Read Car_Nicobarese YŌ-ĔL 1 Bible Online

YŌ-ĔL 1 - Car_Nicobarese bible

YŌ-ĔL 1

¹Ngam ṙô ngam Mā Tēv yamih nö in Yô-el ök kikōnyö kūön Petu-ĕl.

²Hangihtöre tö ngih, yī-ö tö köiny tarik, asītö elnang re inrē, ṙòkhöre yī-ö aṅ ngam panam. Tö ngaich öng ngih i nuk sakāmö yīö, hēk inrē i nuk sakāmö yik muvöhngö yīö?

³Vë-eny e yin i yip kūön yīö, hökngen yip kūön yīö inrē nö vë-enynang yip kūön re, yip kūön cha inrē nö vë-enynang tahëng tumköl chap.

⁴Nup chööḵkūö nup misī tö nyā-aṅyö min tö nup hāyö; ngaich nup chööḵkūö nup hāyö nyā-aṅyö min tö lahung, nup chööḵkūö nup lahung nyā-aṅyö tö kata-ëm.

⁵Yī-ö mihiyōi, aṅhen yin peuiny inrē; ayôṙa inrē, ṙòkhöre yī-ö amòk vāin, kūö ngam tökuchik vāin, pò e nö rökiṙen nö ṙā-ang elvāng yīö.

⁶Tön yih öp pumnāmö tarik nö i kui ngih panam meh, tökalēḵ, töt kanṙeūken inrē; kanap lāyön nup kanap ò,ngaich anga-aṅ inrē nö kanap tö kanap tökiröng lāyön nö ip samā ò.

⁷Ngaich ap nö piṙāpngö nup vāin chu, ngaich inrē nö leūchngö uk öp anychīr chōn chu: hetngö uk tī ap nö ngaich tö ò ngaich kavalngen ò; isoh ngaich nup pak ò.

⁸Harāmöre yin sā töt chô-òv rēlö fūmlö ṙat re tö sāk tökūö öp pīhö inyālö ò.

⁹Rökiṙen nuk nö ngaich nö ṙā-ang i patī ngam Mā Tēv nyā-aṅ tökētu òk inrē tökētu; ngaich yip kūönṙô, yip mameukṙen ngam Mā Tēv, nö sanòk.

¹⁰Yëḵngen ök panô-òṅ, sanòk ngam panam; pòn yëḵngen nuk sāiny; nyôngö tufömngöre vāin, kūönngöreṙen inrē tavī-i.

¹¹Sirōngkūö yin yēḵ, Ō yī-ö yōm panô-òṅ ayôkö ngam vīt yin, tö ngam pārli inrē Ō yī-ö kamrān vāin; pò ngam kanöinyòng ngam panô-òṅ nö yëḵngen.

¹²Nyangngö an ngam vāin, lanyëyi inrē ngam anychīr chōn; ngam anār chōn, ngam kachūr inrē, tö ngam ēpöl chōn, ṙòkhöre nup chōn el kahôyö nö nyangngö: pò ngam ṙanāmölōn nö nyangngö nö in yip kūön tarik.

¹³Fūmlö ṙat re yin tö sāk, harāmöre inrē, yī-ö kūönṙô; ayôṙa yin, yī-ö mameukṙen im tahāklö; tā-a, hĕng mitööm hulalhaka el sāk, yī-ö makeukṙen ngam Tēv chu; pò ngam nyā-aṅ tökētu tö ngam òk tökētu inrē nö öt kētu nö el patī ngam Tēv yīö.

¹⁴Ahetlö ngam inhīkö, havëtö öp manūlö töchēv, hamūl tököiny tarik ṙòkhöre inrē yip aṅ ngam panam nö el patī ngam Mā Tēv ngam Tēv yīö, ngaich peuinyhökūö ngam Mā Tēv.

¹⁵Aōla ngam sakāmö! Pò ngam sakāmö ngam Mā Tēv nö röhta, sā ngam öt inkôlò inrē angū-ö min nö yih nö ṙā-ang im Tökeuheūttöre chöngö.

¹⁶Röh nup tökā-a alaha nö rökiṙen nö i kūö në mat hī, hôṅ, kumchiklōn, ṙanāmölōn inrē nö ṙā-ang i patī ngam Tēv hī?

¹⁷Chahū-i nuk kulöl nö elkatòh tökeh tumlat; piyāyi nuk sök, tiṙöli patī chūök sāiny; kūö nuk sāiny nö nyangngö.

¹⁸Yöng ṙô nup töṙeūla nö halöinyöre! Kalūöchöre el kui nup tömūlhaka nūa, pò u nö öt kiyôpu; hôṅ, öt kôlò nuk tömūlhak sīṅp nö ngaich.

¹⁹Ō Mā Tēv, peuinyhökūö meh chin: pò ngam tameūyö nö ṙāpngökūö tö nup kiyôp el tönyalnyi, ökngökūö inrē ngam töhū tö nup chōn elkahôyö.

²⁰Hôṅ, meūka nup töṙēula el kahôyö nö in meh: pò nuk kun töhëm mak nö nyôlö, ngam tameūyö inrē nö ṙāpngö kūö tö nup kiyôp el tönyalnyi.