Read Car_Nicobarese HŌSĪ 13 Bible Online

HŌSĪ 13 - Car_Nicobarese bible

HŌSĪ 13

¹Hē Ifrēm nö kahôka ṙô, kinyīna ngaich ök umuh; hapōilöre anga-aṅ nö in Israel: hē ò pöri nö kunyahalōn tī tö Pē-al, kapah ngaich anga-aṅ.

²Köölö fālen yin nö ngaich nö ṙūölenre, vī insā tēv re yin tö töhaṙēichö rupīö cha, nup insā tēv tö sā mikah elmat cha, ṙòkhöre anū-ö nö vahīṙen kuntī tarik: ngaich ngö ṙô cha-a tö u, Hökngen yip tarik kamëtö tökētu nö hāmkūö minë kun nuā.

³Lökten yin min nö sā taṙul peuheū, sā tacham inrē töka-euingörit nö husngö, sā öp uk nëlö töheuingö tökūö lamfeui kuföt nö ṙā-ang el chūök sinôngö sāiny, sā öp lul lamöklö ël löklö lul.

⁴Sönen chū-ö Mā Tēv öich Tēv meh ṙā-ang ip panam Aikup; ngaich më-eṅ akahalōn tötörö-ö Tēv höng chū-ö, öt hōlu chin tö mahayööken.

⁵Akahakūö chin tö meh misī el nyalnyi, ip panam tökiröngö nyanôṙö.

⁶Sā nuk kiyôp cha, ngatī tanööḵngen cha-a; tööḵngen cha-a, ngaich marô-òl chūök ellōn cha-a: lökten cha nö vaichngö tö chu.

⁷Lökten chū-ö ngaich in cha höng sā lāyön: sā leōpāt chū-ö min höng taseū talöökö;

⁸Meukkūö cha chin min sā ök për töhaṙivlōn tö kūön re, ngaich chū-ö min chiṙesngö tö-angūöṅ el fanöinylö cha; ngaich umuh chū-ö min mīkten cha sā kūö lāyön: chiṙësö min cha-a tö nup tötainy aṅ el inchōn.

⁹Ō Israel, inhatngö meh ana, pò meh lā-al chu, lā-al ngam hamòlṙen meh.

¹⁰Isuāp rācha meh töngamuh, hòṅ ò nö hayöölen meh i në el panam meh nö ṙòkhöre? Isuh yip ma-akah fālen in meh, yip ṙô meh ṙung öm ngö ṙô, Kētö rācha chu man kūön rācha chu inrē?

¹¹Ngaich chin kētö rācha in meh ing lanīnö re, ngaich i lanīnö re inrē öich kē ngen ò.

¹²Kūchiyö öp kanöölö fālen Ifrēm: halīnṙen öp tökööl ò nö el chūök inlinngen chehen.

¹³Minë miṙivlōn ngòh kamyòḵ kikānö teungtöre min nö i kui ò; töt akaha an nö kūön; pòn ngaich öre nö öt ṙētak ò nöng ngöh nö i chūök tinlōnyö yip nyīö.

¹⁴Hö-ö chin min hòṅ hayööken vē tarik nö ṙā-ang im kinpaha el anū; ö hēk öt ṙānyen cha nö ṙā-ang im kumlēḵ ngam kinpaha. Kumtö nup tö kapahukūö man invah me-eṅ, kinpaha! kumtö nup öt inkôlò re man me-eṅ chūök kupah! Hö-ö chin hòṅ rahëichtit miṙēlōn tö vē tarik.

¹⁵Pòrô anga-aṅ nö tömaṙôngö nö in yip holmaneuk re, yih min öp kuföt chuhöt öp kuföt ngam Mā Tēv yih min nö löktö el tönyalyi, ngaich min öp kuāru ò nöng nyô, nyôngö min inrē öp töhëmlö mak ò: yëḵngen tī min angū-ö tö vanāyö nup tölöök chūökṙen.

¹⁶Keun tökööl re an min Samariā: pò ò nö ahôngen ngam Tēv re: fukkūö fël yin min: tuhtu min yip kūön cha nö pinyā chin yip kikānö cha inrē puyōsö nö fungnyu aich min.