Read Car_Nicobarese HŌSĪ 9 Bible Online

HŌSĪ 9 - Car_Nicobarese bible

HŌSĪ 9

¹Ō Israel, uh man ṙāmölōn! Öm yahlö ṙanāmölōn, sā më tarik; pò meh ngaich ṙāngö ngam Tēv re öm asĕha, Hāngenlōn man tö töhaṙāyö nup töhōngtu nö el patī.

²Hö-ö yip min nö ha-aṅlöng tö ngam chūök pinṙōngö sāiny tö ngam kinrān vāin inrē, öt ōtre min inrē ngam tufömngöre vāin nö in ò.

³Rö-ö yip min nö iyöng im panam ngam Mā Tēv: havantöre pöri min ifrĕm nö i Aikup, ngaich nyā-aṅvkūö min cha-a tö nyā-aṅkūö töthet nö i Asīriā.

⁴Hö-ö min cha-a nö ṙöhnyö tökētu vāin nö im Mā Tēv, öt rēhĕn nup tökētu tö cha min nö ṙāmölōn tī tö ò: höng sā nyā-aṅkūö töhaṙivlōn nö in cha nup kahëtö cha min; ṙòkhöre min yip nyamā-aṅ u nö chōichngöre: pò öp nyā-aṅkūö cha min nöng neūkö cha; öt yih min angū-ö nö el patī ngam Mā Tēv.

⁵Suh öp min la-en yiö ip sakāmö tö milēkaṙen manūlö, ip sakāmö tökirög nyinā-aṅ inrē im Mā Tēv?

⁶Yĕh meuk, pò cha nö kiröönngöre nö ngaich nö ṙā-ang im öt inkôlò, sön Aikup nö hamūlö cha min, lāpngen cha min Memfis: nup tövai chehen cha rupīö hayōmö min anū-ö tö nup chōn töchökhu kaha: töchukhu nup min inrē el inrūkui cha.

⁷Yih nup sakāmö chinöha, yih nup sakāmö inva halvah; akahalōn an min Israel tö e: tökūlō-ov an ngam pròfĕt, tökatūö ya ṙen ngam tarik tö aṅhavin tö ngam ma-alaha, kūö ṙôken nup tötlöök in meh, kūö ngam kumnyah elmat inrē nö kiröng.

⁸Amahati ök Ifrēm nö hol ngam Tēv chu; ngam pròfĕt pöri, höng sā tumngöp chehechōn nup talöökö ò, kumnyahṙen inrē el patī ngam Mā Tēv ò.

⁹Aṙū-uti tī yin nö hachōichngöre, sā nuk sakāmö Kīpiā: köpölōn an min tö nuk tökööl cha, chöhkö nuk tökööl cha an min.

¹⁰Kôtökūö chin tö Israel nö sā angkūr el nyalnyi; meuk yik muvöhngö meh chin nö sā töngāṅv ranehlòng anychīr chōn ik raneh hē ṙòng: yih pöri nö Pē-altī-ôr, ngaich haköhngenre cha-a nö im sinrōngkūö, ngaich vītöre nö sin-òkkūö nö sā ngam hanāngenlōn cha.

¹¹Ifrēm pöri, kiteūngöre nö ngaich ök ineū-euṅ cha sā chehechōn; öt finötnyuvö min umuh, öt hĕng tak min tökūönu tö nyīö, öt hĕng tak inrē pumrūkö nyīö.

¹²Pòrô cha-a nö haruklö kūön re sön chū-ö min miṙivngölōn cha, nö öt hĕng tit tak tarik tö ōtre: hôṅ, töt kôlò yip cha-a inrē hē chu min ṙāngen cha!

¹³Teūichtu an Ifrēm nö i tökôlò kūö panam, sā mat chu meūkö Tūrös: kēnyö yip kūön re pöri min Ifrēm nö in yip famël hanga.

¹⁴Kē-ĕkūö cha, Ō Mā Tēv asuh ap lōn meh kahëtö meh? Kē-ĕkūö cha tö vanachngen el chūök kanūönö nyanôṙö teh inrē.

¹⁵Ṙòkhöe nup öt lanöökö cha nö i Kilkāl; pò chu in e sumrīk tö cha: kūö öt lanöökö i nup la-en cha öich ahōnyen cha min ṙā-ang el ngam patī chu. Öt ōtre hanāngen chin mn töcha; ṙòkhöre yip kūön rācha in cha nö ma-ahôngen.

¹⁶Kô-òngvah an nö ngaich Ifrēm, nyôngö ap ṙĕh cha nö ngaich, öt ṙôngu yin min: hôṅ, pòrô cha-a nö ṙônguvö, sön chū-ö min fëlngö ap ṙòng hanāngenlōn el chūök kanūönö cha.

¹⁷Kavalngen cha an min ngam Tēv chu, pò cha nö öt hang ṙô ò: ngaich cha-a mīnö nö töng öt kamngu chūök nö i vē pumnāmö vē tarik.