Read Car_Nicobarese OPĒTIĀ 1 Bible Online

OPĒTIĀ 1 - Car_Nicobarese bible

OPĒTIĀ 1

¹Ngam tömeūkö tö Opētiā, Ngö ṙô ngam Mā Tēv tö inlahen Ētöm: Hang inhānga in īhö ṙā-ang im Mā Tēv, hĕng taka öp kūönṙô im Mā Tēv, hĕng taka öp kūöṙô rācha tötīniyö nö i vē pumnāmö tarik, nö ngö ṙô, Chōholre yin, tā-a töi chōholre lā-al ò im kinyūngö.

²Yēh meuk, vīten meh chin kūöṅnö i vē pumnāmö tarik: pōihangṙen man ha-āchīṙen.

³Hachīlö man tö inkeūlen ellōn re Ō me-eṅ mī-iyög el nup tökuhīôlhötre i kaha ihong nup lātulöng chūökö; tö ngö ṙô öm ellōn re, Chīap mīnö kamëten chu lā taṙeū?

⁴Pòrô me-eṅ ṙūöhöl chūök re sā matēṙö, pòrô öp fôngö meh inrē nö vītu nö i minë taneūsömat, kēten meh chū-ö min lā taṙeu ṙeū-eung umuh, ṙô ngam Mā Tēv.

⁵Yē yip mu-ulāya nö yih nö in meh, yip tötūmu inrē tö hatööm rökiṙen man yih! Röh yip öre nö ulāya hanönga saha cha ö kô-ònglōn tö taneūngenre? Yē yip mahamūl ṙòng angkūr nö yih nö in meh, röh yip öre nö ṙāngö pinṙōngen re tö angkūr?

⁶Sitih chinöhö nup chehen Isô! Sitih chinöhö nup töhayūni töpōi ṙāi chehen ò!

⁷Ṙòkhöre yip tarik aṅ i yip hol meh nö ahōngen meh, söl kūöngö panam: yip tarik tölām nö in meh nö hachīlö meh, ngaich mihôiṅ tö meh; cha-a yip nyamā nya-aṅkūö meh ṙātö tinngöp meh nö lā taṙeū tö meh: öt mikahavö nö in ò.

⁸Ngö ṙô ngam Mā Tēv, röh öich min ip sakāmö angū-ö piyāingö yip tö-akaha tarik nö ṙā-ang Ētöm, öp mikah elmat inrē nö ṙā-ang ip rung Isô?

⁹Yip tökalēḵ tarik meh inrē, Ō Tēman, nö ööḵngö min, töp lökten cha min nö kö rökiṙen nö ṙā-ang ip rôngö Isô töp famëlhanga.

¹⁰Kūö ngam chanökhuṙen nö ngaich nö ik kahëm meh Yāköp kahultu kui man min tö sumrōngkūö, ngaich rökiṙen min me-eṅ urāḵngen.

¹¹Ip sakāmö hē meh sökhaka im tahëng lā, ip sakāmö yip aṅ tahëng tarik nö kēngö nup chehenre yip aṅ tahëng pumnāmö tarik inrē nö kuhēthötre nö el minë inkūp meh, ngaich kalah taneūngenre tö Yērusalem, me-eṅ man inrē töhĕng tak aṅ in cha.

¹²Uh pöri me-eṅ ngëichkö sakāmö ök kahëm re ip sakāmö pinlāngen ò, um ṙāmölōn in yip kūön Yūta ip sakāmö inlëlngö cha; um rēhĕn hakeūlôre ip sakāmö kanihngen ò.

¹³Ui kuhēthötre el inkūp yip tarik chu ip sakāmö yöng ötkanôlò cha; hôṅ, uh me-eṅ ngëich kö kanihngen cha ip sakāmö yöng ötkanôlò cha, ui rēhĕn lūöltö tīre i nup chehen cha ip sakāmö yöng ötkanôlò cha.

¹⁴Um sökhaka el talöökö famangngö ël höö, öm harah kūö cha yip tö öthòṅ kô-òngvah; un kētu inrē cha-a yip aṅ in ò tö-ōtren ip sakāmö kanihngen.

¹⁵Pò ngam sakāmö ngam Mā Tēv nö röhta nö i kui pumnāmö taṙòkhöre tarik: sā tī meh ngaich, ngaich angū-ö min tī nö in meh; el kui meh ap min tī meh nö havantu.

¹⁶Sā yīö ngaich òk I kui ngam töhet rôngö, ngatī min nö ṙòkhöre yip pumnāmö tarik nö iṙūöhö kūö, hôṅ, òk yip min, mīkhötī inrē, ngaich cha-a min nöng sā töng rö-ö nö òk.

¹⁷Ikui rôngö Sīyôn pöri min cha-a yip töt kô-òngvah, ngaich angū-ö min nö het; ngaich öp patī Yāköp min nö īnu tö nup amin cha.

¹⁸Ngaich ngam patī Yāköp min nö tameūyö, ngam patī Yôsĕf inrē nö ha ūṙökūö, ngam patī Isô inrē nö kaṙālö afō, ngaich anū-ö min nö ökngö tī nö in cha, ngaich haṙāpngö u; ngaich rö-ö min tö ōtrevö nö umuh i patī Isô; pò e nö ṙô ngam Mā Tēv.

¹⁹Ngaich cha-a min yip Nēkep nö amīnu tö ngam Rôngö Isô; cha-a inrē ip töṙā-akūö panam Filistian: cha-a min inrē tö-amīnu tö ngam el kahôyö Ifrēm; el kahôyö Samariā inrē: amīnu min inrē Penyamin tö Kilīöt.

²⁰Ngaich yip töhakövö in vē tömaṙôngö kūön Israel, yip mī-in ip aṅ Fōnisiā, amīnu, min tö Sarafet; yip töhakövö inrē aṅ Yērusalem, yip mi-i Sefārat, amīnu min tö nup el panam Nēkep.

²¹Yih min inrē yip mahayööken nö i kui rôngö Sīyôn nö akah fālen nö i kui Rôngö Isô; ngaich ngam pūlngö min nö pūlngö ngam Mā Tēv.