Read Car_Nicobarese YŌ-ĔL 2 Bible Online

YŌ-ĔL 2 - Car_Nicobarese bible

YŌ-ĔL 2

¹Föönyökūö ngam römpĕt i Siyôn, föönyökūö öp inhangkö pinhe-eṅkūö i ngam töhet rôngö chu; hökngen yip aṅ ngam panam nö ṙòkhöre nö kichëyöre: pò ngam sakāmö ngam Mā Tēv nö yih, pò e nö röhta;

²Sakāmö sinngūlö an anūnngen inrē, sakāmö taṙul tökufëi inrē sinngūlö, sā pinrātngö minlīlö peuheū nö i kui minë rôngö; tökiröng tarik tökalēk inrē öt töngatī-ivö i tö misī, öt rēhĕn min nö hēktöre unôichrit cha, pòrô nö i ṙôken samyeūheu töṙōl köl chap.

³Urēhĕkūö cha ngam tameūyö nö ṙāpngökūö; lā-unôich cha inrē ngam töhū nö ökngö kūö: ngam panam tö sā ök panô-òṅ Ĕten urēhĕkūö cha, lā-unôich cha inrē nö öt kôlò ngam tönyalnyi; hôṅ, öt hĕng tak tö cha tö öt kô-òngvah.

⁴Ngam mineūkö cha sā mineūkö nup kōra; sā tarik aṅ uk kōra kumyung, ngatī röön cha-a nö fal.

⁵Sā ṙën röön inröl kumyung i kui nup rôngö anū-ö nö kumööi, sā ṙën ṙô kūö töhū kūö tameūyö öp mahaṙāpngö kaṙālö, sā tökālēḵ tarik töhaṙākö nö kiyung.

⁶I kūö cha yip tarik nö kihngen: lunyī nup kūö cha nö ṙòkhöre.

⁷Sā röön tökalēḵ tarik nö fal; yônlö cha-a nö ip ihong kinlōngö sā kumyung tarik; ngaich cha-a nö kö kiröönngö röön töhĕng tak nö el talöökö ò, öt pasū-a inrē nuk mitöökö cha.

⁸Öt hĕng taka nö rēhĕn kumring tahëng taka: kiröönngöre cha-a nö kö el talöökö re; tufunnyöre cha-a nö i nuk aṅtī cha, ngaich öt piyāingö talöökö re.

⁹Kumööilöre cha-a nö i kui ngam elpanam; fal cha-a nö I kui ngam ihong kinlōngö; yòhlö cha-a nö el nup patī; lökhöt inkūp kuföt cha-a nö kuhēthötre sā öp mu-ulāya.

¹⁰I kūö cha ngam tumlat nö kayīna; kayīna minë halīöngö: sangūli mat ngam tavūöi tö ngam chihgëṅt, ṙā-ang hanū matre inrē minë taneūsömat:

¹¹Ṙô-ov ngaich ngam Mā Tēv ö urēhĕkūö yip kumyung; pò ngam elyöngö ò nö tökiröng; pò ò nö tökalēḵ kamëkö kaha ṙô re: pò ngam sakāmö ngam Mā Tēv nö kiröng pinhe-eṅkūö inrē; chiāp tökô nö in e?

¹²Ngö ṙô pöri ngam Mā Tēv, Sön yī-ö töngamuh kô-en havantöre in chu keuheūttö ellōn re, holtö inhīkö,holtö pineūnyö, holtö miṙivlōn inrē:

¹³Tikaichngö ellōn re yin, rö-ö nö minë inyut yīö, ngaich havantöre im Mā Tēv ngam Tēv yīö; tön tö-aheūkölōn an, tööḵlö inrē tö miṙēlōn, töt veūtö lanīnö, töpōyen miṙēlōn, mahavanrit lōn re inrē tö öp töchōich.

¹⁴Chīöp tö-akahalōn tö ò nö öt havöökūöre min ane inrē havanrit lōn re, ngaich ṙātö inkôlò nö lā-unôich tö ò, öp nyā-aṅ tökētu òk inrē tökētu nö im Mā Tēv ngam Tēv yīö?

¹⁵Föönyökūö ngam römpĕt i Sīyôn, ahetlö ngam inhīkö, havëtö töchēv manūlö:

¹⁶Hamūl yip tarik, ahetlö yip tömaṙôngö, hamūl yip minṙöinylen tarik, hamūl yip nyīö, cha-a inrē yip pamôḵ: hökngen öp töhapīhö kikōnyö nö kunyī-inyre nö ṙā-ang el urôhò re, öp töhapīhö kikānö inrē nö ṙā-ang el kun urôhò re.

