Read Car_Nicobarese AMŌS 9 Bible Online

AMŌS 9 - Car_Nicobarese bible

AMŌS 9

¹Ngaich meuk ngam Mā chū-ö nö sökhak nö ranghö öp tahāklö; ngö ṙô ngaich anga-aṅ, Foh minë töt inṙīngu machööḵlö, hòṅ ngam el milūkö nö kayin: likölngö u inrē nö pinyënyi nö i kui cha nö ṙòkhöre; ngaich aṅtī tö fël chū-ö min fëlngö öp manā-aṅ tö cha; öt hĕng hang tak tö cha min famalngöre, öt hĕng hang tak tö cha min tötkô-òngva.

²Pòrô cha-a nö ultöre nö el tumlat, in e min öp kël chu nö kē-ĕ cha; pòrô inrē nö yônlö nö el halīöngö, ṙeū-eung in e chū-ö min hayônten cha.

³Pòrô cha-a inrē nö hayunngöre nö el chalòng kui Kārmel, chöhöh cha chū-ö min ngaich kēnyen cha nö ṙā-ang umuh; pòrô cha-a inrē nö nyatngö tö mat chu nö lā taṙēu tö mai, tölṙô ngam pēch chū-ö min, ngaich kāpö cha anga-aṅ min.

⁴Pòrô cha-a inrē nö kiröönngöre nö el inkövö nö urēhĕkūö yik lā-al cha, in e chū-ö min tölṙô ngam fël, ngaich fëlngen cha min anga-aṅ: haköp mat re chin min inrē in cha tö ngam tötlöök, hö-ö tö ngam tölöök.

⁵Pò ngam Mā, ngam Tēv yip tömaṙôngö, nö anga-aṅ lamūölkö ngam panam ngaich yëngö angū-ö,ṙòkhöre inrē min yip aṅ e nö haṙivlōn; ngaich angū-ö min nö sīöplöre nö keuheūtlöre sā Tahël; nyôkti hēk, sā Tahël Aikup;

⁶Anga-aṅ ana vamīlö urôhò nö el halīöngö, ngaich vīlö rūkui e nö i kui ngam tumlat; ngam mahavëkö minë mak ngam mai ṙöstö u inrē nö i kūö ngam tumlat, ngam Mā Tēv an minënyö ò.

⁷Röh öi yī-ö in chu sā yip kūön aṅ Itī-ōpiā, Ō yi-ö kūön Israel? ṙô ngam Mā Tēv, Röh öich chū-ö kēnyö vē kūön Israel nö ṙā-ang ap panam Aikup, vē aṅ Filistain inrē nö ṙā-ang Kaftōr, vē aṅ Sīriā inrē nö ṙā-ang Kīr?

⁸Yēh meuk, minë mat ngam Mā Tēv nö i kui tököölö fālen pūlngö, piyāingö e chin min ṙā-ang i kui ngam tumlat; hö-ö pöri öich ahatngö tī re tö ngam patī Yāköp, ṙô ngam Mā Tēv.

⁹Yĕh meuk, pò chu min tölṙô, ngaich chū-ö min vīten ngam patī Israel nöng havötköre nö i vē pumnāmö tarik sā öp sāiny tökichāngö nö el kinchang atra, sön min öp manā-angkūö ṙôngòng sāiny nö öt suktöre nö el tumlat.

¹⁰Ṙòkhöre yip tököölö fālen in yip tarik chu min nö kapah tökūö fël yip töngö ṙô, Öthō ap tötlöök nö kô-öl nö in hī öt rēhĕn nö harah kūö hī.

¹¹Ip sakāmö angū-ö chū-ö min hachohlö öp inrūkui Tāvit öp töfukngö; löpngö kūö nup tömëngö in e inrē; ngaich chū-ö min inrē asöklö nup töpayāyi in e, mānlö e chū-ö min inrē nö sā nuk sakāmö misī;

¹²Hòṅ cha nö amīnu töp chööḵṙen aṅ Ētöm, ngaich ṙòkhöe inrē pumnāmö tarik, yip töhavëka nö i minë-enychu, ṙô ngam Mā Tēv, ngam tötī-īv tö ngih.

¹³Yĕh meuk, yih nup sakāmö nö ngaich, ṙô ngam Mā Tēv tö öp kumköh chūök taneuich nö kô-lö min nö ip mu-uvòh, öp ramöön ṙòng angkūr inrē nö kô-lö nö ip tameūich tö kulöl: hòṅ minë rôngö nö kitaktö tökuchik vāin, ngaich ṙòkhöre min në rung nö yëngö.

¹⁴Ngaich chū-ö min hēk havatö yip tarik re Israel töhakövö, ngaich cha-a min nö vīlö nup töpiyāyi elpanam, ngaich iyöng ël u; ngaich cha-a min nö teūichtö aṅ panô-òṅ vāin ngaich ök vain nö in u; vī panô-òṅ cha-a min inrē, ngaich nyā ṙòng aṅ u.

¹⁵Teūichten cha chū-ö min im panam cha ngaich öt hēk cha-a min nö teuklöng nö ṙā-ang im panam cha, ngam kahëtö chu in cha, ṙô ngam Mā Tēv ngam Tēv meh.