Read Car_Nicobarese YŌ-ĔL 3 Bible Online

YŌ-ĔL 3 - Car_Nicobarese bible

YŌ-ĔL 3

¹Yĕh meuk, pòn i nuk sakāmö anū-ö, ip ṙētak angū-ö inrē, hē chu min hēk kētö yip töhakövö aṅ Yūta aṅ Yērusalem inrē,

²Hamūl yip pumnāmö tarik chū-ö min nö ṙòkhöre, ngaich kēten cha min nö el öp achāṙö Yēhōsafat; ngaich vë-ekūö cha chū-ö min in e tökūö yip tarik chu kūö ök amin chu inrē Israĕl, ök töpirāti tö cha nö in vē pumnāmö tarik, ngaich ṙāngö ngam panam chu.

³Ngaich cha-a inrē nö kalah taneūngenre tö yip tarik chu: ngaich kēngö nyīö kikōnyö nö i tö-inyihka kikānö, inyihngö nyīö kikānö inrē nö ṙāi vāin, pò cha nö hòṅ ka-eūt.

⁴Hôṅ, asuh öi yī-ö tö chu, Ō Tūrös, Sītōn, ṙòkhöre inrē aṅ chīṙö Filistiā? Hòṅ havahalre öi in chu? Yē yīö hòṅ havahalre in chu, ngaich ka-eūyen chū-ö min havantö ngam invahlö nö i kui yīö.

⁵Pò yīö uroh ngaich kē nuk rupīö chu humlum chu inrē, ngaich keunngö u nö el nup chūök yīö vë-ekūötēv nuk tövai chehen chu;

⁶Inyīhiyö inrē yik kūön aṅ Yūta kūön aṅ Yērusalem inrē nö in yip kikōnyö kūön aṅ Krīk, pò yīö hòṅ kēngen cha nö marôvat tö kūöngö panam cha,

⁷Yĕh meuk, hachohken cha chin min ṙeū-eung ip chūök tī yīö öi inyihngen cha, ngaich havantö ngam invahaltī yīö nö i kui yīö

⁸Inyihngö yip kūön yīö chin min kikōnyö yip kūön yīö kikānö inrē nö eltī yip kūön aṅ Yūtā, ngaich cha-a min nö inyihngen cha nö in yip tarik aṅ Sapiā, in yip tömarôvat pumnāmö tarik: pò e nö ṙô ngam Mā Tēv.

⁹Ahangnyö e yin in yip pumnāmötarik; halēnlö kinyūngö: hachohkö alaha yip tökalēḵ tarik; hökngen yip kumyung tarik nö haröhtöre nö ṙòkhöre, hökngen cha nö yihtöre.

¹⁰Röm nup kūö kunköh tumlat yin nö fël nup kinmöp el kui chōn inrē nö vöi: höknyô yip töt kalē-en nö ngö ṙô, kalēḵ chin chū-ö.

¹¹Ka-eūyen yin, tā-a, ṙòkhöre yī-ö pumnāmö tarik tö vintakūö, hamūltöre: in e tölṙô yip tökalēḵ in meh nö yihtöre, Ō Mā Tēv.

¹²Hökngen yip pumnāmö nö hachōhol alahare, ngaich yihtökūö nö el achāṙö Yēhōsafat: tön in e chin min ūichhaka kahòkken tö vintakūö pumnāmö tarik nö ṙòkhöre.

¹³Kētö tī re yin imkanöt, tö ngaich an nö kanöinyö ṙòng; tā-a, röön yin ngaich; tön tööḵlö an ngam kinrān vāin taṙēchi nup tökôlò aṅ e; pò ap öt lanöökö cha nö kiröngen.

¹⁴Maṙôgö, maṙôngö yip el achāṙö kinṙôka pò ngam sakāmö ngam Mā Tēv nö röhta nö el achāṙö chūök kinṙôka.

¹⁵Sangulköti mat ngam tavūöi tö ngam chingëṅt, ngaich minë taneūsömat inrē nö ṙāngö pinchālö mat re.

¹⁶Löknyö Sīyôn ngam Mā Tēv min nö pōiti ṙô, löknyö Yērusalem inrē ap ṙô ò nö kaknyu; ngaich minë halīöngö tö ngam tumlat inrē nö kayīna; ngaich pöri min ngam Mā Tēv nö innyatlö yip tarik ò, töngëḵ inrē nö chūök yip kūön Israĕl.

¹⁷Hòṅ yīö min akahalōn tö chu öich chū-ö Mā Tēv öich Tēv yīö, mī-iyöng Sīyôn öp töhet rôngö chu: ngaich min Yērusalem nö töhet, öt hēk min yip aṅ tahëng nö lökngö in e.

¹⁸Ngaich ngö inlahen angū-ö min ip sakāmö angū-ö minë rôngö min nö kitaknyö tö kuchik vāin, minë rung inrē min nö hëmnyi aṅ tö tūt ṙòkhöre min inrē nup kun töhëm mak aṅ Yūtā nö hëmö aṅ tö mak; hëmnyi min inrē öp mak nö ṙā-ang el patī ngam Mā Tēv, ngaich angū-ö min nö hamakngö el achāṙö Sitim.

¹⁹Ngāsngö min ngaich Aikup, ngāsngö inrē Ētöm nö eltönyalnyi; kūö chanökhuṙen re tö yip kūön aṅ Yūtā, pò cha nö kitakṅyö mahām töt akaha nö i panam cha.

²⁰Örheūheu pöri min Yūta nö köp, Yērusalem inrē löktökūö tum köl chap tarik.

²¹Ngaich chū-ö min sichngö mahām cha nup tö-öl nö sīchiyö tö chu: pò ngam Mā Tēv nö iyöng Siyôn.