¹⁷Hökngen yip kūönṙô tö yip mameukṙen ngam Mā Tēv, nö peuiny nö ihôi ngam nyat rit tūi tö ngam tahāklö, höknyô cha nö ngö ṙô, Ō Mā Tēv, aṙēlö vē tarik re man, un kētu vē amin meh nö im minṙēngö, hòṅ vē pumnāmö tarik nö öt mināich tö cha: kūöyòh ṙöng aich min nö ngö ṙô nö i vē tarik, Isuh ap Tēv cha?

¹⁸Ngaich ngam Mā Tēv nö kalē-ĕlōn tömpanam re, aṙē-ĕlōn inrē tö yip tarik re.

¹⁹Ngaich ngam Mā Tēv nö sapṙô yip tarik re nö ngö ṙô, Yĕh meuk, söömtö sāiny yīö chin min, vāin, tavī-i inrē, ngaich yī-ö min tööḵngen tö u. Ngaich chū-ö min öt hēk vīten yīö minṙēngö i vē pumnāmö tarik;

²⁰Marôvat tī pöri chū-ö min ṙūöngö yip kumyung tö yīö aṅ lā kapā, ahōngen ò chin min inrē ip panam töt sīöpö aṅkūö tö öt kôlò inrē, lā kūö ò ngam lā chuhöt mai, lā uk ò inrē ngam lā sūng mai; ngaich taveūklöng min öp inngeūṅtö ò veūklö min inrē öp tinôngö ò töhangeūṅtu pò ò nö keuheūten tö nuk tökiröng la-en.

²¹Un pa-ekūö Ō panam, ṙāmölōn man hanyam ṙô re inrē ṙāmölōn; pò ngam Mā Tēv nö keuheūten tö nuk tökiröng la-en.

²²Ui pa-ekūö yī-ö töṙeūla el kahôyö; tön sīöplö nuk kiyôp el tönyalnyi, pò öp chōn nö ṙônguvö öp anychīr chōn tö vāin inrē nö sīöpnyöre kumlēḵ.

²³Ṙamölōn yin lökten, yī-ö kūön aṅ Sīyôn, hanyam ṙô re ṙāmölōn im Mā Tēv ngam Tēv yīö; tön kē-ĕkūö yīö an tö ngam mu-urĕh kumṙah nö löökö ṙôken tī, ngaich kūö yīö inrē anga-aṅ nö hōten ngam kumṙah nö hōten ngam kumrah nö chahūköti, ngam mu-urĕh kumṙah ngam mu-unôich inrē, im raneh chingëṅt.

²⁴Ngaich nup el patī min nö tööḵlö tö vīt, ngaich nup tökôlò tö vīt, ngaich nup tökôlò alaha min inrē nö taṙēchlöng nö holtö vāin tavī-i inrē.

²⁵Havantö nup samyeūheu chin min in yīö nuk tö nyā-aṅyö aṅkūö tö hāyö, lahung, kataëm, misītö inrē yik töpōyen kumyung tahīntö chu in yīö.

²⁶Pōivat yin min nyā-aṅvkūö tööḵngen inrē, ngaich ha-öiny minënyö ngam Mā Tēv min ngam Tēv yīö, ngam tö tītö pinngangkūö nö in yīö: ngaich min vē tarik chu nö öt hētu nö sirōngkūö.

²⁷Ngaich yī-ö min akahalōn tö chu el ṙôngö Israĕl, tö chu inrē öich Mā Tēv, öich Tēv yīö öt tahënguvö: ngaich öt hētu min vē tarik chu nö sirōngkūö.

²⁸Ngaich ngö inlahen angū-ö min nö unôich, tö chu min ṙöstö ngam fanöinylöre i kui taṙòkhöre tarik; ngaich yip kūön yīö kikōnyö kūön yīö kikānö inrē min nö mikahten, heūv heūvö min yip tököinytarik yīö, meuk tömeūkö min yip ṙāl tarik yīö.

²⁹I kui yip kikōnyö tarik i yip kikānö tarik inrē i nup sakāmö anū-ö öich ṙöstö ngam fanöinylöre.

³⁰Hameuktö pinngangkūö chin min el halīöngö el tumlat inrē, mahām, tameūyö öp tö tafūna lul inrē.

³¹Vīngöre an min ngam tavūöi nö sinngūlö, vīngöre inrē ngam chingëṅt nö mahām, urēhĕ kūö yanīhih öp sakāmö ngam Mā Tēv tökiröng pinhe-eṅkūö inrē.

³²Ngaich ngö inlahen angū-ö min tö öp töng mahavëkö minë-eny ngam Mā Tēv min nö ṙānyuvö: pòn i kui rung Siyông i Yērusalem inrē cha-a min yip tötkô-òngvah, sā ṙô ngam Mā Tēv, yip töhavëka tö ngam Mā Tēv aṅ in yip chööḵṙen.