Read Car_Nicobarese AMŌS 7 Bible Online

AMŌS 7 - Car_Nicobarese bible

AMŌS 7

¹Ngö tī an ngam Mā Tēv nö hameukhö mat chu: yĕh meuk, vī hāyö an i ranehlö maneuinylö sanīöpö nup lā-unôich; ngaich yĕh meuk, angū-ö nö lā unôich sanīöpö unôichrit tī ngam rācha nö köt sāiny.

²Ngaich ngö inlahen angū-ö hē u nö keuheūtökūö nö nyā kiyôp ngam panam, ngö ṙô ngaich chū-ö, Ō Mā Tēv, hayāichtôre chin vë-ekūö meh, öm aṙēlen chu! Sitih kanô-òṅ ang min Yāköp nö sökhak? Tö ò yih nö kūöṅnö.

³Ṙāngö lōnre ngaich ngam Mā Tēv nö in ngih: Hö-ö an min nö ngaich, ṙô ngam Mā Tēv.

⁴Ngö tī an ngam Mā Tēv nö hameukhö mat chu: yĕh meuk, havëtö lā-al an ngam Mā Tēv tö tameūyö; ngaich angū-ö nö keuheūt töm mai tö-aṙū-uti, ngaich keuheūt öre tö ngam panam.

⁵Ngö ṙô ngaich chū-ö, Ō Mā Tēv, hayāichtöre chin vë-ekūö, meh öm ṙā-ang re! Sitih kanô-òṅ ang min Yāköp nö sökhak? Tö ò yih nö kūöṅmö.

⁶Ṙāngö lōnre ngaich ngam Mā Tēv nö in ngih: Hö-ö an min nö ngaich angū-ö inrē, ṙô ngam Mā Tēv.

⁷Ngö tī anga-aṅ nö hameukhö mat chu: yĕh meuk, sökhak an ngam Mā nö ip kinlōngö töhĕng tövī-i nö kinlah kūö panam, eltī ò öp kinlah kūö panam.

⁸Ngö ṙô ngaich ngam Mā Tēv tö chu, Amôs, suāp maheuṅk meh? Ngaich ngö ṙô ngam Mā, Yĕh meuk, asöklö kinlah kūö panam chin min ellōn vē tarik chu Israel: hö-ö chin min hēk lök in cha;

⁹Ngaich nuk tömarô-òl chūök chūökö in Isak min nö payāyiyö, nup töhet chūök Israel inrē min nö piyāyiyö; chōholre chū-ö min inrē lā-al patī Yēropōām öich aṅtī tö fël.

¹⁰Ngaich ang Amasiyā ök kūöṙô i Pētĕl nö ngö ṙô nö söömhöti nö in Yērōpoām ök rācha aṅ Israel, Ulāilö ellōnre ap Amôs nö lā-al meh nö ellōn ap patī Israel: ötkô ön ngaih panam nö keun nup ṙô ò.

¹¹Pò Āmôs nö ngö ṙô, Kapah ap min Yēropoām tökūö fël, ngaich kô-en min Israel nö hachōnyuvö nö ṙāngö panam re nö hakövö.

¹²Ngö ṙô ap inrē Amasīyā tö Amôs, Ō me-eṅ mameuk, kuṙòh, falngöre man i panam Yūtā, nyā-aṅvkūö öm umuh, umuh inrē öm ahānga;

¹³Uh pöri hēk ahānga i Pētĕl, tön töhet chūök öp rācha an angū-ö, ane an inrē patī rācha.

¹⁴Ngaich Amôs nö sapṙô, nö ngö ṙô tö Amasiyā, Hö-ö chin chū-ö misī pròfĕt öt rēhĕn chin misī kūön pròfĕt yōm pököre pöri chū-ö misī, yōm sikamôr chōn inrē:

¹⁵Ngaich ngam Mā Tēv nö kē-ĕ chu ṙeū-eung im tinömörit pököre, ngö ṙô inrē ngam Mā Tēv tö chu, Kuṙòh, ahangkö yip tarik chu man Israel.

¹⁶Yĕh lökten man hangihtöre tö ṙô ngam Mā Tēv. Ngö ṙô man yih, Uh man ahānga chōichô in Israel, un suktu ap ṙô meh nö lā-al patī Isak;

¹⁷Lökten an ngam Mā Tēv nö ngö ṙô: Mī-inyihköre ap min pīhö meh nö im elpanam, ngaich yip kūön meh min kikōnyö kikānö inrē nö fuk kūö fël, harēvö min inrē ngam panam meh tö minkahngö kūö; ngaich me-eṅ min inrē kapah ip panam töthet, ngaich Israel min nö kô-en nö hachōnyuvö nö ṙā-ang panam re nö hakövö.