Read Car_Nicobarese AMŌS 5 Bible Online

AMŌS 5 - Car_Nicobarese bible

AMŌS 5

¹Hang ngih yin ṙô ngam ṙô chu harāmö yīö, Ō yī-ö aṅ patī Israel.

²Fukngö ap rēlö aṅ Israel; öt chanòhlen ap min nö ngaich: fukngö ap nö i kui ngam panam re öt hĕng tak umuh mahachohlen ò.

³Pòn ngö ṙô ngam Mā Tēv; Öp elpanam töhĕng köṅny ṙôken nö kiröönngöre ngaich min nöng hēngòng tö-ōtre, ngaich angū-ö öp töhēngòng nö kröönngöre ngaich höng söm tit tāk tö-ōtre min, nö i patī Israel.

⁴Pòn ngö ṙô ngam Mā Tēv tö ngam patī Israel, Chöhöh chu yin, ngaich yī-ö min aṅ:

⁵Uh pöri chöhö Pētĕl, uh rēhĕn kuhēthötre i Kilkāl, un ṙūöhöngre inrē i Pīrsīpā: tön kô-en an min Kilkāl nö chuh el inkövö, ngaich rööḵngöre min Pētĕl.

⁶Chöh ngam Mā Tēv, ngaich aṅ min yī-ö, hòṅ ò min nö öt sā tinfūnlö kūö tameūyö nö i patī Yôsĕf, ngaich ṙāpngö kūö angū-ö ngaich öt hĕng tak umuh mahanyang-ngö kūö e nö i Pētĕl,

⁷Yī-ö mahavāngtö inkaha fālen nö im tö angū-öṅvö, ngaich afukngö töchiplö nö el tumlat.

⁸Chöhan ngam vamīlen Pleyates, Ōrīön inrē, ngaich havāngtö ngam nyat kinpaha nö lā peuheū, ngaich vīten ngam sakāmö nö sinngūlö holtö hatööm; ngam mahavëkö minë mak ngam mai, ngaich ṙöstö u nö i kūö gam tumlat; Mā Tēv An ngam minë-eny ò;

⁹Ngam kamëtö töng yitta pinyāingö nö i kui ngam tökalēḵ, lökten ngam pinyāingö nö yih nö i kui ngam chūök kumyung.

¹⁰Kunyaha elmat yin tö ò ngam vamë-a nö i kūö inkūp, surīkhen ò yin inrē ngam tö ṙôtö töchiplen.

¹¹Lökten pò yīö rööntö kui yāich, ngaich hateungtīre kē vīt öm in ò: ngaich yin yih mānlö nup patī nö ihong töfāsö hö-ö pöri yī-ö min iyöng ël u; teūichtö tökôlò yin el panô-òṅ vāin, rö-ö pöri yī-ö min òk öp vāin aṅ in u.

¹²Pò chu akahalōn tö ṙôken nup öt lanöökö yīö tö kumlēḵ nup tökööl yīö inrē; yī-ö mahakihten tölöök, kamë ṙāi michūṙen mahavöökūö ngam yāich nö ikūö inkūp nö ṙā-ang im töchip.

¹³Lökten ngòh tö-akaha nöng öt ṙô-òv min ip hē e; pò e nö tötlöök nö ṙētak.

¹⁴Chöh ngam tölöök, un ngam tötlöök hòṅ yīö aṅ: ngaich ngatī ngam Mā Tēv, ngam Tēv yip tömaṙôngö, min nö in yīö, sā ṙô yīö.

¹⁵Surīkhö ngam tötlöök, hāngenlōn tö ngam tölöök, haköpngö ngam inkaha fālen nö i kūö inkūp; lohten ngam Mā Tēv, ngam Tēv yip tömaṙôgö min nö aṙē-ĕlōn tö yip chööḵṙen Yôsĕf.

¹⁶Lökten an nö ngö ṙô ngam Mā Tēv, ngam Tēv yip tömaṙôngö, ngam Mā: Inrāmöre öp min nö ël nup töpōitī ël talöökö nö ṙòkhöre; ngaich ngö ṙô min cha-a nö ël nup kun talöökö, Aōla! Aōla! Ngaich cha-a min nö havëkö öp tameūich tarik nö töhaṙivlōn, cha-a inrē yip töhuveū-euṙô nö peuinynö harāmöre.

¹⁷El nup panô-òṅ vāin min öp inrāmöre: pò chu min lök ellōn meh, ṙô ngam Mā Tēv

¹⁸Tötkôlò yi yī-ö töhòṅ lōntö ngam sakāmö ngam Mā Tēv! Kūöyòh öi hòṅ īnu tö ngam sakāmö ngam Mā Tēv? Sinngūlö ana,öt hanātö

¹⁹Sā ṙēten ök tarik famalngöre töp lāyö ngaich höngkūö ò ap për; hēk inrē ap kumhēthötre nö el patī ngaich tānlö tīre nö i kaha patī, ngaich kāpan ngam pēch.

²⁰Röh öp min sakāmö ngam Mā Tēv nö sinngulö nö öthanātö? Sangūla takô ap, öt yanāngu hòng in e?

²¹Surīkhö nup tökiröng nyinā-aṅ chin in yīö, öt kūöngenre, hö-ö chin inrē i nup tö-ūnngen manūlö kuchīkölōn.

²²Hôṅ, pòrô yin kētö töföngö tökētū in chu nyā-aṅ inrē töktētu, hö-ö chū-ö min hō-en u: öt rēhĕn min öich chumkūöṙen in nup inlāmö tökētu nup tö sangööṙö alaha töṙeūla aṅ in yīö.

²³Kēngö u nö ṙā-ang in chu nup ṙënṙô tinkökö; tön rö-ö chin hòṅ hang tölöökö ṙô töṙātö ranöng meh.

²⁴Hökngen ngam inkaha fālen pöri nö hëmti nö sā töpōyen mak, öp lanöökö inrē nö sā tökalēḵ tahël.

²⁵Kētö tökētu öi in chu misī nyā-aṅ inrē tökētu öi fën anāi samyeūheu el el tönyalnyi, Ō me-eṅ patī Israel?

²⁶Hôṅ, tayuk inrūkui Mōlek yin öp töhet chūök ngam insātēv yīö inrē, ngam tanēusömat ngam tēv yīö,ngam vahī yīö kahngenre.

²⁷Lökten chin min vīten yīö kiröönngöre el inkövö lā muh tö Tamaskös, ṙô ngam Mā Tēv, ngam töminënyuvö tö ngam Tēv yip tömaṙôngö.