Read Car_Nicobarese AMŌS 8 Bible Online

AMŌS 8 - Car_Nicobarese bible

AMŌS 8

¹Ngö tī an ngam Mā Tēv nö hameukhömat chu: yĕh meuk, hĕng ap kuvôkö ṙòng chōn sikehngö.

²Ngö ṙô ngaich anga-aṅ, Amôs, suāp maheūṅk meh? Ngaich ngö ṙô chū-ö, Hĕng ap kuvôkö ṙòng chōn sikehngö. Ngö ṙô an ngam Mā Tēv tö chu, Yih ap nö ngaich manāngen i kūö yip tarik chu Israel: hö-ö chin min hēka lök in cha.

³Inyôṙö ṙô nup min tinkökö nö el patī rācha ip sakāmö angū-ö, ṙô ngam Mā Tēv: pōyen nup min alaha tökapah; keuheūtngöre chūök tī min cha-a nö kavalngen cha nöng öt ṙēnuṙô.

⁴Hangihtöre tö ngih, Ō yī-ö ngameūṅkngö yāich, ngaich vīten yāich ngam panam nö öt teunglen.

⁵Nö ngö ṙô, Ĕhē ngörit öpvö min ayöö chingëṅt, hòṅ hī inyihkö sāiny? Öp töhet sakāmö inrē, hòṅ hī löpnyökūö vīt? Hakūönngö ṙôkö nyanūmö, ṙūölöng ṙôkö ngam siköl, ngaich hachūḵngen lumngan nö michūḵṙen;

⁶Pò hī hòṅ havah yāich nö ṙāi tö rupīö, ngaich yāich inrē nöng hĕng höt tahôl tö kunröpö, inyihkö chōntit vīt inrē.

⁷I lanöökö Yāköp chūök ṙô an ngam Mā Tēv, Öthētu chin min vāichngö në la-en cha.

⁸Röh öng min ngih panam nö kayīna tökūö ngih, kö haṙivlōn tö e yip mī-iyöng ël e? Hôṅ, pöklö öp min nö keuheūtlöre sā Tahël; katövlöngö min angū-ö ngaich nyôngö nö hēk, sā ap Tahël Aikup.

⁹Ngaich ngö inlahen min angū-ö ip sakāmö angū-ö, ṙô ngam Mā Tēv, tö chu min öich vīten ngam tavūöi nö meutti tö sakāmö, sumngulngö ngih tumlat chin min ip töhëtö kūö sakāmö.

¹⁰Vīten nup tökiröng nyinā-aṅ chin min in yīö nö miṙivlōn, ngaich nup tinkökö yīö min nö ṙòkhöre nö inrāmöre; kētö nup sāk chin min hilā nö i ṙat yīö, nganānyö kui yīö inrē; vīten e chin min nö sā miṙvlōn tö töng hĕng maneuk nyīö kikōnyö, ngaich öp manā-aṅ min nö sakāmö tökiröng kanihngen.

¹¹Yĕh meuk, yih nup sakāmö ṙô ngam Mā Tēv, tö chu min tīntö inyāichö im panam, öt inyāichö tö nyā-aṅkūö, öt rēhĕn nö inṙëhe nômö tö mak, ngam hināngö nup ṙô ngam Mā Tēv pöri.

¹²Ngaich cha-a min nö karööna röön löktökūö im töhĕng mai söl im tahëng, löktökūö kapā kū-ötö chuhöt inrē; tafālaṙen cha-a min nö chöh ngam ṙô ngam Mā Tēv, ngaich hö-ö nö kôtökūö tö e.

¹³Ip sakāmö angū-ö yip tövai rēlö min tö yip ṙāl tarik nö takngö kūö inṙëhe nômö re.

¹⁴Cha-a yip töchūöku ṙô nö i tökööl Samarīā, nö ngö ṙô, Sā ngam Tēv meh nö tö-aṅ, Ō Tën; ane inrē, sā ngam talöökö Pīrsīpā nö tö-aṅ, fukngö cha-a min, ngaich öt hēṙu nö chōholre nö hēk.