Read Car_Nicobarese HŌSĪ 6 Bible Online

HŌSĪ 6 - Car_Nicobarese bible

HŌSĪ 6

¹Tā-a, töi havantöre im Mā Tēv: tön chaṙes in ngaich tö tī ò, ngaich min anga-aṅ nö halanken hī; fōho in ngaich tö ò, ngaich anga-aṅ min nö haṙung vah hī.

²Unôichrit tönët sumkam an min nö ha-aṅha hī: im linūöi sumkam min anga-aṅ hachohlen hī, ngaich aṅ min ayī-ö i kūö ò.

³Akahalōn in yĕh, tā-a töi tömrit ngam mikahkūö tö ngam Mā Tēv; kô-en an ngam kinröṅngö ò nö sā peuheū: ngaich yih min anga-aṅ nö hēk nö in hī nö sā kumṙah, sā öp manā-aṅ kumṙah öp tö mākutī tö tumlat.

⁴Ō Ifrēm, sitih tī öich min tö meh? Ō Yūta, sitih tī öich min tö meh? Pò ngam neūkölōn meh nöng sā taṙul peuhēū, sā öp tacham inrē töka-euingörit nö kiröönngöre.

⁵Löken chin kūölten cha aṅtī tö yip pròfĕt; fëliyö yik nö ngaich tö chu öich aṅtī tö ṙô ngam elvāng chu: ngaich ngam inkaha fālen aṅ in chu nö sā ëāṅvö kumröönngöre.

⁶Pò chu lōn tö miṙēlōn, rö-ö nö tökētu: mötlö an inrē ngam inkaha ngam Tēv tö töföngö tökētu.

⁷Ngaich pöri cha-a nö sā Ātöm nö tôichngen tö ngam kinlēḵngô: in e cha-a ngaich nö unlāihöllōn nö lā-al chu.

⁸Elpanam cha an Kīlīöt nö töla-evṙen tö tötlöök, māichngö an tö mahām.

⁹Ngaich sā yip tömūl tötūmu nö höng öp tarik, ngatī yip tömūl kūönṙô nö fëlngö tarik el talöökö chamuh Sīkem hôṅ, ngaich yip nö kēken yanālö tö tötlöök.

¹⁰Ngaich chin meuk el patī Israel tö pinhe-eṅkūö: kôti ap insĕha nö in Ifrēm, māich-ngö an nö ngaich Israel.

¹¹Kanöinyòng ap umuh inrē hinöngken meh, Ō Yūtā hē chu min kēnyen meh hēk ṙā-ang el inkövö yip tarik chu.