Read Car_Nicobarese AMŌS 6 Bible Online

AMŌS 6 - Car_Nicobarese bible

AMŌS 6

¹Tötkôlò yip cha-a yik kumchikngenre nö i Sīyôn, acha-a inrē yip töngë-eṅ chūök nö i kui rôngö Samariā, yip mā tarik yöngkūö yip pumnāmö tarik, yip töyīhiv kūö tö ngam patī Israel!

²Ṙūöhölre yin i Kālnĕh, ngëicha inrē; ngaich ṙēu eung umuh kiröönngöre chuh Hamat öp tökiröng: ngaich peūtöre i Kāt yip aṅ Filistian: mötlö yip cha-a tö në pūlngö? Hēk inrē kiröng ap kūöngö panam cha tö kūöngö panam yīö?

³Yī-ö tömarôvat tī tö ngam tötlöök sakāmö, ngaich vīten ngam anūichö chanökhuṙen nö haröhtöre;

⁴Yī-ö muhulalhaka ël kanël alafān chamam,ngaich hateutnyöre el nup chamam yīö, ngaich kā kūön sīṅp aṅ i nup tömūlhaka, kā kun nuā inrē aṅ i nup ellōn chūök u;

⁵Yī-ö tumkökṙôre tö tinkökö minôn i ṙô öp töṙātö ranöng; yī-ö lamukkötīre vī nup ranöng tinkökö, sā Tāvit;

⁶Yī-ö amòk vāin el töchilū pingāṅl, ngaich hachāmöre tö nup tölngö incham alaha; hö-ö pöri cha-a nö haṙivlōn tö kanihngen Yôsĕf.

⁷Lökten yip min töngamuh nö kiröönngöre nö hakövö nö in yip raneh kumröönngöre nö hakövö yip kamsālö cha inrē yip mahateutngöre nö chaṙēvīṙen min.

⁸In re ṙô An ngam Mā Tēv nö chūöku ṙô, ṙô ngam Mā Tēv, ngam Tēv yip tömaṙôngö: Sā-òkkūö chin tö ngam inkēulen Yāköp, surīkhö nup patī rācha òchin inrē: lökten chin min kētö ngam elpanam holtö yip aṅ e keuheūtlöre.

⁹Ngaich ngö inlahen angū-ö min, yĕn söm tit tak tarik tö ōtren nö umuh el töhĕng patī, kapah min cha-a,

¹⁰Ngaich yē öp köiny yöng öp tarik nö kē an min, anga-aṅ öp famöngngen ò nö kēnyö nup tangëḵ nö ṙā-ang el öp patī, ngaich ngö ṙô min tö ò öp lamā kanôköṙul ngam patī, Ōtren hol ömeh? Ngaich ngö ṙô anga-aṅ, Hö-ö; ngaich ngö ṙô min anga-aṅ, Ṙāngôre man; tön rö-ö in kô kakkö minë-eny ngam Mā Tēv.

¹¹Yĕh meuk, tö ngam Mā Tēv nö chöngu, ngaich ngam tökiröng patī min nö hamëngnyu, ngam kun patī inrē nö hulhötvö kaha.

¹²Fal nup min kōra nö I kui ihong? Hĕng tak hòng min kumköh chūök taneūich nö holtö kōiy nuā? Yī-ö mahavāngtö inkaha fālen im tö-angū öṅvö, öp ṙòng lanöökö inrē nö im tö-angū-öṅvö.

¹³Yī-ö töṙāmölōn i Chehen töng ranö-ö, öi tö ngö ṙô, Röh öi ayī-ö i kumlēḵre kē Sinrōlre?

¹⁴Yĕh meuk, tö chu min hachohlö lā-al meh tö pumnāmö tarik, Ō patī Israel, ṙô ngam Mā Tēv, ngam Tēv yip tömaṙôgö; ngaich cha-a min nö hakihten yīö löktökūö öp lökhöt i Hamat söl ip Töhëm Kun Mak i Arapā.