Read Car_Nicobarese AMŌS 2 Bible Online

AMŌS 2 - Car_Nicobarese bible

AMŌS 2

¹Ngö ṙô an ngam Mā Tēv: Kūö tölūöi fālen Mô-āp, hôṅ, kūö töfën, hö-ö chin min havööngökūö ngam sācha e: pò ò nö föngngö nuk tangëḵ ök rācha aṅ Etöm nö lanit.

²Söömtö tameūyö pöri chū-ö min i kui Mô-āp, ngaich angū-ö min nö haṙāpngö nup patī rācha i Kerīyòt; ngaich i tinṙōlen min Mô-āp nö kapah, höltö ṙënṙô holtö ṙô römpĕt inrē.

³Ngaich chū-ö min rökngen ma-akah fālen löktökūö ellōn e, ngaich fëlngö yip kūön rācha min umuh nö anòngngen ò, ṙô ngam Mā Tēv.

⁴Ngö ṙô an ngam Mā Tēv: Kūö tölūöi fālen Yūtā, hôṅ töfën, hö-ö chin min havööngökūö ngam sācha e: pò cha nö sō-o ngam chöngö ngam Mā Tēv, öt haköp ngam inchöngten inrē aṅ in ò, ngaich nup minyôinyaṅ cha nö pô-òvkūö tö cha nö vaich, nöng sā talöökö yik muvöhngö cha:

⁵Tintö tameūyö pöri min chū-ö i kui Yūta, ngaich angū-ö min nö haṙāpngö nup patī rācha i Yērusalem.

⁶Ngö ṙô an ngam Mā Tēv: Kūö tölūöi fālen Israel, hôṅ, kūö töfën, hö-ö chin min havööngö kūö ngam sācha e: pòcha nö inyihngö yip tölöök nö ṙāi rupīö, yip töhāṅten inrē nöng hĕng höt tahôl tö kunröpö:

⁷Yip tö tarūka lōn tö nup pitung ngam tumlat i kui öp yāich, ngaich kānngöre tö ngam talöökö inyāichngö: hĕng tak öp tarik tö öp yöng ò kikōnyö inrē min nö chuh im töhĕng tak kikānö, nö hachōichngö ngam töhet minënyö chu:

⁸Ṙōlngöre cha-a nö ranghö nup tahāklö nö el nup hilā tökē-ĕyö nö kinlēḵngô, el patī ngam Tēv cha inrē cha-a nö ka-eūt vāin nup töhaṙāyö inchūḵngen.

⁹Urēhĕkūö cha pöri chū-ö min keuheūtngö vah yip aṅ Amôr, yik tösā rôlòng sītör, sā nganë-eṅ ōk inrē; löktö lā tulöng tī chū-ö min keuheūtngö vah nup ṙòng ò, ngaich löktö lā taṙeū tī inrē i nuk ṙĕh ò.

¹⁰Kēnyen yīö chin inrē ṙā-ang ap panam Aikup, hachō-o yīö inrē el tönyalnyi fën anāi sumkam, öi kē ngam panam yip aṅ Amôr.

¹¹Hachohlö yip kūön yīö chin kikōnyö nö pròfĕt, yip ṙāl tarik yīö inrē nö aṅ Nasaret. Röh ṙöng öng nö ngatī, Ō yī-ö kūön Israel? Ṙô ngam Mā Tēv.

¹²Ngaich pöri yī-ö kē-ĕkūö yip aṅ Nasaret nö òk vāin; ngaich ngö ṙô öi tölṙô yip pròfĕt, Uh yin ṙô-òv tö nup maheuṅk re.

¹³Yĕh meuk, tīpten yīö chin min el chūök yīö sā ap inröl tötīpö aṅ tö nuk törōire ṙòng sāiny.

¹⁴Ngaich yip töpāngö min nö lëlngö tö tī yip töveut, ngaich yip tökalēḵ min nö öt hangëkö yip kunyung in cha, öt rēhĕn öp tömihôiṅ min nö ṙānyö nômö re:

¹⁵Öt rēhĕn anga-aṅ min nö sökhaka öp tö aṅhaṅv eltī tö linreny; anga-aṅ inrē öp töveūtö röön min öt ṙānyöre: öt rēhĕn anga-aṅ min öp mī-i uk kōra nö ṙāyö nômö re:

¹⁶Anga-aṅ inrē öp töt pa-ekūö in yip tö mihôiṅ falngöre min nöng chumlal ip sakāmö angū-ö, ṙô ngam Mā Tēv.