Read Car_Nicobarese AMŌS 4 Bible Online

AMŌS 4 - Car_Nicobarese bible

AMŌS 4

¹Hang ngih ṙô, yī-ö kan nuā aṅ Pasān, öi mī-ikui ngam rôngö Samariā, öi mahakihten yāich, öi pumnyāichngö töhāten, öi tö ngö ṙô tö yip mā cha, Kē-ĕti, tā-a töi ka-eūt.

²Im hanë töre chūök ṙô an ngam Mā Tēv, tö e, yĕh meuk, nup sakāmö min nö teunghö kui meh, tö cha min nö kēngen meh nö aṅtī tö vòk, yip chööḵ yīö inrē nö nyāha tö vòk kāḵ.

³Ngaich yī-ö min meutnyi löknyö nup tömëngö,öi kö hachip kū-öre; ngaich yī-ö min afukngöre i Harmòn, ṙô ngam Mā Tēv.

⁴Ta-a yih i Pētĕl, hatôichngenre inrē i Kilkāl, ṙūölö ṙôken nup fālen; kaheuk peuheū inrē kētö nup tökētu tö yīö, kaheuk tölūöi sumkam kētö nup töhĕng i tösöm tī yīö;

⁵Kētö nöinyö tökētu inrē aṅ i nuk tö-aföhlöng, ahangkö nup kanahanglōn tökētu inrē hatāinyö hināngö u inrē: tön angū-ö an ööi yīö, Ō yī-ö kūön Israel,ṙô ngam Mā Tēv.

⁶Ngaich chin inrē kē-ĕkūö yīö tö hanëtö kanap i nup elpanam yīö nö ṙòkhöre nup nya-aṅkūö inrē i nup chūök yīö ṙòkhöre; ngaich rö-ö yī-ö havantöre in chu, ṙô ngam Mā Tēv.

⁷Ngaich chin inrē ṙap röön ngam kumṙah nö in yīö yĕn ṙòngmö lūöi töre chumngëṅtö ap inmūlö ṙòng: ngaich chū-ö vīten e nö kumṙah nö i kui töhĕng elpanam, sōten e inrē nö kumṙah nö i kui tahëng elpanam: hĕng kang chūök ap tö kumṙahtu kui,ngaich ap tö kumṙahtu kui nö öt nyangngö.

⁸Lökten nuk tönët hēk tölūöi elpanam nö chuh im töhĕng elpanam nö òk mak, ngaich rö-ö nö tööḵngen: sönngenre yī-ö öt havantöre in chu, ṙô ngam Mā Tēv.

⁹Hachökö yīö chū-ö aṅtī tö nyanangngö nganāvngö inrē; nup töpōyen panô-òṅ yīö, panô-òṅ vāin yīö inrē, any-chīr chōn yīö, ôlīv chōn yīö keuheūt nö ngaich tö kūö kāta-ëm: sönngenre yī-ö öt hòṅ havantöre in chu, ṙô ngam ṙô Mā Tēv.

¹⁰Ngaich chū-ö söömtö tölëlngö kūö invah in yīö tösā nup i Aikup: fëli tö chu nö yahatö fël yik ṙāl tarik yīö, ngaich nuk kōra yīö inrē nö kē-ĕyö; ngaich vīten öp inngeūṅtö öp elyöngö yīö nö meutlö nö löklö elmeh yīö; sönngenre yī-ö öt havatöre in chu, ṙô ngam Mā Tēv.

¹¹Tiṙöli tö chu nup rīkre in yīö sā tī ngam Tēv hē tinṙölngö Sôtöm Kômòra inrē, ngaich yī-ö sā öp hanūkūö tameūyö tö töknyu nö ṙā-ang im töhūkūö: sönngenre yī-ö öt havantöre in chu, ṙô ngam Mā Tēv.

¹²Lökten chin min ngö tī in meh, Ō Israel: ngaich kūö chu min ngati tī tö ngih in meh, halēnöre mana höngkūö ngam Tēv Ō Israel.

¹³Yĕh meuk, pò ò ngam mamul-lö minë rôngö, vamīlö ngam kuföt inrē, vamë-eny nang tarik töp ellōn ò, ngam vamīlö sinngul tö peuheū kumröön kui minë lā tulöng chūök ing tumlat: ngam Mā Tēv, Tēv yip tömaṙôngö, an ngam minënyö ò.