichröön ök mëm re: ngaich ik kumlēḵ re anga-aṅ nö kôḵ nö lā-al ngam Tēv:

⁴Hôṅ, kô anga-aṅ nö lā-al ök kūönṙô, ngaich mihôin: peuiny anga-aṅ vë-ekūö ò inrē. Kôtökūö anga-aṅ tö ò nö i Pētĕl, ngaich in e anga-aṅ nö vë-ekūö hī.

⁵Ngam Mā Tēv, ngam Tēv tömaṙôngö; ngam Mā Tēv inköpkölōn ò.

⁶Lökten man havöötö kūö re im Tēv meh: köptī tö miṙēlōn inkaha fālen inrē, ngaich iṙūöhen höka im Tēv meh.

⁷Mī-inyih an, eltī ò nup kinlah lumngan michīl: hāngenlōn an nö hakihten.

⁸Ngö ṙô an Ifrēm inrē, kô-en chin ngaich kôlò, kôtökūö chin tö kanôlò re: i nup la-en chu nö ṙòkhöre öt hēngö kanôtökūö cha-a min tö tötṙong i nup tökööl.

⁹Chū-ö pöri Mā Tēv, ṙā-ang ip panam Aikup öich Tēv meh; sön chin min hēk vīten meh iyöng el inrūkui, sā hē nuk sakāmö tökiröng nyinā-aṅ tömilēḵkaṙen.

¹⁰Ngaich chin inrē vë-ekūö yip pròfĕt, ngaich inrē ṙūölö ṙôken maheuṅk cha; ngaich i tī yip pròfĕt nö meukṙen ngatī tī chū-ö inrē.

¹¹Tökööl an Kilīöt, keuheūtngöre yik nö chanök alaha; i Kilkāl cha-a nö kētö kōiny nuā nö tökētuvö: hôṅ, sā töfônghak nup tahāklö cha nö sā inṙak chūök tī tameūich nö el panô-òṅ.

¹²Falngöre ök Yāköp nö el panô-òṅ Āram, chöö-öny tö pīhöre Israel nö kūönkūö, chöö-öny tö pīhöre inrē anga-aṅ nö hayōm sīṅp.

¹³Lökten i pròfĕt tī ngam Mā Tēv nö kēnyen Israel nö ṙā-ang Aikup, lökten i pròfĕt inrē anga-aṅ nö haköpka.

¹⁴Pōyen tī Ifrēm nö harunnyö lanīnö: lökten öp min mahām ò nö hökiṙen nö i kui ò, ngaich in ò min nö havantu tö ngam Mā Tēv öp minṙēngö ò.