Read Car_Nicobarese YÔNA 1 Bible Online

YÔNA 1 - Car_Nicobarese bible

YÔNA 1

¹Yih an ngam ṙô ngam Mā Tēv nö in Yôna ök kikōnyö Amītai, nö ngö ṙô,

²Chōholre, kuṙòh chuh Ninēvĕ ngam tökiröng elpanan,hū-a lā-alkūö e; pò ngam ötlanöökö cha nö yih nö i kūö cha.

³Chōholre pöri ang Yôna nö falngöre nö chuh Tarsis nö ṙā-ang i kūö ngam Mā Tēv; ngaich chuh Yôppa anga-aṅ, ngaich kôtökūö tök chōng hĕng nòng chamuh Tarsis: lökten ò nö kētö ṙāi röönre, ngaich yôklö nö ël ò, ngaich kiröönngöre nö hol aṅ cha nö chuh Tarsis, nö ṙā-ang i kūö ngam Mā Tēv.

⁴Ngaich pöri ngam Mā Tēv nö tīntö ök yöng kuföt nö el ngam mai, ngaich kalēḵ ök chanôchö el mai, lökten ngam chōng nö hòṅ lakūki.

⁵Pa-ekūö ngaich yik aṅ chōng, ngaich cha-a nö kö havëkö tēv re; sukngö nuk chehen cha-a ngaich nö el mai nuk më-el ngam chōng, nö ha öhlen ò tö u. Ngaich pöri Yôna nö yôntī nö lātuhēt el ngam chōng; ṙōlngöre ngaich anga-aṅ, lapat ngaich nö haṙòh.

⁶Lökten ök yōm chōng nö yihtöre nö in ò, ngaich ngö ṙô tö ò, Ō me-eṅ mahaṙòh tö sitih öng angū-ö nö in meh? Chōholre man, havëkö ngam Tēv re, yē ngam Tēv lohten min nö piṙūtken hī, hòṅ hī öt kapah.

⁷Ngaich cha-a nö kö ngö ṙô tö yik in cha tarik, tā-a, töikalah taneūngen, hòṅ hī akahalōn tö tö pô-òvkūö tö ngih ötlanöökö nö i kui hī. Kalah taneūngen cha-a ngaich, ngaich ök taneūngen nö fuk i kui Yôna.

⁸Ngö ṙô ngaich cha-a tö ò, Vë-ekūö meh in, vë-enynang ih; pòkūö chīö öng ngih tötlöök nö i kui hī; asuh ap vahīṙen meh ṙā-ang yih öm inrē? Asuh ap panam meh? Asuh öm me-eṅ inrē tarik?

⁹Ngaich ngö ṙô anga-aṅ tö cha, Heprāi chin chū-ö, ngaich pa-ekūö chū-ö tö ngam Mā Tēv, ngam Tēv ngam halīöngö, ngam vamīlö mai tö ngam eltanyô inrē.

¹⁰Ngaich yik tarik nö pōilöreṙen pinhe-eṅkūö, ngaich ngö ṙô tö ò, Asuh öng ngih inlahen meh? Pò yik tarik nö akahalōn nö ngaich tö ò nö falngöre nö ṙā-ang i kūö ngam Mā Tēv, pòn vë-enynang cha anga-aṅ.

¹¹Ngö ṙô ngam cha-a tö ò, Sitih inlahen tī öi min tö meh, hòṅ ngam mai nö löökta ël nö in ih? Pò ngam mai nö ṙūhölre chanôichö ël.

¹²Ngö ṙô ngaich anga-aṅ tö cha, kēlen chu lā tulöng, ngaich kavalngen chu el mai; hòṅ ngam mai min nö löök nö in yīö: tön akahalōn chin tö ngih yöng chanôichö nö i kui yīö nö pòkūö chu.

¹³Ngaich pöri lang yik tarik nö kalēḵ nö keūthötre nö hēk nö el tanyô; hö-ö pöri cha-a nö kô: pò ngam mai nö ṙūhölre chanôichö nö asaha cha.

¹⁴Lökten cha nö havëkö ngam Mā Tēv, nö ngö ṙô, Ō Mā Tēv, hayāichtôre in in meh, uh in yēḵ öt kôlò tökūö nômö ngòh tarik, unhakeunlöng nö in ih ngam mahām tötmikahavlōn: Ō Mā Tēv, tön kanahanglōn meh an nö tī meh,

¹⁵Kētöre cha-a ngaich tö Yôna, ngaich kavalngen ò nö el mai; ṙātöre chanôichö ngaich ngam mai.

¹⁶Pōyen pinhe-eṅkūö ngaich yik tarik tö ngam Mā Tēv; kētö tökētu ngaich cha-a nö imMā Tēv, ngaich chūöku ṙô nö kilēḵngôre.

¹⁷Halēnlö tökiröng kāḵ ngaich ngam Mā Tēv nö ngameūkten Yôna; ngaich Yôna nö lūöi sumkam lūöi mitööm inrē nö ellōn ök kāḵ.