Read Car_Nicobarese AMŌS 3 Bible Online

AMŌS 3 - Car_Nicobarese bible

AMŌS 3

¹Hang ngih ṙô yin ngih ṙô ngam Mā Tēv nö lā-alkūö yīö, Ō yi-ö kūön Israel, lā-alkūö yip töhĕng mupīhö nö ṙòkhöre yip kahënyö chu nö ṙā-ang el öp panam Aikup, nö ngö ṙô,

²Höng yī-ö yin mikahkūö chu i tum mupīhöyip taṙòkhöre aṅ ngih tumlat; lökten chin min in yīö chöhkö nup taṙòkhöre tökööl yīö.

³Yĕn hō-en höö lōn cha-a, ngaich möl röh nö holröönre nö kiröönngöre nap tönët tak?

⁴Ayôṙa ṙô öp lāyön ṙung nö el-inchōn, yē ò nö öt nyā-aṅvkūö? Ayôṙa ap ṙung kunlāyön nö el chūökre, yē ò nö öt taneūnguṙen?

⁵Kô ang ngòh chehechōn nö fuk el tinngöp nö el tumlat, yē ap insuk ò nö öt ṙātu nö hanöng ò? Kô-òren ap tinföt nö tafötlöng nö ṙā-ang el tumlat, ngaich nöng öt pô-òvö?

⁶Kô-òren ap römpĕt nö föönyu kūö nö elpanam, ngaich öt pa-ekūö hòng yip tarik? Kô-òren hòng tötlöök nö fuk ip töhĕng elpanam, nö öt tī ngam Mā Tēv angū-ö?

⁷Hö-övö an ngam Mā Tēv nö tinī-ivö, hameuktö nup hayunken re pöri anga-aṅ nö in yip tarikre pròfĕt.

⁸Ayôṙa ṙô ap lāyön, achiāp min töt pa-ekūö? Ṙò-òvö an ngam Mē Tēv, achīö tökô nö öt ve-eny e?

⁹Ahangyö e yin el nup patī rācha i Astòt, el nup patī rācha i panam Aikup inrē, ngö ṙô, Hamūlöre yin i kui nup rôngö Samariā, yĕh meuk, öp yöng tinṙōlen umuh, öp inkihten inrē ellōn e.

¹⁰Pò cha nö öt akahakūö tö töhuveū la-en, ṙô ngam Mā Tēv, yip mahamūllö chanökhuṙen unlāya inrē nö ël nup in cha patī rācha.

¹¹Lökten an ngam Mā Tēv nö ngö ṙô: Hĕng tak ap min tökunyaha elmat, nö mahavīlö ngam panam: ngaich anga-aṅ min nö tumṙeūtö ngam kumlēḵ meh nö ṙā-ang in meh, ngaich nup patī rācha in meh min nö hachōchi.

¹²Ngö ṙô An ngam Mā Tēv: Sā öp yōm pököre nö kēḵ nup tönët kalröön nö ṙā-ang elvāng ap lāyön, hēk inrē hĕng öp nang; ngatī kinënyö min yip kūön Israel yip amūichhak nö i sinkeukngö el chamam nö I Samariā, nö el nup resöm inrē tötanyīka ël chamam.

¹³Hang yin, hameukhöti inrē i lā-al ngam patī Yāköp, ṙô ngam Mā Tēv, ngam Tēv yip tömaṙôngö.

¹⁴Pòn ip sakamö angū-ö öp hē chu min chöhkö fālen öich in ò, chöhkö nup tahāklö Pētĕl chū-ö min inrē, ngaich nup sinrōl öp tahāklö min nö rökiyö, ngaich suktöre nö el tumlat.

¹⁵Ngaich chū-ö min hachök ap patī laneūchö nö hol töp patī sikehngö; ngaich nup patī kanël alafānta min nö payāyi, nup tökiröng patī inrē min nö öt ōtre, ṙô ngam Mā Tēv.