Read Car_Nicobarese HŌSĪ 2 Bible Online

HŌSĪ 2 - Car_Nicobarese bible

HŌSĪ 2

¹Ngö ṙô yin tö yip kisānöre, Tarik chu; ngö ṙô tö yip kanānö re, Töteūngen tö neūkölōn.

²Vë-elkui re im yöng yīö kikānö, vë-elkui re; tön rö-ö an nö pīhö chu, öt rēhĕn chū-ö öich pīhö ò; hökngen ò inrē nö ṙāngö ngam innyihköre nö ṙā-ang i kūö ò, ngam insĕhkö ò inrē nö ṙā-ang hôi minë teh ò;

³Hòṅ chu öt luhngö hilā ò nö chumlal, ngaich ṙāten ò nö sāre ik sakāmö ò nö fötnyu, ngaich vīten ò nö sā el tönyalnyi, ṙāten ò inrē sā tönyô panam, ngaich aṅtī tö yanālö kumpahan;

⁴Hôṅ, öt aheūkölōn chin min in yip kūön ò; pò cha nö kūön mi-inyiköre.

⁵Pò ap kikānö yöng cha nö inyihköre: öp pumrūken cha nö la-en tö sumrōngkūö. Pòn ngö ṙô anga-aṅ, Hòṅ chuh in öp hanāngenre chin, öp kamëtö nyā-aṅkūö chu kamëtö mak chu inrē, kamëtö sanôi sīṅp, kinpāt līnen inrē, tavī-i chu òk chu inrē.

⁶Lökten yĕh meuk, ranglö kaha ngam talöökö meh chin min tö töchökhukūö, ngaich vīlö kinlōngö inrē kinlong ngö kūö ò, hòṅ ò min nö öt kôtökūö tö talöökö re.

⁷Ngaich anga-aṅ min nö tömrit yip hanāngen re, ngaich rö-ö min nö kôlö nö in cha; chöhö cha min anga-aṅ, rö-ö pöri min nö kôtökūö tö cha. Ngaich ngö ṙô min anga-aṅ hòṅ kiröönngöre chin öich havantöre ip raneh pīhö chu; pò e angū-ö nö ĕhten nö in chu tö ngih töngamuh.

⁸Pò ò nö öt akahalōn tö chu öich chū-ö kamëtö sāiny in ò, vāin, tavī-i, töpōyen rupīö humlum inrē, nup aṅtī cha nö vī insā Pē-al.

⁹Lökten chin min havan nup sāiny re ip ṙētak, vāin chu inrē ip ṙētak, nyòkngö nup sanôi sīṅp re chin min tö nup kinpāt linen nup inyunngö linchôyö meh öre.

¹⁰Ngaich chin min töngamuh kôtökūö tö sumrōngkūö ò i kūö yip hanāngenlōn ò, öt hĕng tak min ṙāmānyen ò nö ṙā-ang eltī chu.

¹¹Vītö nup ṙanāmölōn ò chin min nö ṙāngöre, nup tökiröng nyinā-aṅ in ò, nup ayöö chingëṅt ò, nup töhet sakāmö ò, ṙòkhöre inrē nup tömikahai tökiröng sakāmö.

¹²Halëlngö nup vāin ò chin min, tö nup anychīr chōn ò inrē, nup löknyô ò nö ngö ṙô, Ṙëhe chu nun në kahëtö yip hanāngenlōn chu nö in chu. Ngaich chū-ö min vīten u nö chūölchōn, ngaich nup töṙeūla ngam kahôyö min nö nyāngö u.

¹³Ngaich chū-ö min chöhkö nup sakamö ò mi-i nup Pē-al, nup töföngö aṅkūö tö ò tö tötahūsa; yē ò nö hanyöṅtlöre tö inlök nang re yanöṅtö re inrē, ngaich kiröönngöre nö tömrit yip hanāngen re, ngaich vaichngen chu, ngö ṙô ngam Mā Tēv.

¹⁴Lökten, yĕh meuk, haṙöingen ò chin min, ngaich kēten ò nö el tönyalnyi, ngaich ṙāmölōn ṙô vë-ekūö ò.

¹⁵Ngaich chū-ö min ṙā-ang ihih kētö öp panô-òṅ vāin ò, öp achāṙö kanihngen inrē nö inkūp mineūka: ngaich in e anga-aṅ min nö tikökṙô re, nö sā re i nuk sakāmö inyālöre, sā re inrē ik sakāmö ò nö yih nö ṙā-ang panam Aikup.

¹⁶Ngaich angū-ö min ip sakāmö angū-ö, tö ṙô ngam Mā Tēv, Pīhö chu ngö ṙô man min havëken chu, öt ngöhöre ṙô nö havëken chu min nö ngö, Pē-al chu.

¹⁷Pò chu min kēngö minë-eny nup Pē-al nö ṙā-ang elvāng ò, ngaich anū-ö min nö öt kakka minë-eny tö cha.

¹⁸Ip sakāmö angū-ö chū-ö min vītö kinlēḵngô ṙënngô cha i në töṙeūla el kahôyö, i në kumteū el taṙul, i në töṙeūla inrē el tumat: ngaich chū-ö min likölngö linreny fël inrē tö ngam kinyūngö inrē nö ṙā-ang im panam, ngaich vīten cha min nö hulalhaka nö öt pinlānguṙen.

¹⁹Ngaich chū-ö min mikahngen meh pīhö chu örheūheu; hôṅ mikahngen meh chin min pīhö chu im lanöökö, im inkaha fālen, im hanāngen neūkölōn, i neūkölōn inrē.

²⁰Mikahngen meh chin inrē pīhö chu im kanô-en: ngaich akaha kūö min më-eṅ tö ngam Mā Tēv.

²¹Ngaich ngö inlahen min angū-ö ip sakāmö angū-ö, Sapṙô min chū-ö, ngö ṙô ngam Mā Tēv, sapṙô minë halīöngö chin min, ngaich anū-ö min nö sapṙô ngam tumlat;

²²Ngaich ngam tumlat min nö sapṙô ngam sāiny, tö vāin, töm tavī-i inrē, pò u min nö sapṙô nup Taheūichtö ngam Tēv.

²³Ngaich chū-ö teūichten ò nö in chu nö el tumlat; ngaich chū-ö min aṙē-ĕlōn tö ò öp Töt teūngen tö neūkölōn; pò chu min ngö ṙô tö cha yip Töt tarik, tarik chu man me-eṅ; ngaich ngö ṙô min cha-a, Tēv chu man më-eṅ.