Read Car_Nicobarese HŌSĪ 8 Bible Online

HŌSĪ 8 - Car_Nicobarese bible

HŌSĪ 8

¹Kēhöt kūö ngam römpĕt nö elvāng meh. Sā yanīhih matēṙö an nö lā-al ngam patī ngam Mā Tēv: pò cha nö köölö fālen nö im kinlēḵngô chu, fāluṙen yin inrē nö im chöngö chu.

²Peuinyhö kūö chu yin min, Tēv chu, akahakūö in īhö aṅ Israel tö meh.

³Kavalngö ngam tölöök an Israel: lūḵ u an min tö ngam tökuyaha-elmat.

⁴Ha-ūichlö rācha yin, öt lökten chu pöri; vīlö kūön rācha yin öt akahalōn chū-ö tö e: vīlö insātēvre yin tö rupīö cha humlum cha inrē, pò cha nö hòṅ rökiṙen.

⁵Kavalngö ök kun nūa meh anga-aṅ, Ō samariā; hūlö kūö an ngam lanīnö chu nö in cha: i rô-òten öng vö min urēhĕkūö taneunglö cha nö im öt mikahkūö tö tökööl?

⁶Pòn ṙēū-eung in Israel ngih; vahī tö tarik tö vahī-envö, ngaich rö-ö angū-ö nö Tēv. Hòṅ, likūki an min ngam kun nuā Samariā nö kiṙöpi.

⁷Pò cha nö teūichtö ngam kuföt ngaich cha-a min nöng hamūl lamfeui. Öt aṅhavin an tö tökahav sāiny; öt aṅhav ap min sēt tö nya-aṅkūö; yē e min nö hòṅ ṙônguvö, nyā-aṅyö min angū-ö tö aṅ tahëng.

⁸Ngeūṅktu an nö ngaich Israel: ngāichö vah yin nö in yip pumnāmö tarik sā chūökṙen öp töt chūök kumchiklōn.

⁹Pò cha nö ngaich nö chuh Asiriā, sā hanchōn köttö nöng hĕng nòng nöng kahngenre; haṙāi hanāngenre an Ifrēm.

¹⁰Hôṅ pòrô cha-a nö in yip pumnāmö tarik nö haṙāi, hamūlö cha chū-ö min; pò cha nö rĕhngenre nö kūön-ngöre ṙôken tökūö lumngan tī ap rācha aṅ in yip kūön rācha.

¹¹Pò Ifrēm nö ṙūölö ṙôken nup tahāklö nö kanöölö fālen, vīlöngö nup tahāklö tö ò nö kanöölö fālen.

¹²Pòrô chin kūich tö chöngö re in ò nö söm köṅny, ngaich pöri anū-ö nö kaheuktu nö sā töng tohtöre.

¹³I nup tökētu nö in chu, kētö u cha-a ngaich kā-a u; hö-ö pöri ngam Mā Tēv nö hōḵen u: ngaich an min töngamuh nö köpölōn tö nup tökööl cha, ngaich chöhkö tökööl cha; havantöre yip min nö ngaich nö i Aikup.

¹⁴Pò Israel nö vaichngö ngam Vamī-ire, ngaich vīlö patī rācha; Yūtā inrē nö ṙūölö ṙôken tökalonglöng elpanam: söömtö tamēuyö pöri min chū-ö i kui nup elpanam ò, ngaich angū-ö min nö ṙāpngö kūö tö nup patī rācha umuh.