Read Car_Nicobarese HŌSĪ 5 Bible Online

HŌSĪ 5 - Car_Nicobarese bible

HŌSĪ 5

¹Hangihtöre tö ngih, Ō yī-ö kūönṙô, hang inrē yī-ö patī aṅ Israel, kētö elnang re inrē, Ō yī-ö patī rācha, tön mī-in yīö ap inkaha fālen; pò yīö nūöt öi i Mīspā, inhāṅl inrē töhanyāknyu i kui Tāpōr.

²Ngaich yip ma-ahôngen nö aṙū-uti chūök nö i finëlngö tarik; chū-ö pöri vamëken cha nö ṙòkhöre.

³Akahakūö chin tö Ifrēm, öt nyatngö inrē Israel tö chu: Ō Ifrēm, pò meh ngaich töngamuh asĕha, chōich an nö ngaich Israel

⁴Hö-ö nup la-en cha nö halöngten cha nö havöötökūöre nö im Tēv cha: pò öp ma-alaha insĕha nö ellōn cha, ngaich cha-a nö öt akahakūö tö ngam Mā Tēv.

⁵Hameuktö e an ngam lanöökö Israel nö i kūö ò: lökten Israel tö Ifrĕm inrē min nö fukngöre nö i nup tökööl cha; anòngngen cha min inrē Yūtā nö fukngöre.

⁶Kiröönngöre cha-a min nö holtö manūlö holtö kiteūm nup töṙeūla chehen cha inrē nö chöh ngam Mā Tēv; hö-ö pöri min cha-a nö kôtökūö tö ò; pò ò min nö ṙūöhngöre tö cha.

⁷Öt kô-en yin nö im Mā Tēv; pò cha nö hakūöntö nyīö töt aṅ in cha: ngaich an yih min ngam ayöö chingëṅt nö ngeūṅkten cha tö nup inlānen cha.

⁸Föönyö kūö ngam kòrnet yin i Kīpiā, ngam römpĕt inrē i Rāma: ahangnyö pinhe-eṅkūö i Pĕtavaen; la unôich meh Ō Penyamin.

⁹Ngaich an min Ifrēm nö hatngö ip sakāmö vinëkö: mikahtölōn yip miyöngö Israel chin ngaich tö nup tökô-en min nö yih.

¹⁰Sā yip kamëngö minkahang kūöngö panam yip kūön rācha aṅ Yūta; vōknyö ngam lanīnöre chin min i kui cha nö sā mak.

¹¹Hakihtuṙen an Ifrēm, kaṙöp an nö ngaich nö im inkaha fālen; pò ò nöng hamtöre lōn nö lök i ngam chöngö.

¹²Lökten chin in Ifrēm sā kamlökö, i patī Yūtā inrē sā chinhūngö.

¹³Hē Ifrēm nö meuk ök vah re, Yūtā inrē meuk ök nyāha re, ngaich chuh Asīriā ang Ifrēm ngaich söömhöti nö ik rācha Yārep: ötkô pöri anga-aṅ nö lööken tī tö meh, öt rēhĕn anga-aṅ min nö lööken tī tö ngam nyāha meh.

¹⁴Pò chu min in Ifrēm öich sā lāyön, sā tö-ayal lāyön inrē i patī Yūtā: chū-ö, chū-ö takô, min öich chiṙesngen meh ngaich kiröönngöre; kē kumre chin min, ngaich öt hĕng tak min umuh ṙamānyen ò.

¹⁵Kiröönngöre min chū-ö ngaich öt havantöre i chūök re, hanöng saha cha nö akahngen nup fālen re, ngaich chöh kūö chu; ip kanihngen re yip min nö kalē-ĕllōn nö chöhö chu.